Եթե դատավորին զանգ լինում էր, ոչ ոք չէր իմանում, որտեղի՞ց է իմացել վարչապետը

Բարձրագույն դատական խորհրդի անդամ Սերգեյ Չիչոյանը կարծում է, որ արդարադատության նախարարությունը բողոք է ստացել, դրա համար է վարույթ հարուցել մի շարք դատավորների նկատմամբ, օրինակ՝ Ալեքսանդր Ազարյանի, Դավիթ Գրիգորյանի, օրերս էլ՝ մարզային մի դատավորի նկատմամբ։ Չիչոյանն այստեղ քաղաքական ենթատեքստ չի տեսնում, այդ թվում՝ Ռոբերտ Քոչարյանի գործը քննած դատավորներ Ալեքսանդր Նազարյանի ու Դավիթ Գրիգորյանի պարագայում։ «Իսկ ո՞վ ասաց, որ քաղաքական է, ԲԴԽ-ն նման հայտարարությո՞ւն է արել»,- զարմացավ Սերգեյ Չիչոյանը։

- Պարոն Չիչոյան, սոցցանցերում ու մամուլում արշավ է իրականացվում այն դատավորների նկատմամբ, որոնք հանրության մի հատվածի սրտից չբխող որոշումներ են կայացնում։ Այդ արշավը դատապարտել է ԲԴԽ նախագահը։ Դուք ի՞նչ կարող եք ասել այդ կապակցությամբ։

- Ցանկացած դեպքում դատական ակտ կայացնելիս երբեմն մի կողմը դժգոհ է լինում, եւ, բնականաբար, դժգոհ կողմը... էս օրով արդեն խոսքի ազատությունն ավելի մեծ է, մարդիկ սկսում են խոսել, իրենց դժգոհությունը հայտնել։ Իսկ օբյեկտիվ է, թե սուբյեկտիվ՝ դա այլ խնդիր է, դա արդեն պիտի վերադաս դատարանները գնահատական տան։ Եվ չեմ կարծում, որ ճիշտ է, երբ սոցցանցերում օրինական ուժի մեջ մտած դատական ակտերը սկսում են մեկնաբանել, քննադատել։

- Դա ինչի՞ արդյունք է, ինչո՞ւ նախկինում այդպես չէր, միայն խոսքի ազատությո՞ւնն էր, ըստ Ձեզ, խնդիրը, որ դատավորների հասցեին նման գնահատականներ չէին հնչում առաջ։

- Ես չեմ կարող էդ հարցին պատասխանել կամ միգուցե կարող եմ, բայց ավելի լավ է չպատասխանեմ, թե ինչի արդյունք է։

- Գուցե այսօրվա իրավիճակն ու քաղաքական մթնոլո՞րտն են թելադրում նման գնահատականները։

- Դե, մարդկանց հնարավորություն են տվել շատ խոսելու, խոսում են, ասում են, քննադատում են, բայց նաեւ էդ մարդկանց ժամանակ է պետք, համակարգ է փոխվել, պիտի մարդիկ հասկանան, որ տարիներ, ժամանակ կանցնի, կհասկանան, որ չի կարելի դատարանի՝ օրինական ուժի մեջ մտած դատական ակտերը քննադատել։ Միգուցե որոշ իրավաբանների սրտով չլինի, բայց դա չի նշանակում, որ հրապարակայնորեն պիտի քննադատվի։

- Այս օրերին թիրախավորել են նաեւ Սահմանադրական դատարանի որոշ դատավորների, նաեւ՝ իշխանությունների կողմից, ուզում են հեռացնել նրանց։ Դուք հետեւո՞ւմ եք այդ իրադարձություններին, ի՞նչ կարող եք ասել։

- Իհարկե, հետեւում եմ, բայց ես ի պաշտոնե կարծում եմ՝ իրավունք չունեմ կարծիք հայտնել մեկ այլ սահմանադրական մարմնի մասին։ Մեր համակարգից եթե հարցեր ունեք, տվեք։

- Ձեր համակարգի հետ կապված՝ Ռուբեն Վարդազարյանն ասում էր, որ կան դատավորներ, որոնք գուցե ծառայում են նախորդ իշխանություններին, կան դատավորներ, որոնք ծառայում են գործող իշխանություններին, եւ նրանցից պետք է ազատվել։ Դուք ճանաչո՞ւմ եք նման դատավորների, եւ ո՞րն է նրանցից ազատվելու ճանապարհը։

- Դատավորից ազատվելու ճանապարհը միայն կարգապահական վարույթն է։ Եթե դատավորը կարգապահական խախտում կամ ինչ-որ անօրինական արարք թույլ կտա, խորհուրդը դա կքննարկի։ Բայց դե՝ հիմա իշխանություններին ծառայում են, թե ինչ, Դուք հարցը տվեցիք՝ Ռուբեն Վարդազարյանին հղում անելով, բայց նրա ասածն էլ հարցականով էր, որ հնարավոր է՝ կան դատավորներ։ Բայց Ռուբեն Վարդազարյանը չի ասել՝ կան դատավորներ։ Իսկ եթե կան, նրանք ընթացքում ի հայտ կգան։ Չեմ կարծում, որ մեր համակարգում կան մարդիկ, որոնք ծառայում են այս կամ այն շահին կամ այս կամ այն իշխանությանը։

- Իշխանությունների կողմից հիմա ճնշումներ կա՞ն դատական համակարգի ու առանձին դատավորների նկատմամբ։

- Ես բավականին երկար եմ աշխատում էս համակարգում․ թե՛ նախկինում եւ թե՛ հիմա նման ճնշում ես երբեւիցե չեմ տեսել, չի եղել նման ճնշում։ Համենայնդեպս, եթե մարդիկ կան, որոնք ճնշման մեջ են եղել, ես չեմ տեսել։

- Իսկ կարգապահական վարույթները կարո՞ղ են ճնշման փորձ լինել հենց այդ դատավորներին հեռացնելու նպատակով։

- Ոչ, միանշանակ ոչ, որովհետեւ ես կարող եմ խոսել այն կարգապահական վարույթների մասին, որոնք ավարտվել են, եւ որոնց մասով արդեն ԲԴԽ-ն որոշում է կայացրել, այդ կարգապահական վարույթները բոլորը քննվել են, խախտումները, եթե կան, արձանագրվել են, էդ մարդիկ համապատասխան տույժեր են ստացել։ Եվ եթե տույժը ստացել են, չի կարող, չէ՞, մարդը տույժ ստանալ ու ոչինչ արած չլինել։ Որոշման բովանդակությանն էլ կարող եք ծանոթանալ եւ տեսնել՝ մարդիկ խախտում արե՞լ էին, թե՞ զուտ քաղաքական խնդիր էր։ Կամ՝ էդ տույժի ենթարկված դատավորներից ո՞ր մեկն է քաղաքական գործերով առնչվել, որ մի հատ էլ․․․ Բացի, ասենք, Ազարյանից, եթե Դուք քաղաքականացնում եք դա, իհարկե։ Իսկ Դավիթ Գրիգորյանի մասով էլ քննվել է այն ժամանակ՝ կեղծիքի հետ կապված, խորհուրդն այդ հարցը քննարկել է, ընդամենը մեղադրանք առաջադրելու թույլտվություն է տվել, եւ կարծեմ՝ կարճվել է այդ գործը։

- Ասացիք՝ ճնշումներ չեն եղել դատական համակարգի վրա ո՛չ առաջ, ո՛չ հիմա, այդ դեպքում ինչո՞ւ են գործող իշխանությունները վարչապետի մակարդակով պարբերաբար հայտարարում, որ դատական համակարգն անկախ չի եղել, Բաղրամյան 26-ից էին կառավարվում։

- Էդ հարցը, որ Դուք լսել եք պարոն վարչապետից, երեւի թե իրեն ուղղեք, ես տեղյակ չեմ նման խնդիրներից։

- Դե, ասում է՝ դատավորները Բաղրամյան 26-ից զանգ էին ստանում, զանգովի արդարադատություն կար, հիմա չկա, ասում էր՝ անկախ չեք եղել, նախկին իշխանություններին եք ծառայել։

- Համենայնդեպս, ես ոչ մի անգամ որեւէ տեղից զանգ չեմ ստացել։ Եթե զանգ լինում է, զանգի մասին ոչ ոք չի իմանում, չէ՞։ Ես, համենայնդեպս, չեմ լսել ու չեմ տեսել։

- Իսկ որտեղի՞ց գիտի այդ զանգերի մասին վարչապետը։

- Դուք իրեն հարցրեք, թե որտեղից գիտի, ես չեմ կարող ասել։