Թուրքական կապալառուները առանցքային դեր են խաղում Լեռնային Ղարաբաղում. Ադրբեջանի ԱԳ նախարար

Ադրբեջանի արտաքին գործերի նախարարը հայտարարել է, որ թուրքական կապալառուներն առանցքային դեր են խաղում Լեռնային Ղարաբաղում «ազատագրված շրջանների վերականգնման մեջ»։ 

«Կառավարությունը գործընկերություն է ստեղծում աշխարհի առաջատար ընկերությունների հետ` արագացնելու վերակառուցումն ու զարգացումը: Թուրքական կապալառուներն առանցքային դեր են խաղում վերակառուցման գործընթացում: Ամենաառաջին պայմանագրերը կնքվեցին թուրքական ընկերությունների հետ, և մենք վստահ ենք, որ նրան նորարարություն, ռեսուրսներ, լավագույն փորձ և փորձագիտություն են բերելու», - ասել է Ադրբեջանի արտաքին գործերի նախարար Ջեյհուն Բայրամովը թուրքական «Հուրիյեթ Դեյլի Նյուզ» (Hürriyet Daily News) լրատվական կայքի հետ գրավոր հարցազրույցում (05.07.2021):

Նախարարն ասել է, որ իր կառավարությունն ավելի քան 1,3 միլիարդ դոլար է հատկացրել 44-օրյա պատերազմի հետևանքով ադրբեջանական վերահսկողության տակ անցած արցախյան տարածքներում 2021 թվականին վերականգնման աշխատանքներ իրականացնելու համար: «Թուրքիայի աջակցությունը կենսական է այդ տարածքներն ականներից և չպայթած զինամթերքից մաքրելու համար: Թուրքական ընկերությունները զբաղվում են այդ տարածքների վերակառուցմամբ, ներառյալ մայրուղիներ և ենթակառուցվածքներ կառուցելը, ինչպես նաև հանքարդյունաբերության ոլորտում համագործակցությունը», - նշել է նա։

Բայրամովի խոսքերով՝ Ադրբեջանը հավատացած է, որ «Թուրքիայի և այլ բարեկամ երկրների աջակցությամբ վերականգնման գործընթացը «թույլ կտա տեղահանված ադրբեջանական բնակչությանը վերադառնալ իրենց հայրենիք»:

Ադրբեջանի դիվանագիտության ղեկավարն ընդգծել է, որ Թուրքիայի նախագահ Ռեջեփ Թայիփ Էրդողանի այցը Շուշի և Ադրբեջանի և Թուրքիայի նախագահների կողմից համատեղ Շուշիի հռչակագրի ստորագրումը «պատմական իրադարձություն է»:

Նախարարը նշել է, որ հռչակագիրն ընդգրկում է հարցերի լայն շրջանակ, այդ թվում`միջազգային մակարդակում համագործակցություն, քաղաքական, տնտեսական և առևտրային հարաբերություններ, մշակույթ, կրթություն, երիտասարդության քաղաքականություն և այլ ոլորտներ: Նա շեշտել է, որ դա «մեկ անգամ ևս ցույց է տալիս, որ Ադրբեջանն ու Թուրքիան միշտ միասին կլինեն և կապահովեն միմյանց անվտանգությունը»:

«Հռչակագիրը ցույց է տալիս էներգետիկ անվտանգության կարևորությունն ու շեշտում Թուրքիայի և Ադրբեջանի առաջատար դերը ռազմավարական Հարավային գազային միջանցքի իրականացման գործում, որը նպաստում է տարածաշրջանի և Եվրոպայի էներգետիկ անվտանգությանը», - ասել է նա։

«Հարավային գազային միջանցքը» Եվրոպական հանձնաժողովի նախաձեռնությունն է, բնական գազի մատակարարման ուղին Կասպյան ու Մերձավորարևելյան տարածաշրջաններից դեպի Եվրոպա: Հարավային գազային միջանցքի նպատակն է նվազեցնել Եվրոպայի կախվածությունը ռուսական գազից։ Ադրբեջանից դեպի Եվրոպա ուղին բաղկացած է Հարավկովկասյան, Անդրանատոլիական և Անդրադրիատիկ գազատարներից: Այս ուղու ընդհանուր ներդրումը գնահատվում է 45 միլիարդ ԱՄՆ դոլար, իսկ գազատարի նախնական լիցքավորումը նախատեսվում է ադրբեջանական «Շահ Դենիզ» հանքավայրից, որը տեղակայված է Կասպից ծովում։

Ջեյհուն Բայրամովը հայտարարել է, որ «Հարավային գազային միջանցքի» արդյունավետ օգտագործման ու հետագա զարգացման կապակցությամբ «Ադրբեջանն ու Թուրքիան կշարունակեն իրենց համակարգված ջանքերը»։

Թուրք-ադրբեջանական համագործակցության ռազմական և պաշտպանական ասպեկտների վերաբերյալ նախարարը նշել է ոլորտների լայն շրջանակ:

«Ադրբեջանի և Թուրքիայի պաշտպանական համագործակցությունը ներառում է անձնակազմի փոխանակում` ուղղված երկուստեք երկրների պաշտպանական կարողությունների և ռազմական անվտանգության ամրապնդմանը, համատեղ վարժանքներ և զորավարժություններ, ժամանակակից տեխնոլոգիաների հիման վրա զենքերի և զինամթերքի կառավարման ոլորտում սերտ համագործակցություն, ինչպես նաև համատեղ նախագծերի իրականացում՝ տեխնոլոգիաներ զարգացնելու և փոխանակելու ծովային, օդային և տիեզերական ոլորտներում և փոխադարձ պաշտպանական արդյունաբերության տեխնոլոգիաների զարգացում», - մանրամասնել է նա։