Մենք գրել էինք, որ Նիկոլ Փաշինյանի կողմից հորինված ու հիմնադրված «Քաղաքացու օրվա» առթիվ վարչապետի աշխատակազմը 26 մլն դրամ է փոխանցել Ջեմմա Թադևոսյան ԱՁ-ին, որպեսզի նա օրվա կապակցությամբ հանրապետության տարբեր քաղաքներում ու համայնքներում բանախոսություններ կազմակերպի։ Մենք փորձեցինք պարզել, թե որ քաղաքներում ու համայնքներում են կազմակերպվել այդ բանախոսությունները և ովքեր են Փաշինյանի ստեղծած տոնի բանախոսները, որոնք ըստ էության այս իշխանությունների քարոզիչներն են։ Մեր հարցմանն ի պատասխան կառավարությունից բանախոսների մի ցանկ ենք ստացել, որտեղ տարբեր հիմնադրամների ու կազմակերպությունների տնօրենների ու աշխատակիցների անուններ են։ Ներկայացնում ենք այն անձանց անունները, որոնք հասարակության շրջանում որոշակի ճանաչում ունեն։
Աշտարակում բանախոսել է ԵՊՀ գիտքարտուղար Մերի Հովհաննիսյանը, Ապարանում՝ ծանրամարտիկ Հռիփսիմե Խուրշուդյանը, Մասիսում բանախոսել է դերասան Հարություն Մովսիսյանը, Վաղարշապատում՝ ծանրամարտիկ Սիմոն Մարտիրոսյանը, Մածամորում՝ Հայատսանի պետական ազգային ակադեմիական երգչախմբի տնօրեն Դավիթ Թերզյանը, Փարաքարում՝ ծանրամարտի աշխարհի չեմպիոն Հոկսեն Միրզոյանը, Վանաձորում բանախոսել է բռնցքամարտիկ Վիկ Դարչինյանը, Տիկնիկային թատրոնի գեղարվեստական մասի խորհրդատու Ռուբեն Բաբայանը բանախոսել է Մալաթիա- Սեբաստիայում, Նոր -Նորքում բանախոսել է ԵՊՀ ժուռնալիստիկայի ֆակուլտետի դեկանմ Նաղաշ Մարտիրոսյանը, Ավանում՝ ծանրամարտիկ Նազիկ Ավդալյանը, Նորք – Մարաշում՝ ծանրամարտիկ Մալխաս- Ամոյանը։ Բանախոսների ընդհանուր թիվը 68-ն է, բանախոսությունների կազմակերպումն արժեցել է 26 մլն դրամ։
