Հիվանդանոցում նիստ անցկացնելու վերաբերյալ միջնորդությունը չքննվեց, դատավորը բարձրաձայնեց գործից մաս անջատելու մասին
ԱԺ նախկին պատգամավոր Մանվել Գրիգորյանի պաշտպաններն այսօրվա դատական նիստում կրկին միջնորդեցին նրա խափանման միջոց կալանավորումը փոխել մինչեւ 5 միլիոն դրամ գրավով, եւ դատարանը՝ Մնացական Մարտիրոսյանի նախագահությամբ, հերթական անգամ մերժեց նույնաբովանդակ միջնորդությունը։
Հաջորդ միջնորդությունը պաշտպանական կողմը ներկայացրեց արտագնա նիստ անցկացնելու վերաբերյալ՝ «Նաիրի« ԲԿ-ում՝ հաշվի առնելով, որ Գրիգորյանն առողջական վիճակից ելնելով չի ներկայանում դատարան։ «Միջնորդում եմ, որպեսզի գնանք ու հենց հիվանդանոցում դատական նիստ անցկացնենք։ Անձը չի ներկայանում, որովհետև քայլելու, շնչառության հետ կապված խնդիրներ ունի»,- նշեց պաշտպան Լեւոն Բաղդասարյանը։
Նախագահող դատավոր Մնացական Մարտիրոսյանը, սակայն, հայտարարեց, որ դեռևս չեն ստացել Գրիգորյանի նկատմամբ նշանակված դատաբժշկական փորձաքննության արդյունքները, եւ տեղյակ չեն՝ անձը կարո՞ղ է մասնակցել նիստերին թե՞ ոչ․ դատարանը որոշեց միջնորդության քննությունը հետաձգել։
Այսօրվա նիստում Մնացական Մարտիրոսյանը բարձրաձայնեց գործից մաս անջատելու և գործը Նազիկ Ամիրյանի մասով առանձին քննելու մասին, սակայն դրա վերաբերյալ որևէ միջնորդություն չներկայացվեց։
Հիշեցնենք, որ Մանվել Գրիգորյանը մեղադրվում է 2016թ.-ի ապրիլյան քառօրյա պատերազմի և դրան հաջորդած օրերին Արցախի Հանրապետության սահմանների պաշտպանությունն իրականացնող զինվորականների և կամավորների կարիքները հոգալու նպատակով հատկացված գույքը յուրացնելու համար։
Նրա կինը՝ Նազիկ Ամիրյանը, մեղադրվում է Մանվել Գրիգորյանի որդու՝ Ա․ Գրիգորյանի և քննությամբ չպարզված այլ անձանց հետ նախնական համաձայնությամբ, ապօրինի կերպով հրազեն, ռազմամթերք, ակոսափող հրազենի փամփուշտներ, պայթուցիկ նյութեր ձեռք բերելու, փոխադրելու և իրենց պատկանող տներից մեկում պահելու համար։
Կարծիքներ