Մայրապետյանը կվերադառնա Հայաստան, երբ բուժումները կավարտվեն․ բժիշկները ժամկետ չեն նշել
«Սամվել Մայրապետյանը Հայաստան չի եկել։ Հետախուզումը շարունակվում է»։ Այս մասին «Հրապարակ»-ի հետ զրույցում ասաց խոշոր գործարար Սամվել Մայրապետյանի պաշտպաններից Կարեն Բատիկյանը։
Պաշտպանը նաեւ նշեց, որ վերջին մեկ ամսում կապ չի հաստատել Մայրապետյանի հետ, վերջինս տեղյակ է հետախուզման որոշումից, սակայն դա չեն քննարկել։
Հարցին, թե ցանկություն չունի՞ իր պաշտպանյալը վերադառնալու ՀՀ, նշեց․ «Ցանկություն ունի, բուժումը ավարտվեց, կվերադառնա։ Բժիշկները չեն ասել՝ բուժումը երբ կավարտվի»։
Նշենք, որ ՀՔԾ-ն հայտարարել էր, որ Մայրապետյանի նկատմամբ ընտրված խափանման միջոց անձնական երաշխավորությունը վերացվել է, և ՀՔԾ քննիչի կողմից միջնորդություն է ներկայացվել դատարան` Ս. Մայրապետյանի նկատմամբ կալանավորումը որպես խափանման միջոց ընտրելու համար:
Գործարարի համար անձնական երաշխավորություն են ներկայացրել և 15 միլիոն դրամ վճարել հայտնի նյարդավիրաբույժ, պրոֆեսոր Ռուբեն Ֆանարջյանը և Մայր Աթոռ Սուրբ Էջմիածնի տեղեկատվական համակարգի ղեկավար, Գարեգին Բ Վեհափառ Հայրապետի մամուլի խոսնակ տեր Վահրամ քահանա Մելիքյանը: Այն ժամանակ ՀՔԾ-ն երաշխավորներին հայտնել էր, որ իրենց պարտականությունները չկատարելը հանգեցնում է պատասխանատվության։
Մայրապետյանը մեղադրվում է 7 միլիոն դոլար կաշառք ստանալուն օժանդակելու մեջ:
Կարծիքներ