Եվրամիությունը մարտի 6-ին Բրյուսելում կանցկացնի արտահերթ գագաթնաժողով՝ երկրների եւ կառավարությունների ղեկավարների մասնակցությամբ։ Օրակարգում լինելու է երկու հարց՝ Ուկրաինական հակամարտություն եւ եվրոպական պաշտպանական կարողություններ։ Այս մասին հայտարարել է Եվրախորհրդի ղեկավար Անտոնիու Կոշտան։ «Որոշում եմ կայացրել հրավիրել Եվրոպական խորհրդի հատուկ նիստ՝ մարտի վեցին։ Մենք ապրում ենք Ուկրաինայի եւ եվրոպական անվտանգության համար վճռական պահ»,- սոցկայքի իր էջում գրել է Կոշտան։
Հավելել է, որ եվրոպացի առաջնորդների հետ խորհրդակցությունների ժամանակ լսել է ընդհանուր դիրքորոշումը, թե ինչպես նշված խնդիրները կարգավորել ԵՄ մակարդակում։ «Կշարունակեմ աշխատել Եվրահանձնաժողովի նախագահ Ուրսուլա ֆոն դեր Լեյենի եւ բոլոր անդամ պետությունների հետ, որպեսզի պատրաստ լինենք որոշում կայացնել մարտի վեցին»,- նշել է Կոշտան։
