Կիլիկյան ուխտի միաբանական շարքերին միացան երկու կուսակրոն քահանաներ, հայտնում են Մեծի Տանն Կիլիկիո Կաթողիկոսությունից.
«Սուրբ Աթոռի գահակալ Ն.Ս.Օ.Տ.Տ. Արամ Ա Մեծի Տանն Կիլիկիո Կաթողիկոսի օրհնությամբ և նախագահությամբ, 2026 թվականի հունիսի 21-ին՝ կիրակի առավոտյան, Անթիլիասի Մայրավանքի Սուրբ Գրիգոր Լուսավորիչ Մայր Տաճարում մատուցված Սուրբ և Անմահ Պատարագի ընթացքում, Կիպրոսի Հայոց թեմի կաթողիկոսական փոխանորդ Գերաշնորհ Տ. Կոմիտաս արքեպիսկոպոս Օհանյանը կուսակրոն քահանա (աբեղա) ձեռնադրեց և օծեց դպրեվանեցի երկու բարեշնորհ սարկավագների՝ Հովհաննես Պայտունյանին և Աբրահամ Պայտունյանին՝ նրանց անվանակոչելով Տ. Նորայր աբեղա և Տ. Հրայր աբեղա։
Ձեռնադրության և օծման արարողության ավարտին Կոմիտաս արքեպիսկոպոսը հանդես եկավ օրվա խորհրդին համապատասխան քարոզով։
«Ողջույնի» պահին, Արամ Ա Վեհափառ Հայրապետի գլխավորությամբ, միաբան հայրերը բարձրացան խորան և եղբայրական համբույրով ողջունեցին նորընծաներին՝ նրանց մուտքը Տիրոջ անդաստան և Կիլիկյան ուխտի միաբանական շարքեր ընդունելու առիթով։
Հայր Նորայրի լվացումը կատարեցին նրա կնքահայրությունը ստանձնած Տիգրան և Լյուսի Գարակավուրյան ամուսինները, իսկ հայր Հրայրինը՝ Ռաֆֆի և Անահիտ Քեսմեյան ամուսինները։
Տերունական աղոթքից անմիջապես առաջ տեղի ունեցավ Վեղարի օրհնության և հանձնման կարգը, որը կատարյալ հնազանդության և կրոնական ողջախոհության ուխտի խորհրդանիշն է։
Սուրբ Պատարագի ավարտից հետո, վեհարանի դահլիճում, հայր Նորայրը և հայր Հրայրը ծնկաչոք ստացան Վեհափառ Հայրապետի օրհնությունը»։
