Լավանդայի Արայիկին ձերբակալել են ու բաց թողել

Դեռ  մեկ տարի առաջ Հաղթանակի զբոսայգու սկզբնամասում, Կասկադի անմիջապես հարևանությամբ «Պրեմիում Հաուս»  կոչվող թաղամասում շինարարական ընկերությունն առաջարկում էր մարդկանց բնակարաններ և կոմերցիոն տարածքներ ձեռք բերել՝ 80-ից մինչև 450 քառ. մետր, յուրաքանչյուր հարկում 1 բնակարան։ 

Դրանք գտնվում էին Ազատության պողոտա 1 հասցեի ենթահասցեներում։ Այս ամռանն արդեն բոլոր բնակարանները վաճառված էին, և ցանկացողներին ընկերությունից պատասխանում էին, որ ազատ բնակարան չունեն։ 

Երեկ Քննչական կոմիտեն հաղորդագրություն էր տարածել այն մասին, որ պայմանագրերի կնքման ինչ որ հանցավոր սխեմա է կիրառվել, որի հետևանքով հարկերը 500 մլն դրամով քիչ են հաշվարկվել։ «Քննությամբ պարզվել է, որ ֆիզիկական անձ Ա․ Հ․-ն, հանդիսանալով գույքերի իրական սեփականատեր, այլ անձի՝ Ն․ Ա․-ի անվամբ իրականացրել է կառուցապատման և բնակարանների օտարման գործունեություն հաշվարկներում խեղաթյուրված տվյալներ մտցնելու և հարկման օբյեկտները թաքցնելու միջոցով առանձնապես խոշոր չափերով հարկեր չվճարելու նպատակով բնակարանների օտարման գործարքների փոխարեն նա կնքել է բաժնային սեփականության օտարման գործարքների պայմանագրեր, որի հետևանքով պակաս է հաշվարկել և չի վճարել շուրջ 500.000.000 ՀՀ դրամի հարկ», - ներկայացնում է քննչական կոմիտեն։

Կոմիտեն հայտնում է, որ քրեական վարույթ է նախաձեռնվել ՔՕ 290 հոդվածով՝ «Հարկերը, տուրքերը կամ այլ վճարներ չվճարելը» և որ 500 մլն  դրամի հարկային պարտավորությունից վերականգնվել է 250 մլն-ը։ ՔԿ որոշումներով Ա․ Հ-ն և Ն․Ա-ն ձերբակալվել են, ապա ազատվել արգելանքից։ 

Մեր տեղեկություններով, «Պրեմիում Հաուս» թաղամասի կառուցապատողը հայտնի գործարար, Լավանդայի Արայիկն է՝ Արայիկ Հայրապետյանը։ Նա Սերժի ժամանակներում Արթուր Բաղդասարյանի ՕԵԿ-ի անդամ էր, իշխանափոխությունից հետո համարավետ տեղավորվել էր նոր իշխանության  սրտի օլիգարխների շարքերում` ՔՊ-ի տանիքի տակ։ Փաստորեն, լավ չէր տեղավորվել։ Թե ինչ հանցավոր սխեմա է գործել, այնքան էլ հասկանալի չէ։ Կփորձենք առաջիկայում ավելի հստակեցնել մեղադրանքի էությունը: