Մենք առավոտից երեկո օրենք ենք մշակում, որպեսզի այդ թաթիկները կտրվեն

Մենք առավոտից երեկո օրենք ենք մշակում, որպեսզի այդ թաթիկները կտրվեն

Երեկ Ազգային ժողովում Գեւորգ Պետրոսյանի ելույթից եւ խորհրդից հետո, որ «գողական բառի հետ էլի երեք տառով բաղկացած հասկացություն կա, լավ կլինի դրա դեմ էլ պայքարեք», բուռն արձագանքեց ԱԺ պատգամավոր Արման Բաբաջանյանը, ով կոչ արեց, որ ԲՀԿ-ի անունից ինչ-որ մեկը ներողություն խնդրի Պետրոսյանի «խայտառակ» պահվածքի համար, որից հետո սկսվեց «ռազբորկան», որն անգամ ձեռնամարտի վերածվեց:

Ուշագրավ է, որ քրեական բարքերի դեմ իբր պայքար տվող իշխանությունը, ի դեմս ԱԺ նախագահ Արարատ Միրզոյանի, կրքերը քաղաքակիրթ ճանապարհով հանդարտեցնելու փոխարեն ապավինեց այդ ենթամշակույթին հարազատ լեքսիկոնին՝ խորհուրդ տալով իրենց տիրապետել չկարողացող ԲՀԿ-ականներին «գնալ եւ լռվցնել իրենց շենքի բեսեդկաներում»: Խորհրդարանում ձեւավորված եւ հաստատուն քայլերով իր տեղն ամրապնդող այս «ռազբիրատի» մթնոլորտի վերաբերյալ զրուցեցինք նախկին ռեժիսոր, դերասան իմքայլական Արթուր Մանուկյանի հետ:

- Իշխանությունը մի կողմից պայքարում է քրեական ենթամշակույթի դեմ, մյուս կողմից տարիուկես է՝ նույն իշխանության կողմից այնպիսի արտահայտություններ ենք լսում, որոնք չենք կարող ակադեմիական լեզվամտածողության արդյունք համարել, ասենք՝ թաթիկները կտրել, ասֆալտին փռել, պատերին ծեփել եւ այլն կամ ԱԺ նախագահի՝ «բեսեդկում լռվցնելու» հորդորը: Չե՞ք կարծում, որ այս երկակի ստանդարտները կարող են ձեր ընդդիմադիր գործընկերների մոտ հարցեր առաջացնել, ինչն արեց Գեւորգ Պետրոսյանը:

- Գործ ունենք գողական մշակույթի, փողոցային մշակույթի եւ լեզվի հետ կապված խնդրի հետ, սրանք մշակութային առումով տարբեր ժանրեր են: Գողական մշակույթի մեջ կարող եք գտնել մարդիկ, որոնք ինձանից կիրթ կարող են խոսել: Այո, կար մի հեղինակություն, ով այնքան գիրք էր կարդացել, որ ես կյանքումս չգիտեմ՝ այդքան գիրք տեսե՞լ եմ, թե՞ ոչ: Ես կարդացել եմ այդ հեղինակության մասին, կարծեմ ռուս ազգությամբ օրենքով գող էր՝ Սաշա Բռիլյանտ: Նրանք մարդիկ են, ովքեր չեն ընդունում տվյալ պետությունը որպես իրենց պետություն, ստեղծում են ուրիշ օրենքներ, ապրելու իրենց կանոնները, առանձին պետություն են ստեղծել, որոնք չեն զուգահեռվում տվյալ պետության հետ, եւ դրա դեմ ենք մենք պայքարում: Մենք՝ հայերս, տարիներ շարունակ չենք ունեցել պետություն, եւ այդտեղից են գալիս մեր հակումներն այդ ենթամշակույթի հետ: Մարդը, որը պատգամավոր է, բայց արտահայտություն է անում գործ տալու մասին: Եղբայր, եթե ի վիճակի չեք հասկանալու, որ գործ տալիս է ցանկացած ՀՀ քաղաքացի, ով վճարում է հարկեր, ինքը դառնում է ոստիկանության գործատուն: Իսկ եթե մտածում են, որ օրենքն իրենց վրա էլ կարող է ծառայել, ուրեմն իրենք այդ ենթամշակույթի կրողն են:

- Վերադառնալով ընդհանուր մթնոլորտին, կարծում եք՝ իշխանությունը, որն ունի մեծ պատասխանատվություն, իր պահվածքով ձեւավորե՞լ է այնպիսի համերաշխության մթնոլորտ, որտեղ այդ տարրերն ինքնին տեղ չեն ունենա: Եթե 24-ժամյա ռեժիմով իշխանությունը խոստանում է բռնել, ցխել, խփել...

- Դա ընդամենը ժողովրդական, փողոցային լեզու է եւ փողոցայիններին հասկանալի լինելու լեզու: Ես երբեք թույլ չեմ տա ինձ ձեզ հետ անցնել մի լեքսիկոնի, որով կկանխեմ մեկ ուրիշին, ով ցանկանում է իմ աչքերը հանել, ու ես իրեն կասեմ, որ կջարդեմ մատներդ, կկտրեմ թաթիկներդ: 
Եթե ես տեսնեմ որեւիցե մեկին, ով կցանկանա իր ձեռքերով պղտորել մի տեղ, որը պետք չէ պղտորել, ես էլ իրեն հասկանալի լեզվով կարտահայտվեմ: Եթե դու քո թաթիկներով ուզում ես գողություն անել, ես կկտրեմ այդ թաթիկները: Մենք առավոտից երեկո օրենք ենք մշակում, որպեսզի այդ թաթիկները կտրվեն:

- Բայց դու պետք է իրեն բռնես գործով, նոր կտրես, հակառակ պարագայում դա կլինի զրպարտանք, բռնության քարոզ, ագրեսիայի տարածում, որն այսօրվա ելույթների տեսքով վերադառնալու է քեզ:

- Եթե այդպես է, ուրեմն պետության բոլոր օրենքները բռնության քարոզ են, որտեղ ասում են՝ եթե այս բանն արեցիր, 5 տարի ենք տալիս, եթե սա արեցիր՝ 10 տարի, 20 տարի, ցմահ:

- Օրենքը նախատեսվում է արդեն կատարված հանցագործությունների համար:

- Վարչապետն էլ ասում է՝ ով որ այդ սահմանը կանցնի, այ, այդպես կանենք: Քրեական օրենսգրքով էլ է ոստիկաններին պատվիրակված բռնել այդ սահմաններն անցնող մարդկանց թաթիկները:

- Բայց ո՛չ կտրել:

- Կտրել իրենց գործողությունները:

- Դուք ասում եք՝ իրենց հասկանալի լեզվով եք խոսել, խոսքն ԱԺ մեծությամբ երկրորդ ուժի մասին է, որին մոտ 100 հազար քաղաքացի է ձայն տվել: Կարծում եք, որ այդքան մարդ այդ ենթամշակույթի կրո՞ղն է, ինչպես ներկայացնում եք ԲՀԿ-ին:

- Իրանք՝ ԲՀԿ-ն, մի քիչ գողական են, մի քիչ քրեական են, մի քիչ փողոցային են, մի քիչ կիրթ են, մի քիչ կրթված են, ամեն ինչից մի քիչ, մի քիչ են, ո՛չ այս են, ո՛չ այն են: Աստվածաշնչում է, չէ՞, ասվում՝ կա՛մ տաք եղիր, կա՛մ սառը, գոլ որ եղար, կթքեմ բերանիցս: Եթե գողական եք, ասեք՝ գողական ենք, մենք էլ ձեզ կտանենք կնստեցնենք այնտեղ, որտեղ պետք է, հեսա օրենքն ընդունում ենք, կամ էլ պատգամավոր եք՝ ընտրեք ձեր ոճը, վարքագիծը, պահելաձեւը:

- Դուք չեք ընդունում, որ իշխանությունը եւ հատկապես ինքն ունի այստեղ մեղքի մեծ բաժին, պիտի իմանար, որ բացասական լիցքերը, սեւ-սպիտակի բաժանումը, ագրեսիայի տարածումը, անընդհատ ծեփելու, փռելու սպառնալիքները բումերանգի էֆեկտով վերադառնալու են մթնոլորտ:

- Իշխանությունն ունի խնդիր, դա այն է, որ հասարակությանը պետք է լսելի դարձնենք մեր կարծիքը, հասկացնենք այն, ինչ մենք ենք հասկացել... Չգիտեմ: Մենք պարտավոր ենք, որպես քաղաքակիրթ քրիստոնեական արժեքները կրող մարդիկ, ատել որոշակի դրսեւորումներ՝ գողություն, թալան, սպանություն, սուտ մատնություն, բամբասանք եւ այլն, եւ դրանց տեղափոխել սեւի դաշտ, այո, այն մարդը, ով սեւ մատնություն կտա, կաշառք կտա, ինձ համար սեւ ա:

- Չէ, իշխանությունն ասում է՝ ով մեզ հետ չէ, սեւ է:

- Ոչ, ես կարծում եմ, որ Ձեր կարծիքը չեմ կարող ընկալել իբրեւ սեւ, միգուցե ես ասում եմ՝ բաժակն այսպես պետք է դնել, դուք ասում եք, որ չէ… Բայց կա սահման, որից այն կողմ սեւ է: Լպիրշախոսությունն արդեն դարձել է սեւ, առաջ սեւ չէր, բայց հիմա գույներն այնքան խիտ են, որ սեւ է ընկալվում:

- Գեւորգ Պետրոսյանն ասում է, որ ինքն ունի խոսքի ազատություն, ինչպես որ վարչապետը, իշխանության մյուս ներկայացուցիչները, ովքեր իրենց թույլ են տալիս արտահայտվել ցանկացած բան:

- Վարչապետն իրեն հայհոյանք թույլ չի տվել: Ամբողջ օրվա ընթացքում ինձ ավելի շատ վրդովվեցրեց ոչ թե այն, որ Պետրոսյանը 3 տառանոց արտահայտությունն արեց, այլ այն, որ դրանից հետո բոլորին էշի տեղ դրեց՝ ժուռնալիստներին, հանրությանը, ինքն իրեն, ասում է՝ իսկ դուք ի՞նչ մտածեցիք այդ երեք տառանոց բառի տակ… Թեպետ, եթե փորձես դիմացինին էշի տեղ դնես, բայց ինքը քեզ բացահայտի, դու ես հայտնվում այդ վիճակում:

- Ասում են՝ ամեն իշխանություն արժանի է իր ընդդիմությանը:

- Ես կարծում եմ, որ թյուրիմացություն է տեղի ունեցել, որ ԲՀԿ-ն հայտնվել է ԱԺ-ում, մենք, հասարակությունն էլ է, չէ՞, սխալական, դա էլ մեր հանրության սխալներից մեկն է, որ բամփված կուսակցությունը՝ իր բամփված առաջնորդով, հայտնվել է ԱԺ-ում: Տղամարդկությունից են խոսում, բայց իրանք էդ բառի տակից դեռ դուրս չեն եկել, իրանք հավերժ մնալու են այդ բառի տակ, իրանք բամփված են: Այդ 100 հազարը երեւի չեն նկատել, որ իրենք բամփված են, չեն կանչել պատասխանատվության իրենց բամփողներին, ամբողջ աշխարհով ցույց տվեցին, անգամ տիեզերքում տեսան, որ իրենց բամփել են, նույնիսկ այլմոլորակայինները գիտեն, որ իրենք բամփված են: Կան հեքիաթներ, չէ՞, որ այծի ոտատեղից ջուր մի խմիր, այծ կդառնաս: Մարդիկ պիտի կարդան այդ հեքիաթները:

- Իրենք էլ ձեր մասին են ասում, որ 88 հոգիդ ԱԺ-ում եք միայն Նիկոլի շնորհիվ, եթե ձեր ցուցակում իր սելֆիի ձողը լիներ, դուխով գլխարկը, մեկ է՝ պատգամավոր էր դառնալու:

- Իրենք ճիշտ են ասում, Նիկոլ Փաշինյանի անձի եւ անհատականության դերը շատ-շատ մեծ է, եթե ինքը չլիներ, մեզանից ոչ մեկին ոչ ոք չէր ճանաչի: Բայց Նիկոլ Փաշինյանի կողքը կանգնողներն այն մարդիկ են, ովքեր այս ամբողջ տարիներին կանգնել են իր կողքին: Ես համարում եմ, որ ԱԺ-ն վիրավորված է, սա վերք է մեզ համար, իրենց ներկայությունը վերք է մեր ԱԺ-ում, մի խելամիտ մարդ չգտնվեց, որ վեր կենար ու ասեր՝ կներեք, մեր գործընկերը չափն անցավ, լավ չէր արթնացել, գիշերը չէր քնել կամ մթագնել էր: