«Հրապարակ». Ճանապարհին ընկած 20 դրամը կվերցնեն, բայց իշխանությունը չեն վերցնում

Հայաստանի երկրորդ քաղաքի՝ Գյումրու քաղաքապետի աթոռի համար պայքարի դուրս ելածների թիվը գերազանցում է սպասելիքները։ Արտահերթ ընտրություններին իրենց մասնակցությունն արդեն հաստատել են խորհրդարանի ընդդիմադիր «Պատիվ ունեմ» խմբակցության պատգամավոր Մարտուն Գրիգորյանը, պրոդյուսեր, հասարակական գործիչ Ռուբեն Մխիթարյանը, Գյումրու ավագանու նախկին անդամ, ԲՀԿ-ական, հետո անկուսակցական դարձած Արտյոմ Ղարաղազարյանը, ՔՊ-ի քաղաքապետի պաշտոնակատար, բոլորովին վերջերս իշխող ուժի շարքերը համալրած Սարիկ Մինասյանը, ԱԺ ԲՀԿ-ական նախկին պատգամավոր, Գյումրու նախկին քաղաքապետ Վարդան Ղուկասյանը, «Մենք» ՀԿ ղեկավար, գործարար Կարեն Սիմոնյանը։ Գյումրու քաղաքապետի ընտրություններին մասնակցելու ցանկության մասին հայտնել են նաեւ «Ապրելու երկիր», «Հանուն Հանրապետության», Դաշնակցություն, ԴՕԿ կուսակցությունները: Թե ինչ ֆորմատով, դեռեւս հստակ չէ։ 

Ո՞վ կհաղթի Գյումրիում, Շիրակի թեմի առաջնորդ Միքայել Աջապահյանը վստահ ասում է․ այս ցուցակից՝ ոչ ոք։ 

- Ո՞վ ընտրվի, որ Գյումրու համար լավ լինի։

- Ով էլ ընտրվի, լավ կլինի։ 

- Ռուբեն Մխիթարյանի դեպքում լավ կլինի՞։

- Եթե ընտրվի, վատ չի լինի, բայց կընտրվի՞։ Ոչ մեկն էլ չի ընտրվելու։

- Գյումրին կմնա առանց քաղաքապե՞տ։

- Այդպես դուրս կգա։

- Գուցե կոալիցիա կազմեն։

- Բայց կկազմե՞ն` մեծ հարց է։

- Առաջիկայում քաղաքական ի՞նչ զարգացումներ եք տեսնում։

- Ոչ մի զարգացում էլ չեմ տեսնում։

- Բագրատ սրբազանն ասում է՝ շուտով վերսկսելու ենք ակտիվ գործողությունները։

- Երանի Բագրատ սրբազանի ասածները լինեն, բայց չեն լինում։ Խանգարում է հասարակության վերաբերմունքը։ Չեն գնում հետեւից, չգնալը հասարակության անտարբերության հետեւանքն է։ Կարծես այս երկիրը ոչ մեկին չի պատկանում, իբրեւ պատկանում է ժողովրդին, բայց փաստացի ոչ մեկին չի պատկանում՝ ո՛չ իշխանությանը, ո՛չ ժողովրդին։ 

 - Փաշինյանն ասում էր՝ իշխանությունը փողոցում ընկած է։ 

- Անտարբեր են, որ անտարբեր չլինեն, կվերցնեն։ Ճանապարհին ընկած 20 դրամը կվերցնեն, բայց իշխանությունը չեն վերցնի։

- Իսկ 2018-ին ինչպե՞ս վերցրին։

- Հարցական է, եթե նույնիսկ եղավ, դրա պատճառները կային։

- Ոմանք կարծում են, որ իշխանությունն ուղղակի հանձնվեց Նիկոլ Փաշինյանին։

- Այո, բոլոր հիմքերը կան՝ այդպես մտածելու։

- Հավանական համարո՞ւմ եք, որ Փաշինյանն էլ ՀՀԿ-ի պես խաղաղ, լեգիտիմ ձեւով, խորհրդարանով իշխանությունը կհանձնի։

- Տեսականորեն հնարավոր է, բայց սա իշխանություն հանձնող չէ։ 

- Ինչո՞ւ են Ձեզ հալածում, երբ նախկին նախագահներին եք քննադատում, ասում եք, որ նրանք պետք է հեռանան։

- Տնտեսական, ֆինանսական կախվածության հարցեր կան, իրենք ինչպե՞ս հեռացնեն այդ մարդկանց, եթե ֆինանսական կախվածություն ունեն։ 

- Հայաստանում իշխանափոխություն անելուն ի՞նչ է պակասում։

- Ժողովրդի կամքն ու ցանկությունը։ Եթե ժողովուրդը ցանկանա, առաջնորդ կգտնի, ինչպես որ գտավ 2018-ին, իհարկե, սխալվեց, բայց գտավ։ 

- Ռոբերտ Քոչարյանն ունի՞ շանսեր՝ ընտրվելու։

- Քոչարյանին ավելի շատ ատում են, քան՝ սիրում, եթե շատ ատում են, ինչպե՞ս շանսեր կունենա ընտրվելու։

- Ո՞ւմ եք տեսնում առաջնորդի դերում։

- Բագրատ սրբազանին։ Իր շարժման հաղթանակը կարող է ինչ-որ բան փոխել։ Ես չեմ ասում՝ վարչապետ լինի, նա չի կարող լինել վարչապետ, երկքաղաքացի է։ 

- Ասում են՝ շարժումը մարել է։ 

- Կարող է վերաարթնանալ, ի՞նչ է եղել։

- Վեհափառն աջակցո՞ւմ է Բագրատ սրբազանին, Սրբազանը կարո՞ղ է վերադառնալ եկեղեցի։ 

- Ունի վերադառնալու շանս, պետք է դուրս գա Սրբազան պայքարից եւ վերադառնա եկեղեցի, թե ինչ առաքելությամբ՝ պետք է որոշի Վեհափառը։