Հայաստանի պաշտոնական աղբյուրները շարունակում են լռել այն մասին, թե ընդունել է արդյոք հայկական կողմը Ադրբեջանի հրավերը՝ մասնակցել Բաքվում կայանալիք COP29 գագաթնաժողովին:
ԱԳՆ-ն, ի պատասխան այս մասին «Հրապարակ»-ի գրավոր հարցմանը, ուղարկել է այն ստանդարտ տեքստը, որը սովորաբար շարադրում է այս կամ այն հարցի ուղիղ պատասխանից խուսափելու համար։
«Ի պատասխան Ձեր հարցման՝ տեղեկացնում ենք, որ ՀՀ պատվիրակությունների արտասահմանյան այցերի վերաբերյալ տեղեկատվությունը ներկայացվում է հանրությանը պատշաճ ժամկետներում: Հայաստանի Հանրապետությունը բազմիցս հայտարարել է, որ պատրաստ է 1 ամսվա ընթացքում Ադրբեջանի հետ վերջնականացնել եւ ստորագրել խաղաղության պայմանագիրը եւ շարունակում է Ադրբեջանի հետ բանակցային գործընթացում առաջնորդվել այդ մոտեցմամաբ», -նշված է պատասխանում:
Հիշեցնենք, որ անցած շաբաթ հայտնի դարձավ, որ Արարատ Միրզոյանի անունով հայկական կողմը պաշտոնական հրավեր է ստացել` մասնակցելու նոյեմբերին Բաքվում կայանալիք կլիմայական համաժողովին։
Ավելի վաղ կառավարությունից «Հրապարակ»-ին հայտնել էին, որ COP29 գագաթնաժողովին հայկայան պատվիրակության և Նիկոլ Փաշինյանի մասնակցության հարցին վերջինս կանդրադառնա արձակուրդից վերադառնալուց հետո հրավիրվելիք ասուլիսին։
Նկատենք, որ արդեն վաղուց վատ ավանդույթ է դարձել թուրք-ադրբեջանական կողմերի հետ Հայաստանի շփումների վերաբերյալ տեղեկությունը Բաքվից կամ Անկարային արտահոսելուց հետո հաստատելու իշխանությունների գործելաոճը։
Այդպես եղավ նաև այսօր հայ-թուրքական սահմանին կայացած Ռուբինյան-Քըլըչ հանդիպման դեպքում։
