ԿԸՀ-ն իր կազմավորման 30-ամյակի կապակցությամբ զարգացման նոր պլան է մշակել` 2025-2028 թվականների համար։ Այն հաստատվել է ապրիլի 10-ին, որից հետո հանդիսավոր ընդունելություն է եղել, որին հրավիրված են եղել ԿԸՀ նախկին անդամներ։ ԿԸՀ նախագահ Վահագն Հովակիմյանը հետաքրքիր կազմ է հավաքել իր հարկի տակ` Տիգրան Մուկուչյան, Խաչատուր Բեզիրջյան, ներկայիս անդամներ Սեյրան Շահսուվարյան, Սիլվա Մարկոսյան, որոնք ընտրական գործընթացների մասնակցության հարուստ ու ոչ միանշանակ փորձ ունեն։ Սեյրան Շահսուվարյանը, օրինակ, ժամանակին «Զինուժում» էր` նախկին Պնախարար Սեյրան Օհանյանի մամուլի խոսնակն էր: Սիլվա Մարկոսյանը հին ՀՀԿ-ական է, իսկ ԿԸՀ ներկայիս նախագահը միջոցառման մասնակիցների առնվազն կեսի հետ անցյալում բուռն ու երկարատեւ պայքարի մեջ է եղել, նրանց օրոք տեղի ունեցած ընտրություններից հետո բռնությունների է ենթարկվել, ընտանիքով հալածվել։ Միջոցառման մասին հարցուփորձ արեցինք ԿԸՀ նախկին նախագահ Տիգրան Մուկուչյանին, որն այս մարմնի ղեկին էր 2011-2022 թվականներին: «Առանձնահատուկ բան չի եղել: Բոլոր տարիների ԿԸՀ նախագահներին հրավիրել էին, նաեւ ԿԸՀ կազմն էր: Սկզբունքորեն բոլորն էլ ներկա էին, ովքեր Հայաստանում են: Կարճ, փոքր շփում եղավ։ Այդքանը»,- պատասխանեց Դավիթ Հարությունյանի կադրը, որը ՀՀԿ-ի ժամանակ կայացած ընտրական գործընթացներն էր համակարգում` ընդհուպ մինչեւ 2022 թվականը: Տիգրան Մուկուչյանի հետ զրույցից տպավորությունն այնպիսին էր, թե նա հիմա էլ է շարունակում մնալ ԿԸՀ նախագահ:
- Ի՞նչն է փոխվել, անընդհատ քաղաքական պայքարի, շարժումների կիզակետում է եղել ԿԸՀ-ն: Ինչպե՞ս կամփոփեք անցած 30 տարին:
- Ընդհանուր ընտրական օրենսդրությունը, իհարկե, էվոլյուցիա է ապրել: Բնական է, դրան զուգահեռ՝ անընդհատ համակարգի կատարելագործում է տեղի ունեցել, եւ եթե մենք անգամ օրենսդրությունը համեմատենք նախորդ տարիների հետ, կտեսնենք, որ Ընտրական օրենսգիրքն ընդունելիս հաշվի է առնվում նախորդ փորձը, եւ դրա հիման վրա տեղի է ունենում կատարելագործում:
- Բայց ինչո՞ւ են նույն կեղծիքները կրկնվում: Այս անգամ մենք տեսանք, որ Գյումրիում հին տեխնոլոգիաներ կիրառվեցին՝ լույսեր էին անջատում, ինչպես հին ժամանակներում, վարչական ռեսուրս եւ այլն:
- Ես միշտ ասել եմ ու կրկնում եմ նույնը՝ յուրաքանչյուր հանգամանք պետք է ուսումնասիրվի փաստերի համադրությամբ. ցանկացած դեպք, որ տեղի է ունենում ընտրությունների օրը, որը տարակերպ ընկալումների տեղիք է տալիս, պետք է մանրակրկիտ ու փաստական հանգամանքների ուսումնասիրմամբ գնահատվի, որովհետեւ այդ ամենը կարող է լինել զուտ տեխնիկական խնդրից մինչեւ ամենատարբեր այլ պատճառներ:
- Իսկ ԿԸՀ-ում քննարկվո՞ւմ են այդ դեպքերը: Կոնկրետ Գյումրու փորձը, Ձեր կարծիքով, քննարկվե՞լ է ԿԸՀ-ում:
- Ես տեղյակ չեմ հիմա: Բայց ցանկացած նման հանգամանք, իհարկե, պետք է քննարկվի, որովհետեւ ԿԸՀ-ն ունի նաեւ օպերատիվ միջամտության գործառույթ, եւ բնական է, այն տեղեկատվական հոսքերին հետեւելու ընթացքում, եթե նմանատիպ հաղորդումներ, հրապարակումներ են լինում, ահազանգեր՝ վստահված անձանց, թեկնածուների, դիտորդների կողմից, բնականաբար, ձեռնարկվում են անհրաժեշտ միջոցներ: Կարեւորը, որ նկատված ցանկացած թերություն կամ խախտման հետեւանք անմիջապես վերանա:
- ԿԸՀ նախագահը կուսակցական է, իշխող «Քաղաքացիական պայմանագիր» կուսակցության վարչության նախկին անդամ էր` նշանակվել է ԿԸՀ նախագահ։ Սա խախտում չե՞ք համարում՝ քաղաքական չեզոքության, ժողովրդավարության սկզբունքների տեսակետից:
- Այդ հարցը ԿԸՀ նախագահի հետ քննարկեք: Իհարկե, կան օրենքով սահմանված չափանիշներ՝ ԿԸՀ անդամների եւ նախագահի համար, եւ ԿԸՀ անդամներն ու նախագահն այդ չափանիշներով պետք է գործեն: Չափանիշները սահմանված են օրենքով:
- 2011 թվականից ԿԸՀ նախագահ եք եղել, ի՞նչ եք կարծում՝ ամենաշատ ընտրակեղծիքները ո՞ր թվերին են եղել:
- Ես նման ուսումնասիրություն երբեւիցե չեմ անցկացրել: Կարող եմ ասել, որ տարիների ընթացքում` ինչպես գործառույթների կանոնակարգման, այնպես էլ թափանցիկության եւ հրապարակայնության առումով անընդհատ տեղի է ունեցել կատարելագործում, եւ կարծում եմ, որ գործող Ընտրական օրենսգրքում, հաշվի առնելով նաեւ ընտրական գործընթացների նախորդ փորձը, ընտրողների, քաղաքական ուժերի առաջարկությունները, ներդրվել են այնպիսի մեխանիզմներ, որոնք հնարավորություն են տալիս, որ ամբողջ ընտրական գործընթացը վերահսկվի:
- Ի՞նչը կփոխեիք, այնուամենայնիվ, այսօրվա ընտրական գործընթացում, օրենսդրության մեջ՝ գուցե:
- Կդժվարանամ պատասխանել, տեւական ժամանակ է՝ ընտրական գործընթացների հետ առնչություն չունեմ, բայց այն Ընտրական օրենսգիրքը, որը գործել է այն ժամանակ, երբ ես ԿԸՀ նախագահ էի, լայն թափանցիկություն ու հրապարակայնություն էր ապահովում, իսկ զարգացման առումով միշտ էլ տեղ կա:
ՀԳ․ Փորձեցինք ԿԸՀ ներկայիս նախագահ, մեր նախկին կոլեգա Վահագն Հովակիմյանի հետ կապ հաստատել, սակայն նա չարձագանքեց, չցանկացավ հարցերի պատասխանել: Դիմեցինք նրա նախկին կուսակցին՝ ՀԱԿ իրավախորհրդատու Արմեն Խաչատրյանին, որը եւս ընտրակեղծիքների բովով անցած գործիչներից է: Վահագնը եւ այն մարդիկ, որոնց օրոք ԿԸՀ ներկայիս նախագահին, նրա հորը դատում էին` հերթական ընտրությունից հետո, այսօր միասին ԿԸՀ 30-ամյակն են տոնում, ինչպե՞ս եք սա գնահատում: «Նորմալ է` փորձի փոխանակում են անում Գյումրիից հետո ու 26 թվականի ընտրություններից առաջ»,- ասաց Արմեն Խաչատրյանը:
