Շարժումը կասեցրել է Արցախի հարցում հայկական կողմի նշաձող իջեցնելու պրոցեսը

Մենք ունենք շատ կարևոր ձեռքբերումներ, որ այս օրերին արձանագրել  է շարժումը։ Շարժումը կասեցրել է Արցախի հարցում հայկական կողմի  նշաձող իջեցնելու պրոցեսը։ Շարժումը ստեղծել է իրական քաղաքական ճգնաժամ, որի արդյունքում միջազգային գործընկերների համար ակնհայտ է դառնում Նիկոլ Փաշինյանի լեգիտիմության հարցը։ Այս մասին քիչ առաջ Ֆրանսիայի հրապարակում հրավիրած մամուլի ասուլիսի ժամանակ ասաց ՀՅԴ ԳՄ ներկայացուցիչ Իշխան Սաղաթելյանը։

«Շարժումը ապացուցել է, որ հայ ժողովուրդը չի ընդունելու իրենց պարտադրված որևէ զիջում։ Փաշինյանը չունի մանդատ երկիրը նոր զիջումների տանելու։ Շարժումը ակնհայտ է դարձրել, որ կա հանրային ձևակերպված պահանջ այս իշխանությունների հեռացման համար։ Այս շարժումը Հայաստանի վերջին 30 տարվա անկախության պատմության մեջ բացառիկ է իր ծավալներով, չափերով ու ժողովրդականությամբ։ Սա, ըստ էության, ղարաբաղյան երկրորդ շարժումն է։ Շարժման մաս են կազմում հանրության բոլոր շերտերի ներկայացուցիչները»,- հավելեց նա։