«Հրապարակ». Վաղը հիվանդանոցից դուրս եկա, ես էլ եմ մասնակցելու պայքարին

Հարցազրույց ԲՀԿ-ական նախկին պատգամավոր Արայիկ Աղաբաբյանի հետ

- Պարոն Աղաբաբյան, Արցախի փրկության օրակարգով մոտ մեկ շաբաթ է՝ Ազատության հրապարակը վերածվել է պայքարի օջախի, այնտեղ նստացույց է անում ԱԱԾ նախկին տնօրեն, խորհրդարանական խմբակցության ղեկավար Արթուր Վանեցյանը, 44-օրյա պատերազմի մասնակից տղաներն են հացադուլ անում, «5165» շարժումը, պատերազմում զոհվածների ծնողներն են հայտարարել, որ միանում են, որտե՞ղ է ԲՀԿ-ն, ձեր օրակարգում Արցախի փրկության համար պայքար չկա՞։

- Ես իմ տեղը ինչ պետք է, անում եմ ու կանեմ։

- Ի՞նչ եք անում։

- Ամեն օր մարդկանց հետ եմ հանդիպում։

- Իսկ այդ հանդիպումներն ի՞նչ նպատակ ունեն։

- Դե, բացատրական աշխատանքներ եմ տանում։ Բացատրում եմ, որ հասկանան իրավիճակը, հետո ինչ կանեն, թող անեն։

- Այսինքն՝ մտահոգված եք այսօրվա վիճակով։

- Այսօրվանը ո՞րն է, չորս տարի է՝ այս վիճակն է, նո՞ր է սկսվել, ինչի։

- Նկատի ունեի` Արցախի շուրջ զարգացումներով․․․

- 18 թվից էլ էդ պրոբլեմը սկսվել է։

- Փաստորեն, զղջում եք, որ հեղափոխությանը ջուր եք հասցրել։

- Լավ, էլի, մի վերադարձեք մանրուքներին։

- Լավ, չվերադառնանք` մեր օրերից խոսենք․ եթե համարում եք, որ այս իրավիճակը չորս տարի է՝ շարունակվում է, ինչո՞ւ ԲՀԿ-ն չի միանում Ազատության հրապարակի պայքարին։

- Ես վաղը հիվանդանոցից դուրս եկա, ես էլ եմ մասնակցելու էդ պայքարին։

- Իսկ ձեր կուսակցությո՞ւնը։

- Եթե  հրապարակում ասվում է, որ կուսակցական պայքար չկա այստեղ, էլ ի՞նչ կուսակցություն եք ուզում սարքել։

- Տանը նստա՞ծ եք աջակցում, ձեր կուսակցության անդամներից որեւէ մեկին չենք տեսել Ազատության հրապարակում։

- Ո՞նց չեք տեսել, կարո՞ղ ա չեմ գնացել, ես դեռ առաջին հանրահավաքից եմ ներկա եղել։

- Իսկ մյուսնե՞րը։

- Ես իմ մասին եմ խոսում, ես կանգնած եմ, ու շատ-շատերն են կանգնած։

- Շատ-շատերի մեջ Գագիկ Ծառուկյանն է՞լ է մտնում։

- Ես ասում եմ, որ իմ մասին կարող եմ խոսել, Դուք էլի կուսակցականացնում եք։

- ԲՀԿ-ն հիմա ընդդիմությո՞ւն է, «Լուսավոր Հայաստանը», օրինակ, ասում է՝ նայած թե որ հարցում ենք ընդդիմադիր։

- Էս ի՞նչ զուգահեռներ եք տանում։

- Վիրավորվեցի՞ք։

- Դուք հիմա ուզում եք հոդված սարքեք՝ «վիրավորվեցի՞ք», ես ի՞նչ գործ ունեմ ուրիշների հետ, տասը հատ ուրիշի անուն եք տալիս, ես անհատ եմ ու վերջ։

- ԲՀԿ-ից դո՞ւրս եք եկել։

- Ոչ, ի՞նչ կապ ունի երկրի համար․․․ ԲՀԿ-ն ինչի չի՞ պայքարում։

- Ինչպե՞ս է պայքարում։ Գիտենք, որ Գագիկ Ծառուկյանը Հիսուսի արձանն է տեղադրում։

- Մեկը մյուսի հետ մի կապեք, դե եկեք հաց չուտենք, էլի, էդ պայքարի հետ կապ չունի։ Չե՞ք հասկանում, որ ամեն մեկն իր նշանակությունն ունի։ Դրանով էլ ազգի միասնականության խնդիրն է լուծում։

- Իսկ ո՞րն է ավելի կարեւոր՝ արձան դնե՞լը, թե՞ փողոցում պայքարելը։

- Դրանք տարբեր հարցեր են, մեկը մյուսով չի փոխարինվում։ Արցախի փրկությունը միլիոն հարցերից կարեւոր է, ես մեկը մյուսի հետ չեմ համեմատում։