Ո՛չ միգրանտներին. ցուցարարները փորձել են հրկիզել ևս մեկ հյուրանոց

Մեծ Բրիտանիայում ցուցարարները փորձել են հրկիզել ևս մեկ հյուրանոց, որտեղ ժամանակավորապես իջևանել են անօրինական ներգաղթյալները։
Այս մասին հայտնում է Sky News հեռուստաալիքը։

Ավելի վաղ ծայրահեղ աջ ակտիվիստների ամբոխը փորձել է հրկիզել Հարավային Յորքշիր նահանգի Ռոթերհեմ քաղաքում անօրինական միգրանտների տեղավորած հյուրանոցը։ Ցուցարարները կոտրել են ապակիները և մտել հյուրանոց։ 

Ըստ տեղեկությունների՝ նրանց հաջողվել է հրդեհել շենքը, միաժամանակ աղբամաններով փակել ելքերը, գրում է The Daily Telegraph-ը:

Ավելի ուշ ոստիկաններին հաջողվել է ակտիվիստներին հեռացնել հյուրանոցից և շրջափակել շենքը՝ հերթական հարձակումը կանխելու համար։ Ոստիկանության տվյալներով՝ տուժել է 10 իրավապահ, սակայն հյուրանոցի հյուրերը չեն տուժել։

Մեծ Բրիտանիայի տասնյակ քաղաքներում բողոքի մեծ ցույցերը շարունակվում են արդեն մի քանի օր։ Անկարգությունների պատճառ է դարձել Սաութպորտ քաղաքում տեղի ունեցած ողբերգությունը, որտեղ հուլիսի 29-ին 17-ամյա դեռահաս Ակսել Ռուդակուբանան դանակով հարձակում է գործել մանկական պարերի վարպետության դասի ժամանակ։ Հարձակման հետևանքով զոհվել է երեք աղջիկ, ևս ութ երեխա վիրավորվել է։ Բացի այդ, ծանր վնասվածքներ են ստացել յոգայի ուսուցիչը և այն տարածքի աշխատակիցը, որտեղ անցկացվել են պարապմունքները։ 

Հարձակվողը բերման է ենթարկվել: Ըստ The Times թերթի, Ռուդակուբանան էթնիկ ռուանդացի է, ում ընտանիքը փախել է Բրիտանիա՝ փրկվելու իրենց հայրենիքում ցեղասպանությունից: Այս ֆոնին ցուցարարները բրիտանական իշխանություններին կոչ են արել դադարեցնել անվերահսկելի ներգաղթը դեպի թագավորություն։