Մարտից կենսթոշակառուներն իրենց թոշակներն այլևս բանկերի միջոցով են ստանալու` ոչ թե առձեռն և դա լուրջ խնդիրներ է ստեղծել։ Տավուշի մարզի գյուղերի կենսաթոշակառուներին միասնական սոցիալական ծառայությունների տարածքային կենտրոններից նախազգուշացրել են, որ նրանք գնան համայնքային կենտրոններ, ընտրեն այն բանկերը, որոնց քարտերով մարտի 5-ից ստանալու են իրենց կենսաթոշակների գումարները։ Եթե դա չանեն, ապա կենսաթոշակառուներին թոշակը կարող է տրվել այն բանկերի միջոցով, որոնց մասնաճյուղերը, օրինակ՝ Նոյեմբերյան, Բերդ քաղաքներում չկան։ Կենսաթոշակառուներն ասում են, որ թոշակի գումարները ստանալու, բանկային քարտեր ունենալու համար իրենց համար խնդիր է սահմանամերձ, հեռավոր գյուղերից համայնքի կենտրոն հասնելը: Տարեց մարդկանց համար դժվար է գյուղերը սպասարակող հասարարական տրանսպորտից օգտվելը, սոցիալապես անապահով թոշակառուների համար՝ համայնքի կենտրոն մեկնելու-վերադառնալու համար բավականին գումար պետք է ծախսեն։ Նրանցից շատերն անառողջ են, անկողնային հիվանդներ են, ֆիզիկապես ի վիճակի չեն գնալհասնել համայնքի կենտրոնում գործող Միասնական սոցիալական ծառայությունների տարածքային կենտրոններ, բանկեր։ Բացի այդ նաեւ հոգեբանական ու սովորույթի խնդիր կա` տարեց մարդիկ սիրում են իրենց փողը շոշափել, հաշվել, հաշվարկել, թե ինչքան մնաց, պլանավորել, թե ինչպես ծախսեն: Առանց այն էլ նրանց պետությունը գրոշներ է վճարում, տվածն էլ` քթից բերում, անընդհատ ինչ որ պայմաններ ու նորամուծություններ առաջարկելով:
