Մեր թիմում իրար լավ ենք հասկանում՝ միասնական ենք համակրում կամ հակակրում

Հարցազրույց «Իմ քայլի» պատգամավոր, Լոռու մարզից ընտրված Արամ Խաչատրյանի հետ

- Պարոն Խաչատրյան, ինչո՞վ կհիմնավորեք Ձեր աննախադեպ սկզբունքայնությունը․ մեկ օր առաջ մերժում էիք նախագահի թեկնածու Արթուր Վաղարշյանին, ի վերջո, գրեթե ողջ կազմով կողմ քվեարկեցիք։ Ի՞նչ փոխվեց մեկ գիշերվա ընթացքում։

- Մի գիշերվա մեջ չի փոխվել, հնչել են տարբեր հարցադրումներ, տրվել են պատասխաններ, այսպես ասած՝ համոզիչ պատասխաններ, որի հիման վրա էլ որոշում ենք կայացրել։

- Ուզում եք ասել, որ ոչ թե մեկ գիշերվա, այլ մեկ ժամվա մեջ է որոշում փոխվել, հարցի քննարկումը մեկ ժամ էլ չտեւեց, բառացիորեն երկու հարց ուղղվեց թեկնածուին։

- Չէ, հիմա նախկինի պես չէ, ոնց որ Դուք եք նկարագրում, գիշերը մեկ ժամվա մեջ չէ, պարտադրել, համոզել, որոշում է կայացվել, եւ քվեարկել ենք։

- Դուք ասացիք՝ «պարտադրել», ես ոչինչ չեմ նկարագրում, ընդամենը հարցնում եմ։

- Չէ, լավ, ես Ձեր մտքի շարունակությունն ասացի, համենայնդեպս, Ձեր հարցի ենթատեքստից դա հասկացա։

- Իմ հարցը, խնդրում եմ, առանց ենթատեքստերի հասկացեք ու պատասխանեք՝ ի՞նչը փոխեց ձեր դիրքորոշումը։

- Բայց երկու հարց չէր, բազմաթիվ հարցեր տրվեցին, եւ եղան պատասխաններ, որոնք համոզիչ էին։

- Օրինակ։

- Օրինակ՝ անցած ճանապարհը, խոսքի ազնվությունը, անկեղծությունը, էլ չեմ ասում՝ մասնագիտական որակները։

- Այդ որակները մեկ տարվա ընթացքո՞ւմ է Վաղարշյանը ձեռք բերել, կամ՝ ո՞ր ճանապարհի մասին է խոսքը՝ մինչեւ մեկ տարի առաջվա՞, թե՞ վերջին մեկ տարվա։

- Դե, այս անգամ ավելի համոզիչ պատասխաններ հնչեցին, եւ պատգամավորները, գիտեք՝ բոլորն էլ իրենց խղճի մտոք քվեարկեցին։

- Փաստորեն, բոլորիդ խիղճը նույնկերպ է գործում։

- Այդպե՛ս էլ կարող է ստացվել։ Դա խոսում է մեր քաղաքական թիմի ներդաշնակության մասին։

- Ի՞նչ ներդաշնակություն։

- Որ մենք իրար լավ ենք հասկանում, մենք միասնական ենք համակրում կամ հակակրում։

- Մեկ օր առաջ իմքայլականներից շատերը՝ ի դեմս խմբակցության ղեկավարի, հայտնում էին, որ ոչինչ չի փոխվել մեկ տարվա ընթացքում։

- Գիտեք, խմբակցությունը չի հայտարարել այդպես, յուրաքանչյուր պատգամավոր կարող է ունենալ իր պատկերացումները, բայց, ինչպես տեսնում եք, մեծամասնությունը կողմ է։

- Ծավալված քննարկումներից հետո Արթուր Վաղարշյանի համար էր անգամ անհավանական, որ ինքը կընտրվի, եւ ասում էր, որ աստվածային հրաշք պետք է տեղի ունենա, որ իրեն ընտրեն։

- Փաստորեն, հրաշքներ լինում են։

- Փաստորեն, խորհրդարանում սկզբունքներով եւ գաղափարներով առաջնորդվելու փոխարեն հրաշքների սպասումներով են ապրում, հիմա որ ձեզ մեղադրեն անսկզբունքայնության կամ «վերեւից» հրահանգով առաջնորդվելու մեջ, պիտի նեղվեք, չէ՞։

- Մեր գործողությունները թույլ չեն տվել, որ մարդիկ մեզ կասկածեն, ոչ մեկը մեզ հրահանգ չի կարող տալ։

- Նիկոլ Փաշինյա՞նն էլ չի կարող։

- Նիկոլ Փաշինյանն ինձ նման հրահանգ չի տվել։