Քֆուրի «բազառ»՝ ԱԺ-ում
Ազգային ժողովում ԲՀԿ-ական պատգամավոր Գևորգ Պետրոսյանի՝ Ընտանեկան օրենսգրքում փոփոխություն և լրացում կատարելու հարցի քննարկումն անցավ իշխանություն-ընդդիմություն փոխադարձ վիրավորանքների մթնոլորտում: Վիճաբանություն եղավ ԱԺ նախագահ Արարատ Միրզոյանի և հիմնական զեկուցող Գևորգ Պետրոսյանի միջև:
Գևորգ Պետրոսյանն առաջարկում է օրենքով արգելել նույնասեռականների ամուսնությունը և արգելել նրանց երեխա որդեգրել:
«Միևնույն է, մերժվելու է, բայց պիտի ասեմ՝ հարգելի գործընկերներ, այս մի նախագիծն էլ վերաբերում է նույնասեռականների կողմից երեխա որդեգրելու արգելքին, այստեղ ի՞նչը պետք է ստուգենք, եթե ամուսնության ժամանակ կասկած կա, որ նույնասեռական է, մի բան կարելի է ստուգել, այստեղ ի՞նչը պետք է ստուգել»,- հարցրեց նա:
Պետրոսյանը հորդորեց կատակը մի կողմ դնել և արժեքները պահել: «Մենք նահապետական ժողովուրդ ենք, ամնենաավանդապաշտ ազգն ենք: Ի՞նչ է նշանակում՝ երկու համասեռամոլ երեխա որդեգրեն, էդ երեխան ի՞նչ է մեծանալու: Որ էսպես խոսում եմ, ասում եք՝ մուննաթով ես խոսում, բա ո՞նց խոսամ, ծափ տա՞մ էս թեմայով, ո՞վ ինձ կհասկանա, թող նախագիծը վերցնի, մեկ ուրիշը ներկայացնի: Լավ, ամուսնությանը կողմ եղաք, գոնե սրան դեմ եղեք: Չեմ ուզում վիրավորել ոչ մեկին, բայց հիմա ով դեմ է քվեարկելու, էդ մարդը կուզենա՞ր իր ընտանիքում նման երևույթ տեսնել»,- ասաց Պետրոսյանը:
Հայտարարությունը դուր չեկավ ԱԺ նախագահ Արարատ Միրզոյանին: Նա, դիմելով Պետրոսյանին, ասաց. «Ի՞նչ ես խոսում, էս ի՞նչ ես խոսում»:
Պետրոսյանն էլ հակադարձեց նրան. «Ինչ ես խոսում չէ` ինչ եք խոսում»:
«Պարո´ն Պետրոսյան, ի՞նչ եք խոսում, ասում է՝ դուք կուզանա՞ք ձեր ընտանիքում... էդ ի՞նչ անձնավորված բաներ են, մի հատ էլ քֆուր դնեիք քվեարկելու վրա»:
Միրզոյանի այս դիտարկման հետ համաձայն չէր Գևորգ Պետրոսյանը և նշեց, որ ոչ մեկի անունը չի տվել, որ անձնավորված չէ իր ասածը:
«Այս ձևն արդեն չափ ու սահման չունի: Հիմա մեկը կանգնի ասի՝ էս օրենքին ով որ դեմ քվեարկի, իր ընտանիքում սենց-նենց է: Այս հարցը պետք է կարգավորվի, սենց չի կարող մնալ»,- ասաց նա:
Հարցով հարակից զեկուցող` ԼՀԿ-ական պատգամավոր Տարոն Սիմոնյանը նշեց, որ հանձնաժողովը հարցին տվել է բացասական եզրակացություն, քանի որ օրենքն արդեն նման արգելք սահմանում է:
Ի վերջո, ԱԺ-ն չընդունեց օրենքի նախագիծը:
Կարծիքներ