Գագիկ Բեգլարյանը հայհոյել է եւ սպառնացե՞լ կառուցապատողին

Օրերս «Կապիտալ պլյուս» ՍՊԸ-ի տնօրենը հաղորդում է ներկայացրել իրավապահներին, որ իրեն հայհոյել են եւ իր հասցեին սպառնալիքներ են հնչել։ Հնչեցնողը Երևանի նախկին քաղաքապետ, տրանսպորտի նախկին նախարար Գագիկ Բեգլարյանն է։ Իր հաղորդման մեջ ՍՊԸ տնօրենը (Տիգրան Գյուրջյան) հայտնել է, որ Ազատության պող․ 1/43 հասցեում իր ՍՊԸ-ն իրականացնում է 4 և 5 հարկանի բազմաբնակարան շենքերի շինարարություն, իսկ այդ հասցեի հարևանությամբ՝ փողոցի մյուս կողմում գտնվում է Գագիկ Բեգլարյանի առանձնատունը: 

Իրեն հրավիրել են Գ.Բեգլարյանի առանձնատան տարածք, որտեղ Բեգլարյանն անձամբ իրեն ասել է, որ կառուցվող շենքի 4-րդ հարկի բնակարանի տեսարանը բացվում է դեպի իր առանձնատան տարածք, որից հետո «իր և ընկերության մյուս համասեփականատիրոջ /ով բնակվում է ԱՄՆ-ում/ հասցեին հնչեցրել են տարբեր բնույթի հայհոյանքներ, կյանքին և առողջությանը վնաս հասցնելու սպառնալիքներ»։ Նա իրավապահներին խնդրել է քայլեր ձեռնարկել։ 

Գագիկ Բեգլարյանը չպատասխանեց մեր զանգերին, որպեսզի մեկնաբանություն վերցնենք նաեւ նրանից։ Հուսով ենք՝ հրապարակմանը կարձագանքի։

Արեգ Մարգարյան