«Հրապարակ». Մենք տարաձայնություններ ունենք օրվա իշխանությունների սրտի քաղհասարակության հետ

«Հրապարակի» զրուցակիցը «Հելսինկյան ասոցիացիա» իրավապաշտպան ՀԿ նախագահ, իրավապաշտպան Նինա Կարապետյանցն է:

- Տիկին Կարապետյանց, մենք տեղեկացանք, որ վերջին մասնագիտական քննարկումներից մեկի ժամանակ Դուք եւ այլ իրավապաշտպաններ մտահոգություն եք հայտնել, որ ձեր եւ «Իրազեկ քաղաքացիների միավորում» ՀԿ նախագահ Դանիել Իոաննիսյանի զեկույցներն էապես տարբերվում են, Դուք եւ այլ իրավապաշտպաններ ձեր զեկույցներում նշում եք, որ Հայաստանում ավտորիտար ռեժիմ է գործում, որ Հայաստանում կան քաղաքական բանտարկյալներ ու հալածյալներ, մարդիկ, ովքեր իշխանությանը քննադատելու կամ հավաքներ ու երթեր անելու համար ոստիկանների կողմից խոշտանգվում են եւ այլն, իսկ Դանիել Իոաննիսյանն իր զեկույցներում գրում է, որ Հայաստանը ժողովրդավարական երկիր է, ավելին` տարեցտարի ժողովրդավարությունը զարգացում է ապրում: Իսկ միջազգային կառույցները նրա տեղեկատվությունն են հիմք ընդունում: Կա՞ նման երեւույթ:

- Հանրային հարթակներում հնչող տեսակետները միայն բավական են, որ հասկանանք, թե ոմանք ում շահերն են սպասարկում, բայց անկեղծ կլինեմ` ես չգիտեմ, թե Դանիել Իոաննիսյանն ինչ զեկույցներ է ներկայացնում, թեպետ դրանք փակ չեն, եւ ազատ կարող ենք ծանոթանալ նաեւ դրանց: Ինչ վերաբերում է տարաձայնություններին, ապա մի խումբ փոքրաթիվ մարդկանց եւ մեր միջեւ կա տարաձայնություն: Նրանք մարդիկ են, ովքեր ներկայանում են քաղաքացիական հասարակության անունից, եւ խոսքը միայն Դանիել Իոաննիսյանի մասին չէ բնավ: Այդ մարդիկ ակնհայտորեն չեն ներկայացնում այն իրավիճակը, որն առկա է Հայաստանում, կամ էլ ներկայացնում են, սակայն թերի, ոչ լիարժեք: Այն աշխատանքը, որ արվել է առաջ եւ արվում է հիմա` նրանց կողմից, այսօրվա գնահատականների հետ աղերս չունի:

- Այսինքն` նրանք իրենց զեկույցներում իսկապես ներկայացնում են, որ Հայաստանում ժողովրդավարությունը ծաղկո՞ւմ է:

- Դե, միայն իրենց ելույթները, հարցազրույցները հենց այդ մասին են: Բացահայտ խոսում են, որ Հայաստանում ժողովրդավարության հետ կապված ինչ-որ առաջընթացներ կան:

- Արդյունքում միջազգային կառույցների հետ աշխատելիս խնդիրներ չե՞ն առաջանում: Թերեւս դուք մի բան եք ասում, նրանք` բոլորովին այլ, բայց իրականությունը բոլորս տեսնում ենք:

- Ցանկացած երկիր, պետություն, քաղաքականություն, իրավիճակն օգտագործում է այնպես, ինչպես ձեռնտու է իրեն այդ պահին: Կան երկրներ, որոնց այսպիսի Հայաստան տեսնելը ձեռնտու է, ուստի մեզ լսելու փոխարեն կնախընտրեն իրականությանը չհամապատասխանող տեղեկություններ ստանալ: Բայց իմ խնդիրը ոչ թե ինչ-որ մեկին հաճոյանալն ու դուր գալն է կամ ֆինանսավորում ստանալը, այլ` իրականությունը բացահայտելը: Մեր գործն իրականությունը ցույց տալն է, Հայաստանի շահերը պաշտպանելն է: Իսկ թե ով ինչ է անում, անկեղծ ասած, արդեն ինձ չի էլ հետաքրքրում: Ֆիզիկապես հազար ֆրոնտով էլ չենք կարող պատերազմել ու պայքարել: Ավելի արդյունավետ է ալտերնատիվ տեսակետներ ներկայացնելը: Մենք, որպես կազմակերպություն, իրականում լուրջ խնդիրներ ունենք:

- Ի՞նչ խնդիրներ:

- Խնդիրներ՝ կապված այն բանի հետ, որ կառույցը մարգինալացվում է, որեւէ մեկի համար գաղտնիք չէ, որ հասարակական կազմակերպություններն ունեն ֆինանսական դոնորներ: Մենք շատ հաճախ դրանք հայթայթելու դժվարությունների առաջ ենք կանգնում:

- Բայց կարծես թե հիմա բոլոր արեւմտամետ կազմակերպությունները նման խնդիրներ ունեն: ԱՄՆ նորընտիր նախագահ Դոնալդ Թրամփը 90 օրով դադարեցրել է տարբեր երկրներում, այդ թվում` Հայաստանում տարբեր ՀԿ-ների եւ կառույցների ֆինանսավորումը: Որոշ կազմակերպություններ թեպետ մեկ տարվա համար ստացել էին գումար, սակայն այդ հայտարարության հաջորդ օրվանից հայտարարեցին, որ դադարեցնում են իրենց ծրագրերը, անգամ մի կազմակերպություն քննարկում էր նշանակել` չեղարկեց այն: Եվ այդ ամենը վկայեց, որ մարդիկ սխալ չեն, երբ նրանց կոչում են գրանտակերներ, եւ նրանց գործունեությունը մեծ մասամբ պայմանավորված է ֆինանսավորմամբ: «Հելսինկյան ասոցիացիա» իրավապաշտպան ՀԿ-ն այս պահին ունի՞ նման խնդիր:

- Բոլորիս ֆինանսական շարժը 90 օրով դադարեցվել է, մի մասի վրա դա շատ ավելի արագ է ազդել, մի մասի վրա` առայժմ դեռ ոչ: Մենք այս պահի դրությամբ առայժմ մեր աշխատանքը շարունակում ենք, բայց չենք բացառում, որ ինչ-որ մի պահի մենք էլ կարող ենք դադարեցնել մեր աշխատանքը:

- Այսօր Ազգային ժողովում անհետ կորածների ծնողների մասնակցությամբ փակ քննարկում է նախատեսված: Ներկա է լինելու նաեւ անհետ կորածների պետական հանձնաժողովը, որի նախագահն ԱԱԾ տնօրենն է։ Կլինի նաեւ պաշտպանության նախարարը: Նշվում է, որ քաղհասարակությունից էլ ներկաներ կլինեն: Դուք ներկա գտնվելո՞ւ եք:

- Օրվա իշխանություններն ունեն իրենց սրտի քաղհասարակությունը, ուստի, ինչպես Անդրանիկ Քոչարյանի կազմակերպած լսումների ժամանակ էին «անփոխարինելի» մարդիկ ներկա, այդպես էլ այս անգամ է լինելու: Համենայնդեպս, ես ոչ մի հրավեր չեմ ստացել, արդեն պատկերացնում եմ, թե ովքեր են ներկաները լինելու: