Ադրբեջանական մամուլը տարածել, իսկ որոշ հայկական հարթակներ արտատպել են Իրանի ԱԳՆ խոսնակի ասուլիսից կոնտեքստից կտրված մի հատված և իրանական բեռնատարների համար Թուրքիայում առաջացած խնդրի շուրջ ԱԳՆ խոսնակի հայտարարությունը վերագրել այսպես կոչված Զանգեզուրի միջանցքին։
Իրականում ԱԳՆ խոսնակի հայտարարությունն այն մասին, թե խնդիրը քաղաքական չէ, այլ տեխնիկական, վերաբերում է իրանական բեռնատարներին։
«Մեր և Թուրքիայի ջանքերն այն են եղել, որ նկատի ունենալով բարիդրացիությունը և հաշվի առնելով, որ երկուսիս համար կարևոր է երկու երկրների երթուղիներով ապրանքների փոխադրման հարցը, մենք փորձել ենք ինչ-որ կերպ լուծել այդ հարցը։ Հավանաբար շուտով մեր կողմից պատվիրակություն կմեկնի Թուրքիա համապատասխան կառույցների և պահառության մարմնի ներկայացուցիչների ներկայությամբ՝ հարցը մոտիկից քննարկելու համար. Հուսով ենք, որ հարցը շուտով կլուծվի» - ասուլիսի ընթացքում հայտարարել է Էսմայիլ Բաղային։
Այս հայտարարությունը ադրբեջանական որոշ ԶԼՄ-ներ խեղաթյուրված վերագրել են այսպես կոչված Զանգեզուրի միջանցքին։
Մինչդեռ Իրանի ԱԳՆ խոսնակը պատասխանել է Թուրքիայի հետ սահմանին իրանական բեռնատարների համար առաջացած վառելիքի խնդրի մասին հարցին։
Ավելի ուշ իրանական «Միրանպրես» լրատվական գործակալությունը պարզաբանում է տարածել` հերքելու ապատեղեկատվությունը։
««Զանգեզուրի միջանցքի վերաբերյալ ԱԳՆ հայտարարության» մասին հրապարակված լուրը «Դանեշջու» լրատվական գործակալության մեդիա քայլն էր, և արտաքին գործերի նախարարությունը Զանգեզուրի վերաբերյալ նոր դիրքորոշում չի որդեգրել»,-նշել է իրանական ԶԼՄ-ն։
