Պուտինն է որոշել. Կրեմլն՝ Ասադի ճակատագրի մասին

Ռուսաստանի նախագահ Վլադիմիր Պուտինն է որոշում կայացրել քաղաքական ապաստան տրամադրել Սիրիայի նախագահ Բաշար ալ-Ասադին, հայտարարել է ՌԴ նախագահի մամուլի քարտուղար Դմիտրի Պեսկովը։

«Իհարկե, առանց պետության ղեկավարի՝ նման որոշումներ չեն կարող կայացվել։ Սա նրա որոշումն է»,- լրագրողներին ասել է Պեսկովը՝ մեկնաբանելով տեղեկությունը, որ Ասադը ժամանել է Մոսկվա, որտեղ նրան քաղաքական ապաստան են տվել։

«Մենք հիմա ոչինչ չունենք ձեզ ասելու պարոն Ասադի գտնվելու վայրի մասին», - ընդգծել է նա։ 

Կրեմլի խոսնակին հարցրել են նաև՝ արդյո՞ք Պուտինը նախատեսում է հանդիպել Ասադի հետ։ 
«Նախագահի պաշտոնական գրաֆիկում նման հանդիպում չկա»,- ասել է Պեսկովը:

Նրա խոսքով, Ռուսաստանի ռազմական ներկայությունը Խմեյմիմում և Տարտուսում «լուրջ խոսակցության» առարկա է Սիրիայի ապագա իշխանությունների հետ, քանի դեռ տրանսֆորմացիայի շրջանն է ընթանում, փոխանցում է ՌԲԿ-ն։

«Հիմա մենք ականատես ենք տրանսֆորմացիայի նման շրջանի, ծայրահեղ անկայունություն է։ Ուստի, իհարկե, ժամանակ կպահանջվի, և հետո լուրջ խոսակցություն կպահանջվի նրանց հետ, ովքեր կլինեն իշխանության մեջ»,- ասել է Պեսկովը: