Իրավապահ մարմիններին մեր գործընկերոջը ոչ ոք չի հանձնել

ՀՔԾ-ն մեղադրանք առաջադրեց ԲԴԽ նախագահ Ռուբեն Վարդազարյանին՝ լիազորությունների չարաշահման, արդարադատությանը միջամտելու գործով։ Բարձրագույն դատական խորհուրդը 6 կողմ, 2 դեմ ձայնով կասեցրեց Ռ․ Վարդազարյանի լիազորությունները։ Կողմ քվեարկողներից մեկը Սերգեյ Չիչոյանն է, ում ոմանք սկզբունքային ու օբյեկտիվ դատավոր են համարում։ Չիչոյանը մեր հարցին՝ ինչո՞վ կբացատրի իր դիրքորոշումը, ասաց․ «Զուտ օրենքի պահանջներից ելնելով»։

- Սա քաղաքական ճնշում չէ՞։

- Բացարձակ նման խնդիր չի եղել։

- Բայց Դուք էլ եք տեսել, թե ինչ քաղաքական ճնշումներ են իրականացվում ԲԴԽ նախագահի նկատմամբ, հիմա նրան հանձնեցիք իրավապահ մարմիններին։

- Իրավապահ մարմիններին մեր գործընկերոջը ոչ ոք չի հանձնել, ընդամենը դեռ քննություն է գնում, ընդամենը կասեցվել են լրազորությունները։ Էստեղ 2 ինստիտուտ է գործում, ընդամենը գլխավոր դատախազի միջնորդության մեջ նշված է, որ իր գործառույթներից դուրս արարք է իբր կատարվել, եւ դրա համար ԲԴԽ-ի համաձայնությունը պետք չէր, ընդամենը օրենքի իմպերատիվ պահանջ է, ասում է՝ պետք է կասեցվի մինչեւ նախաքննության ավարտը։ 

- Այսինքն՝ ճի՞շտ էր նրա լիազորությունները կասեցնելը։

- Եթե նման միջնորդություն է եղել գլխավոր դատախազի կողմից, օրենքի պահանջն է։

- Չե՞ք կարծում, որ քաղաքական ենթատեքստ կա։

- Պարոն Վարդազարյանն իմ գործընկերն է, չգիտեմ՝ անկախ ամեն ինչից, ինքը կամ իմ գործընկերներն ինչ կարծիք կկազմեն, որեւէ քաղաքական խնդիր տեղի չի ունեցել։

- Սակայն իշխանությունները հասան իրենց նպատակին։

- Ես չեմ կարծում, որ իշխանությունը հասել է իր նպատակին։

- Բայց Ջհանգիրյանն այսօր փաստացի այդ աթոռն է արդեն զբաղեցնում։

- Ջհանգիրյանն ընդամենը ժամանակավոր պաշտոնակատար է, Ջհանգիրյանով չեն հարցերը լուծվում, Ջհանգիրյանն ընդամենը մի ձայն ունի, ոնց որ մնացած անդամները։

- Եթե Դուք Ձեր 1 ձայնն օգտագործեիք ու դեմ քվեարկեիք, Վարդազարյանի լիազորությունները չէին դադարի։

- Դուք նորից նույն հարցին եք անդրադառնում, էնտեղ հազար հարց է քննարկվում, էնպես չէ, որ Ջհանգիրյանի ձայնը որոշիչ է էդտեղ։

- ԲԴԽ այն անդամները, որոնք Ձեզ պես կողմ են քվարկել, կարծում եք՝ խղճին եւ արդարադատությանը դեմ չե՞ք գնացել։

- Խիղճը՝ մի կողմ, ընդամենը օրենքի պահանջն է պահպանվում էս պահին։

- Այսինքն՝ մյուս 2 դեմ քվեարկողներն օրենքի պահանջը չե՞ն պահել։

- Դա իմ կարծիքն է եղել, միգուցե իրենք ավելի ճիշտ դուրս գան ապագայում։

- Չե՞ք տեսնում իշխանության կողմից ԲԴԽ-ի նկատմամբ ճնշումներ, հրահանգներ։

- Եթե մամուլին հետեւում ենք, եթե ԱԺ-ում տեղի ունեցող գործընթացներին հետեւում ենք, ապա որոշակի ինչ-որ կա նման բան արտաքին տեսքով։ Բայց, ընդհանրապես, ներսում նման խնդիր ես էսքան ժամանակ չեմ տեսել, որ որեւէ մեկը ԲԴԽ անդամներից որեւէ մեկին ասի՝ էս հարցը, խնդրում եմ, էսպես լուծի։

- Բայց կոնկրետ Ռուբեն Վարդազարյանի նկատմամբ ակնհայտ է, չէ՞, որ կա քաղաքական ճնշում։

- Ես նման գնահատականներ չեմ կարող տալ եւ իրավունք էլ չունեմ նման գնահատականներ տալու։

- Պարզապես Դուք օբյեկտիվորեն ու քննադատաբար էիք արտահայտվում ԲԴԽ-ի նկատմամբ իրականացվող գործընթացների մասին։

- Ես միշտ եմ էդպես եղել ու շարունակելու եմ էդպես աշխատել։ Անկախ նրանից՝ էսօր թե՛ ընդդիմությունը, թե՛ իմ գործընկերները ոնց կմտածեն, ես էստեղ եմ ընդամենը իրավունքը պաշտպանելու, դատավորների շահերը պաշտպանելու համար։ Հիմա, թե ով ինչ է մտածում, ապագայում մարդիկ կհասկանան։ Ես կարծում եմ՝ արդարությունը կհաղթի, եւ եթե մեր գործընկեր Վարդազարյանը որեւէ խնդիր չի ունեցել օրենքի հետ, համոզված եմ, որ խնդիր չի ունենալու։ Ես երեք տարի է՝ էս խորհրդում եմ աշխատում, ու չի եղել մի դեպք, մի քվեարկություն կամ մի դատավորի պատասխանատվության ենթարկելու խնդիր, որ մի դատավոր կամ մի խորհրդի անդամ կարող է ասել, կամ կողքի օբյեկտիվ դիտորդն ասի՝ սուբյեկտիվ եմ եղել։ Հավատացած ասում եմ, որ բոլոր 10 անդամներից երեւի ամենամեղմ քվեարկողը ես եմ եղել՝ թե՛ պատասխանատվության, թե՛ մերժելու առումով։

- Մամուլում գրվեց, որ Ձեզ ինչ-որ բարձր պաշտոն են առաջարկել։

- Կարդացել եմ, ծիծաղս գալիս է։ Եթե ես էդ բարձր պաշտոնից ընդամենը կամավոր դիմում գրեցի-գնացի, որպեսզի ընտանիքիս հետ լինեմ, որովհետեւ մայրս միայնակ էր ապրում։ Ես 17 տարի իմ աշխատանքային գործունեության մեջ դրսերում եմ աշխատել։ Ես վերաքննիչ դատարանի դատավոր էի, նորմալ, ինձ շատ լավ էի զգում, դիմում եմ գրել, գնացել եմ կամավոր, որպեսզի առաջին ատյանում աշխատեմ։ Ասենք, դա ասելու բա՞ն է։ 

- Այսինքն՝ որեւէ մոտիվացիա չի՞ եղել։

- Ես էդ հարցը Ձեզ եմ տալիս, Դուք հավատո՞ւմ եք նման գրածի։

- Չգիտեմ, մեծ աշխարհ է, հատկապես քաղաքականության մեջ ամեն ինչ կարող է լինել։

- Դե, կարա ամեն ինչ էլ լինի, բայց չէ՝ չկա նման մոտիվացիա։ Ես ընդամենը էսօր առաջին ատյանի դատարանի դատավոր եմ։

- Բայց դատախազությունը սկզբում հայտարարում է, թե Վարդազարյանի արարքն իր գործառույթներից չի բխում, դրա համար չեն դիմել ԲԴԽ, հետո պարզվում է՝ քրգործը պաշտոնական դիրքի չարաշահման հոդվածով է։

- Չէ, չի պարզվել նման բան, մենք խորհրդում էլ ենք էդ խնդիրը քվեարկել, խորհրդի մեծամասնությունը, նույնիսկ դեմ քվեարկողները հասկացան, որ դա իր լիազորություններից չի բխել։ Էնտեղ մի քիչ նրբություն կա։ Հոդվածը, որի մասին խոսում է դատախազությունը, պաշտոնեական դիրքի չարաշահման մասին է խոսքը, նա որպես դատավոր կամ դատարան չի հանդես եկել։

- Որպես ի՞նչ է հանդես եկել։

- Որպես խորհրդի անդամ, խորհրդի նախագահ։ 

- Բայց պարզ տրամաբանություն է, մարդը ԲԴԽ նախագահ է, մեղադրանք է առաջադրվել պաշտոնեական դիրքի չարաշահման հոդվածով, դա իր գործառույթներից չի՞ բխում։ Դուք խորհրդով կարծում եք, որ ԲԴԽ նախագահի կարգավիճակում դատավորին զանգելն ու արդարադատությանը միջամտելն իր լիազորություններից չի՞ բխում։

- Այո։ Ամբողջ խորհուրդը քննարկման ժամանակ ընդունել է այդ փաստը, որ դա էդպես է։ Նա ընդամենը, ասենք, որպես դատարան պետք է հանդես գար՝ մեղադրանքի փուլում, խափանման միջոցի փուլում կամ քրեական գործի հարուցման ժամանակ, որ Գլխավոր դատախազությունն ստանար ԲԴԽ-ի համաձայնությունը։