Նորօրյա Բենդեր. Հայերն այլեւս փող չեն աշխատելու եւ փող չեն վճարելու ոչնչի համար, նրանք դա ստանալու են ԵՄ-ից
Իլֆ և Պետրովի անմահ ստեղծագործության՝ «12 աթոռ» վեպում հանդիպում են հետևյալ տողերը. «Васюкинцы денег платить не будут. Они будут их по-лу-чать!»
Սա Բենդերի պնդումն է, ի պատասխան Վասյուկի գյուղի բնակիչների զարմանքի, թե ինչպես կարող են Վասյուկիում շախմատի միջազգային մրցաշար կազմակերպել, չէ որ դրա համար փող է անհրաժեշտ: Ինչին ի պատասխան, գրոսմայստեր Բենդերը պատասխանում է. «Միանգամայն իրական է. իմ անձնական կապերը և ձեր ինքնագործունեությունը, ահա և բոլոր անհրաժեշտն ու բավարարը՝ Միջազգային վասյուկինյան մրցաշարի կազմակերպման համար»:
«Հավաստի աղբյուրից» տեղեկանում ենք, որ Հայաստանն այլևս միջանցքների չի վերածվելու, այլ դառնալու է «ԵՄ «պաշտպանական գիծ»: Типа - «Ли́ния Маннерге́йма»՝ Ֆիննական ծոցի և Լադոգա լճի միջև պաշտպանական կառույցների համալիր (ստեղծված 1920-30 թթ.), որը նախատեսված էր զսպելու ԽՍՀՄ կողմից հնարավոր հարձակողական հարվածը:
Խոսքը վերաբերում է ԱԺ անկախ պատգամավոր, «Հանուն Հանրապետության» կուսակցության ղեկավար մարմնի ներկայացուցիչ Արման Բաբաջանյանի դարակազմիկ հայտարարությանը. «Այն, որ Եվրամիությունը Հայաստանի համար նախատեսում է 2,6 միլիարդ եվրոյի օժանդակության փաթեթ՝ դրամաշնորհ, վարկային և այլ մեխանիզմներ, խոսում է այն մասին, որ ԵՄ «պաշտպանական գիծն» այլևս անցնում է Հայաստանով»: Ենթադրաբար, «ԵՄ «պաշտպանական գիծ» ֆորտիֆիկացիոն համալիրը նախատեսված է պաշտպանելու Թուրքիային և Ադրբեջանին՝ Ռուսաստանի հնարավոր հարձակողական հարվածներից:
Բայց, կարծես, Շառլ Միշելը, Բենդերի նման մանրամասն չնկարագրեց Հայաստանի փայլուն ապագան, գուցե, Ալիևին «չխրտնեցնելու» համար: Հավանաբար, նա հաջորդ անգամ կվերծանի Արման Բաբաջանյանի նշած «պաշտպանական գիծն» այսպես. «Չէ որ «պաշտպանական գիծը» ստեղծելու նպատակով Եվրոպայի, ու ոչ միայն, այլև աշխարհի հզոր երկրների ղեկավարները, գործարար աշխարհի կարկառուն դեմքերը ժամանելու են Հայաստան: Հարյուր հազարավոր մարդիկ, հարուստ, ապահովված մարդիկ կձգտեն Հայաստան»:
1. Հայաստանի գետալճային տրանսպորտն այդ քանակի մարդկանց չի կարող փոխադրել: Հետևաբար, կկառուցվի Բրյուսել-Երևան արագընթաց երկաթուղային մայրուղին և նավահամգիստ Սևան լճում՝ օվկիանոսային նավերի համար:
2. Կկառուցվեն հյուրանոցներ և երկնաքերեր՝ հյուրերին տեղավորելու համար:
3. Գյուղատնտեսության վերելք՝ 500 կմ շառավղով՝ հյուրերին բանջարեղեն, միրգ, խավիար (արհեստական լճերում թառափից ստացվող), շոկոլադ մատակարարելու համար:
4. Կկառուցվի ԵՄ կառավարության պալատ-շենքը՝ «պաշտպանական գծի» կառուցման նկատմամբ շուրջօրյա վերահսկողություն իրականացնելու համար:
5. Երևանի ամբողջ տարածքում կկառուցվի ստորգետնյա կայանատեղի՝ հյուրերին սպասարկող ավտոտրանսպորտի համար:
6. Տիեզերք կարծակվեն կապի արհեստական արբանյակներ՝ «պաշտպանական գծի» կառուցման սենսացիոն արդյունքներն աշխարհին հայտնելու համար:
7. Այժմ, Բրյուսել-Երևան երկաթուղու մասին: Անտարակույս, այդպիսին չի կարող օժտված լինել այնպիսի թողունակությամբ, որպեսզի Հայաստան հասցնի բոլոր ցանկացողներին: Այստեղից, առաջանում է «Մեծ Հայաստան» օդանավատիեզերակայանի կառուցման անհրաժեշտություն. Տիեզերանավերի և օդանավերի կանոնավոր թռիչքներ աշխարհի և արեգակնային համակարգի բոլոր անկյուններ, ներառյալ՝ Լոս Անջելես, Գլենդել ու Սոչի, մեկ էլ Մելբուռն:
Նկատի ունենալով ԵՄ չինովնիկների զբոսաշրջագայությունների ծավալների աննախադեպ աճը, ինչպես նաև եվրոպական հարկատուների բողոքի բարձրացող ալիքը, ԵՄ կառավարությունը կտեղափոխվի Երևան, որն կհռչակվի ԵՄ-ի մայրաքաղաք:
Հ.Գ. «Հարևանս հոգիս հանեց, այ Բաբաջանյան ու Շիրինյան» հոդվածում գրել էի. «…ամեն առավոտ, մինչև ընտրությունների օրը, իմ հարևան Նորոն հոգիս հանում էր. «Բաբաջանյանը լավն ա, չէ՞»: Ընտրություններից հետո էլ Նորոն հանգիստ չէր տալիս ինձ. «Ինչի մի գործ չես ճարում Բաբաջանյանի համար, ախր լավ տղա ա»: Մի օր համբերությունս հատեց. «Նորո, ասացի, ես քո հարևանն եմ: Ամեն օր հանդիպում ենք, մեկ-մեկ էլ սիգարեթ ու գարեջուր եմ հյուրասիրում: Այդ ինչպես եղավ, որ պատգամավոր Բաբաջանյանին մի օր չդիմեցիր, որ քո հարազատ, գործազուրկ հարևանին մի գործի տեղավորի: Գիտես, թե Բաբաջանյանը հիմա ինչ մեծ գործի է. լծվել է «ԵՄ «պաշտպանական գծի» կառուցման գործին՝ 2.6 միլիարդ դոլարի»: Դրանից հետո էլ չենք հանդիպում:
Գագիկ Վարդանյան
Կարծիքներ