Այսօր իշխանական կայքերում տեղեկություն տարածվեց, թե ԱԺ «Իմ քայլը» խմբակցությունը լքած պատգամավոր Թագուհի Թովմասյանը կարող է այս ընտրություններին մասնակցել ՀՀԿ-Հայրենիք կուսակցությունների ձևավորած դաշինքով: Ըստ տեղեկության` Թովմասյանը կլինի այդ դաշինքի նախընտրական ցուցակի առաջին կին թեկնածուն:
Hraparak.am-ը հետաքրքրվեց «Հայրենիք» կուսակցության նախագահ Արթուր Վանեցյանից, թե որքանո՞վ է հավանական Թագուհի Թովմասյանի` իրենց կողմից ձևավորվող դաշինքի նախընտրական ցուցակում հայտնվելը:
Ի պատասխան` Արթուր Վանեցյանը ո՛չ հերքեց տեղեկությունը, ո՛չ հաստատեց:
«Նման հարց չի քննարկվել, ընտրությունները դեռ նշանակված չեն, ուստի դեռևս վաղ է ցուցակի հարց քննարկելը»,- ասաց Վանեցյանը:
Նա նաև հիշեցրեց, որ իրենք անգամ դաշինքի վերջնական ձևավորման մասին չեն հայտարարել, այլ ՀՀԿ-ի հետ հավանական դաշինքի ձևավորման գործընթացի մեկնարկի մասին են հայտարարել, որտեղ ցուցակի մասին խոսք չկա:
