Հովհաննես Սահակյանին առաջադրվել է հարյուրամյակի ամենաանհեթեթ մեղադրանքը

«Շանթ»-ի հետ զրույցում ընտրությունների առիթով Երևան ժամանած Հովհաննես Սահակյանն ասել էր, որ Մոսկվայից եկել են մասնակցելու քվեարկությանը և նույն օրը պատրաստվում են վերադառնալ։ «Մոսկվայից եկել ենք ընտրենք, երեկոյան 7-ին հետ ենք վերադառնում»,- ասել էր նա։

Լրագրողի՝ «Նույն օրը՞» հարցին արձագանքելով՝ Սահակյանը նշել էր. «Անպայման, որ կարող ա խառնվի վիճակը, երեխեքի հետ ենք, չմնանք էլի բարդություններին»։

Այս արտահայտությունը իշխանությունների վրդովմունքն էր հարուցել, օրվա ընթացքում մարդուն թիրախավորեցին, իսկ երեկոյան իրավապահներին ուղարկեցին օդանավակայան` քվեարկելու համար Հայաստան եկած` իր սահմանադրական իրավունքն իրացնող քաղաքացուն ձերբակալելու: Սահակյանը օդանավակայանից կապվել է Հրանտ Մելիք Շահնազարյանի հետ, ասել էր, որ մեկնումից առաջ, հենց օդանավակայանում ձերբակալում են իրեն։

Քննչական կոմիտեն այսօր հաղորդագրություն է տարածել մեկ անձի ձերբակալելու մասին. «ՀՀ քննչական կոմիտեում ստացված առերևույթ հանցանքի մասին հաղորդման համաձայն՝ Հ.Ս.-ն հաստատապես տեղյակ լինելով նախապատրաստվող հանցագործության մասին՝ չի հայտնել ՀՀ իրավասու մարմիններին։

Հաղորդման առթիվ ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչությունում նախաձեռնվել է քրեական վարույթ՝ Քրեական օրենսգրքի 473-րդ հոդվածի 1-ին մասով (հանցագործության մասին չհայտնելը): Քննիչի որոշմամբ Հ.Ս.-ն ձերբակալվել է»։

Խոսքը ՌԴ եւ ՀՀ քաղաքացի Հովհաննես Սահակյանի մասին է: Մենք փորձեցինք պարզել, թե ինչում են մեղադրում նրան: Մեզ հայտնեցին, որ նրա նկատմամբ քրեական հետապնդում դեռ չի հարուցվել: Իրավապահ համակարգի մեր աղբյուրները հայտնեցին, որ քրեական վարույթ նախաձեռնելու համար հիմք է հանդիսացել. «Կարող ա խառնվի վիճակը, երեխեքի հետ ենք, չմնանք էլի բարդություններին» խոսքերը։ Քննչական կոմիտեն գտնել է, որ Հովհաննես Սահակյանը նախապատրաստվող հանցագործության մասին է իմացել, որը թաքցրել է` չի հայտնել իրավապահներին։ Իբրեւ թե «կխառնվի իրավիճակը» հանցագործություն է իրենից ներկայացնում, որի մասին Սահակյանը պետք է հաղորդում տար: Ավելի աբսուրդ մեղադրանք, թերեւս, դժվար է պատկերացնել: Սա ակնհայտ քաղաքական հետապնդում է` Սամվել Կարապետյանին առաջադրված «մեր ձեւով կմասնակցենք» արտահայտության կապակցությամբ հարուցված վարույթին շատ նման: Այսինքն, մարդը չէր կարող պարզապես կարծիք, ենթադրություն հայտներ, որ վիճակը կարող է խառնվել: Իսկ «վիճակը խառնվել» արտահայտության տակ ինչ հանցանք է նկատել Քննչականը, երեւի միայն քննիչներին է հայտնի:

Քիչ առաջ ՄԻՊ-ից հայտնեցին, թե իրենք այցելել են ձերբակալված անձանց պահման վայրում գտնվող Հովհաննեսին եւ իրենց ուշադրության կենտրոնում են նրա իրավունքները։