Վճարովի ծննդաբերություն. ՌԴ-ում հիմա էլ թիրախավորել են միգրանտ կանանց

Ռուսաստանում կրկին թեժացել է միգրանտների համար անվճար բժշկական օգնության մասին բանավեճը։ 

Ապահովագրություն չունեցող օտարերկրացիների բուժման համար տարածաշրջանային բյուջեների ծախսերի աճի շուրջ դժգոհության ֆոնին Պետդուման քննարկում է միգրանտ կանանց համար վճարովի ծննդաբերության ներդրման հարցը։

Պետդումայի պատգամավոր Միխայիլ Մատվեևը URA.RU-ին ասել է, որ վերջին հինգ տարիների ընթացքում տարածաշրջաններն ավելի քան 66 միլիարդ ռուբլի են ծախսել օտարերկրացիներին շտապ բժշկական օգնություն ցուցաբերելու, այդ թվում՝ ծննդաբերության համար։ 

Ռուսաստանի օրենսդրությունը պարտավորեցնում է պետական ​​​​ծննդատներին օգնություն ցուցաբերել հղի կանանց՝ անկախ նրանից, թե նրանք ունեն պարտադիր բժշկական ապահովագրության պոլիս, թե՝ ոչ։

Պետդումայի պատգամավոր Սերգեյ Միրոնովը URA.RU-ի թղթակցի հետ զրույցում կողմ է արտահայտվել միգրանտ կանանց համար անվճար ծննդաբերության արգելքին, համարելով, որ դա կնվազեցնի առողջապահության և հարկ վճարողների բեռը։ 

2025 թվականի սեպտեմբերի 1-ից ուժի մեջ կմտնեն օտարերկրացիներին բժշկական օգնություն ցուցաբերելու նոր կանոնները։ Շտապ օգնությունը, այդ թվում՝ ծննդաբերությունը, կմնա անվճար, իսկ մյուս ծառայությունները կմատուցվեն միայն ապահովագրության դեպքում կամ վճարովի հիմունքներով։