Ինչո՞ւ Գյումրու քաղաքապետն աշխատանքի չի գնում․ քաղաքապետին փոխո՞ւմ են
![Ինչո՞ւ Գյումրու քաղաքապետն աշխատանքի չի գնում․ քաղաքապետին փոխո՞ւմ են](https://hraparak.am/uploads/images/2024/05/image_750x_664da36596ae9.jpg)
Տևական ժամանակ է՝ Գյումրու քաղաքապետ Վարդգես Սամսոնյանը խոշոր միջոցառումներին, քաղաքում տեղի ունեցող իրադարձություններին չի մասնակցում: Փոխարենն առաջին պլանում են «Բալասանյան դաշինք»-ով փոխքաղաքապետեր ընտրված Լուսինե Սանոյանն ու Սուրեն Ջանոյանը: Սանոյանը մշակութային միջոցառումներից է անպակաս, շարունակ հյուրեր է ընդունում, իսկ Ջանոյանը նախօրեին Գյումրիում տեղակայված սահմանապահ ջոկատի կազմավորման 100-ամյակին հատուկ ելույթով հանդես եկավ : Ուշագրավ է, որ այս ֆոնին ակտիվացել են խոսակցությունները, թե «Բալասանյան դաշինք»-ով քաղաքապետ ընտրված Վարդգես Սամսոնյանին հնարավոր է՝ շուտով փոխարինի փոխքաղաքապետերից մեկը, օրինակ, Լուսինե Սանոյանը, որը նախկին փոխքաղաքապետի դուստրն է, ավելին, նախկին քաղաքապետի՝ Սամվել Բալասանյանի քրոջ դուստրը:
Որքանո՞վ են լուրերն իրատեսական՝ hraparak.am-ը փորձեց ճշտել Բալասանյան դաշինքի ավագանու խմբակցության ղեկավար Տիգրան Հովհաննիսյանից: Արդյո՞ք դաշինքի ներսում քաղաքապետին փոխարինելու հարց քննարկվում է:
«Նման բան չկա, չի քննարկվում, չի էլ կարող քննարկվել, քաղաքապետը բուլետենի մեջ է, շուտով աշխատանքի կգա»,-մեր հարցմանն ի պատասխան՝ ասաց դաշինքի ղեկավարը:
Ի դեպ, մեր աղբյուրների փոխանցմամբ, Վարդգես Սամսոնյանը ջրծաղիկ է վարակվել եւ մոտ երկու շաբաթ է՝ մեկուսացած է:
Կարծիքներ