Հուսով եմ՝ առաջադրված մեղադրանքը չի հիմնավորվի

Հուսով եմ՝ առաջադրված մեղադրանքը չի հիմնավորվի

ԲԴԽ նախագահի աշխատասենյակի կապարակնիքը հեռացվել է, եւ Գագիկ Ջհանգիրյանը բազմել է Ռուբեն Վարդազարյանի աշխատասենյակում։ Վարդազարյանին հատկացված Toyota Prado-ն էլ նրան է սպասարկում։ Աշխատասենյակը «վերցնելու» օպերացիան «օրենքի տառին համապատասխան» գլուխ բերելու համար Ջհանգիրյանը 7 անձից բաղկացած հանձնաժողով է կազմել, որոնց թվում է ԲԴԽ 2 անդամ՝ Գրիգոր Բեքմեզյանն ու Ստեփան Միքայելյանը։ Նրանք «քավոր են կանգնել» եւ պահանջվող ծառայությունը մատուցել Ջհանգիրյանին։

Ի դեպ, Գրիգոր Բեքմեզյանն այն 6 անդամներից է, որոնք կողմ են քվեարկել Ռուբեն Վարդազարյանի լիազորությունների կասեցմանը։ 

Նա մեզ հետ զրույցում այսպես մեկնաբանեց․ «Որեւէ կոտրում-մոտրում չի եղել, եղել է բանալի, սենյակը բացվել է, գույքագրում է կատարվել, տեսանկարահանվել է ամեն ինչ, հանձնաժողով է կազմված եղել»։

- Իրավաչա՞փ եք գնահատում Ջհանգիրյանի գործողությունները։

- Եթե ես դա գնահատեի ոչ իրավաչափ, չէի մասնակցի այդ գործընթացին։

- Բայց կապարակնքված էր աշխատասենյակը, ԲԴԽ նախագահի լիազորություններն առժամանակ կասեցված են, պարզապես ինչ-որ գործընթացի բերումով Ռուբեն Վարդազարյանը չի զբաղեցնում այդ պաշտոնը, բայց նրան ոչ ոք չի ազատել այդ պաշտոնից։

- Չի ազատել այդ պաշտոնից, իհարկե, ու շատ հավանական է, եւ հույս ունենք, որ պարոն Վարդազարյանը կվերադառնա եւ կշարունակի իր պարտականությունները կատարել։

- Դուք հույս ունեք, որ Վարդազարյանը կվերադառնա՞։

- Իհարկե, ես հույս ունեմ, որ պարոն Վարդազարյանին առաջադրված մեղադրանքը չի հիմնավորվի։

- Այդ դեպքում ինչո՞ւ եք մասնակցում այդ գործընթացին։

- Իսկ ի՞նչ գործընթաց է։

- Վարդազարյանի աշխատասենյակը Գագիկ Ջհանգիրյանի կողմից վերցնելու՝ ասենք, պաշտոնը զավթելու գործընթացին։

- Դուք կարող եք մեկնաբանել, ես չեմ ցանկանում մեկնաբանել, թե ինչ է տեղի ունեցել։ Ես գտնում եմ, որ եթե կա խորհրդի նախագահի պաշտոնակատար էս դեպքում, որն անհասկանալի է, թե դեռ որքան ժամանակ է իրականացնելու իր պարտականությունները, ենթադրում եմ, որ այդ նախագահն ընդունելու է նաեւ պատվիրակություններ, օգտվելու է հատուկ կապից, որը գտնվում է ԲԴԽ նախագահի աշխատասենյակում, եւ կարծում եմ, որ տրամաբանական է, որ նախագահի պաշտոնակատարը՝ լիազորություններն իրականացնողը, կարողանա ըստ պատշաճի ներկայացնել Բարձրագույն դատական խորհուրդն այլ մարմինների հետ հարաբերություններում։

- Տրամաբանական է, նաեւ բարոյական եւ օրինակա՞ն է այս ամենը։

- Եթե գտնեի, որ ոչ օրինական բան կար, չէի մասնակցի։ Մասնակցել եմ, որպեսզի ավելի օրինական լինի։

- Կարո՞ղ եք ասել՝ ո՞վ է կապարակնքել Ռուբեն Վարդազարյանի աշխատասենյակը։

- Վարդազարյանը՝ ինքը, եթե չեմ սխալվում։

- Իրավապահ մարմիններից մարդ չի՞ եղել այդ պահին։

- Ոչ, ի՞նչ կապ ունեն իրավապահ մարմինները դրա հետ։

- Ամեն դեպքում, նա իր աշխատասենյակն առժամանակ լքում է, եւ կապարակնքման տրամաբանությունն այն է, որ որեւէ մեկը չմտնի այնտեղ եւ ինչ-որ գործողություններ չիրականացնի։

- Հիմա, եթե ես գամ Ձեր խմբագրության դուռը կապարակնքեմ, նշանակում է՝ Դուք չպե՞տք է մտնեք այնտեղ։

- Եթե Դուք դրա իրավասությունն ունենաք՝ կապարակնքելու, այո, իսկ եթե Դուք դրա իրավասությունը չունեք․․․

- Դե, հիմա, արդյոք ԲԴԽ նախագահը, ում լիազորությունները կասեցված են, իրավունք ունի՞ իր սենյակը կապարակնքել։

- Իսկ ո՞վ է ճշտել՝ Վարդազարյանն ապօրինի՞ է կապարակնքել, թե՞ ոչ։

- Ես հարց եմ տալիս Ձեզ, ես չգիտեմ նման իրավանորմ, որ ինքն իրավունք ունի կապարակնքել իր աշխատասենյակը։

- Դուք ճշտե՞լ եք Վարդազարյանից կամ, օրինակ, Դատական դեպարտամենտի ղեկավարից, թե ինչ հիմքով եւ ում կողմից է կապարակնքվել աշխատասենյակը։

- Ես ամեն ինչ ճշտել եմ, ես ամեն ինչ գիտեմ, դրա համար գտել եմ, որ այդ գործընթացն իրավաչափ է։

- Այս գործընթացը մեկնաբանվեց այնպես, որ գործող իշխանությունների երազանքն էր՝ ազատվել Վարդազարյանից եւ նրա տեղը նստեցնել Գագիկ Ջհանգիրյանին, Ջհանգիրյանի նպատակն էլ Վարդազարյանի աշխատասենյակին եւ մեքենային տիրանալն էր։

- Ես դա դիտում եմ որպես քաղաքական մեկնաբանություն, որին չեմ ուզում որեւէ կերպ պատասխանել։

- Բայց Դուք այդ գործընթացին կամ մեկնաբանությանը նպաստել եք նաեւ Ձեր ձայնով, երբ քվեարկել եք Վարդազարյանի լիազորությունների կասեցման օգտին։

- Դա օրենքի պահանջն էր, որին ես հետեւել եմ։ Ես ասել եմ՝ ես միշտ գործում եմ միմիայն օրենքի պահանջներից ելնելով։

- Իսկ Ձեր գործընկեր այն 2 ԲԴԽ անդամները, որոնք դեմ են քվեարկել, օրենքի պահանջը չե՞ն կատարել։

- Իրենք օրենքն այլ կերպ են հասկացել, ես այլ կերպ եմ հասկացել եւ ես քվեարկել եմ այնպես, ինչպես ես եմ հասկանում։ 

- Այսինքն՝ օրենքը կարելի է տարբեր կե՞րպ ընկալել եւ մեկնաբանել։

- Ցավոք սրտի, ես պետք է արձանագրեմ, որ, այո, շատ հաճախ իրավաբանները տարբեր օրենսդրական կարգավորումները կարող են մեկնաբանել տարբեր կերպ։

- Այսինքն՝ ես կարո՞ղ եմ երթեւեկության մեջ կարմիր լույսի ազդանշանը մեկնաբանել որպես կանաչ եւ չենթարկվել կարմիրի պահանջին, իսկ մեկ ուրիշը դա ընկալի որպես կարմիր եւ կանգնի։ Ո՞ր մեկս ենք ճիշտ լինելու այդ դեպքում։

- Ես չասացի, որ բոլոր օրենսդրական ակտերը եւ ցանկացած իրավունքի նորմ կարելի է մեկնաբանել այնպես, ինչպես հասկանում են, բայց կան շատ իրավական ակտեր եւ հատկապես Դատական օրենսգիրքը, որն իսկապես պետք է ասեմ, որ ինչ-որ տեղ նաեւ թյուրիմացություն է՝ իր տարբեր հակասական հոդվածներով, որը պրակտիկայի ընթացքում բազմիցս բացահայտվել է, ցավոք սրտի, տալիս է նման հնարավորություն։

- Դուք այս գործընթացում քաղաքական ենթատեքստ չե՞ք տեսնում։

- Ես պարզ ասեմ, հա՞, ազնվորեն ասեմ։ Քանի որ ես քրեական գործի նյութերին, ապացույցներին եւ այլնին հիմնավոր ծանոթ չեմ, ես Ձեր հարցերին հիմա չեմ պատասխանի, որովհետեւ, եթե ես ասեմ՝ չեմ տեսնում, հետո պարզվի՝ ինչ-որ բան կա, կլինի, որ խաբել եմ։ Եթե տեսնում եմ, որ պարզվի՝ չկա, էլի կլինի, որ խաբել եմ։ Երբ տեսնեմ քրեական գործի նյութերը, եթե տեսնեմ եւ հասկանամ, որ իսկապես անհիմն մեղադրանք է առաջադրված, եւ դա առաջադրված է միմիայն մի նպատակով, որպեսզի կասեցվեն Վարդազարյանի լիազորությունները, հավատացեք, ես առաջին մարդկանցից մեկը կլինեմ, որ դրա մասին կբարձրաձայնեմ։

- Բայց համոզված եմ, որ Դուք ծանոթ եք այն ճնշումներին, այն քաղաքական հայտարարություններին, որ տեղի են ունենում Վարդազարյանի նկատմամբ իշխանության տարբեր մարմինների, այդ թվում՝ խորհրդարանի կողմից։

- Ես շատ ուշադիր հետեւում եմ բոլոր գործընթացներին, որ տեղի են ունենում ԲԴԽ-ի հետ կապված, բայց գնահատականներ չեմ տալիս, որովհետեւ ես իրավունք չունեմ հիմա որեւէ գնահատական տալ։