Հանրային ռադիոյի աշխատակիցները դժգոհ են․ նրանք հայտարարություն են տարածել

Հանրային ռադիոյի տնօրենի մրցույթի արդյունքները դեռ հայտարարված չեն, սակայն արդեն պարզ է, որ այն անցկացվել է կոպիտ խախտումներով։ Հանրային հեռուստատեսության և ռադիոյի խորհուրդը, որն անցկացնում է մրցույթը, ճնշում է գործադրել հանձնաժողովականների վրա և իր թեկնածուն է պարտադրել՝ հայտնի ռադիոլրագրող Կորյուն Խումարյանի որդուն՝ Գարեգին Խումարյանին։ 

Հանրային ռադիոյի աշխատակիցներն այս պահին ժողով են հրավիրել և քննարկում են իրավիճակը։ Քիչ առաջ նրանք «Հրապարակին» փոխանցեցին հետևյալ հայտարությունը․ «Ծանոթանալով երկրորդ փուլ անցած թեկնածուների ցանկին՝ մենք, Հանրային ռադիոյի աշխատակիցներս ակնկալում ենք, որ 3 ամիս տևած գործադիր տնօրենի թափուր հաստիքի մրցույթում այսօր կհաստատվի արժանի թեկնածու, որը երկար տարիներ եղել է ՀՌ աշխատակից և քաջատեղյակ է ռադիոյից։ Բոլոր թեկնածուների հանդեպ ամենայն հարգանքով հանդերձ` հայտարարում ենք, որ աշխատակիցների կարծիքը պետք է որոշիչ դեր ունենա հանձնաժողովի որոշման կայացման հարցում։ Կոլեկտիվի դիրքորոշումը հստակ է և անզիջում: Տնօրենի ընտրությունը նախատեսվում է այսօր, և ոչ ցանկալի ելքի պարագայում պատրաստ ենք կոշտ քայլերի»: 

Գարեգին Խումարյանը «Լրատվական ռադիո»-ի հիմադիրն է, քաղաքական հաղորդումներ է վարում։ Նա երբևիցե չի եղել Հանրային ռադիոյի աշխատակից, մինչդեռ մրցույթի մասնակիցների թվում կան Հանրային ռադիոյի նախկին և ներկա աշխատակիցներ։