Թող փորձեն կրակել, հետևանքները սպասեցնել չեն տա, հավաստիացնում եմ. Ղազինյան
Եթե Հայաստանում իրավակարգը վերականգնվի, ապա այս իշխանությունների կարկառուն ներկայացուցիչների նկատմամբ կարող է հարուցվել քրեական օրենսգրքի առնվազն 2 գլխի բոլոր հոդվածներով քրեական գործեր՝ պետական ծառայության դեմ հանցագործություններ եւ պետության դեմ հանցագործություններ: Նրանք գործել են այս հոդվածներով բոլոր հնարավոր զանցանքները: Այս մասին քիչ առաջ ընդդիմության հերթական երթի մեկնարկից առաջ ասաց «Մեկ Հայաստան» կուսակցության ղեկավար Արթուր Ղազինյանը։
«Իսկ որ ասում են՝ կկրակեն, թող փորձեն: Եթե այդքան համարձակ են, թող փորձեն: Ես հավաստիացնում եմ՝ հետեւանքները երկար սպասեցնել չեն տա»,- հավելեց նա։
«Ամբողջ իրավաբանական հանրույթը պնդում է, որ տեղի է ունեցել պետական դավաճանություն, ընդ որում կազմակերպված հանցավոր խմբի կողմից, որը սպառնում է Հայաստանի տարածքային ամբողջականության ու սահմանների անխախտելիությանը, իրավապահ համակարգը գործում է քաղաքական շահերի տիրույթում: Որոշումները կայացվում են քաղաքական նպատակահարմարությամբ, հետեւաբար մեր առաջնահերթ խնդիրը պետք է լինի իրավական համակարգը, դատախազական համակարգը հարկադրաբար քաղաքական տիրույթից վերադարձնել իրավական հարթություն եւ ստիպել գործել իրավունքի տիրույթում»,- պնդեց Ղազինյանը՝անդրադառնալով այս իշխանությունների դեմ պետական դավաճանության մասին իր կողմից հաղորդում ներկայացնելուն։
Կարծիքներ