Կադիրովի 26-ամյա ազգականը փոխվարչապետ է նշանակվել
Չեչնիայի ղեկավար Ռամզան Կադիրովի ազգականը՝ 26-ամյա Խամզաթ Կադիրովը, նշանակվել է հանրապետության փոխվարչապետ և սեփականության ու հողային հարաբերությունների նախարար։
Այս մասին հայտարարել է Չեչնիայի ղեկավար Ռամզան Կադիրովը։
«Անցկացրել եմ կառավարության նիստը։ Նախարարների կաբինետի անդամներին ներկայացրել եմ Չեչնիայի Հանրապետության նոր փոխվարչապետ, սեփականության և հողային հարաբերությունների նախարար Խամզաթ Կադիրովին։
Խամզաթը տաղանդավոր ու գործադիր ղեկավար է։ Նա դա ապացուցեց պետական մարմիններում և տեղական ինքնակառավարման մարմիններում նախկին պաշտոններում բարձր արդյունքների հասնելով»,- գրել է Կադիրովը Telegram-ի իր ալիքում։
Նախկինում հանրապետության ղեկավարի զարմիկը տարբեր ժամանակներում զբաղեցրել է Կուրչալոևսկի մունիցիպալ շրջանի վարչակազմի ղեկավարի, Չեչնիայի Անվտանգության խորհրդի ղեկավարի, Չեչնիայի Հանրապետության ֆիզիկական կուլտուրայի և սպորտի նախարարի, հանրապետության քարտուղարության ղեկավարի պաշտոնները, ինչպես նաև ստացել է Ահմադ Կադիրովի շքանշան:
Կարծիքներ