Հանրաքվեն լավ առիթ է՝ մեկ անգամ ևս գյուղերով շրջելու

Շարունակում ենք զրուցել մարզպետների հետ՝ տեղեկանալու սահմանադրական հանրաքվեին ընդառաջ համայնքներում տիրող իրավիճակի եւ մարզպետների գործունեության մասին։ Մեր զրուցակիցը Տավուշի մարզպետ Հայկ Չոբանյանն է։ Նա վստահեցնում է՝ մարդիկ «պոզիտիվ» են տրամադրված հանրաքվեին։

- Պարզապես ուղերձների խնդիր կա։ Մարտի 2-ից, երբ կսկսվի քարոզարշավը, ավելի հստակ կլինեն այդ տրամադրությունները, կախված այն բանից, թե որքան մարդ կմասնակցի քարոզարշավին, ինչպիսին կլինեն հարցադրումները։ Հիմնական մասնակիցները պատգամավորներ են լինելու։ Ես չգիտեմ, թե որ փուլում արձակուրդ կվերցնեմ եւ կմասնակցեմ, բայց կարող եմ ասել, որ կա ցանկություն, ինքս էլ կուզեմ այցելել համայնքներ, տեսնեմ ժողովրդի տրամադրությունները։ Դա նաեւ լրացուցիչ հնարավորություն է՝ բոլոր գյուղերով մեկ անգամ եւս շրջելու, մարդկանց հետ զրուցելու։ Անկախ քարոզարշավի նպատակից՝  առիթ ենք ունենալու խոսել գյուղերում առկա խնդիրների եւ դրանց լուծումների մասին։ Ես լավ եմ զգում դրանից եւ նախընտրում եմ այդ ֆորմատը։ Եվ եթե նախորդ ընտրությունների ժամանակ նախընտրական շրջանի ամենակարեւոր բանը նշեմ, թե ինչն էր, ապա հենց այն էր, որ ես հնարավորություն ունեցա 40-ից ավելի գյուղերում լինել եւ առանձին-առանձին մարդկանց հետ զրուցել։

- Ձեզ ինչ-որ բան խանգարո՞ւմ է առանց քարոզարշավի շրջել գյուղերում։

- Ոչ մի բան չի խանգարում, ես անընդհատ այցելում եմ, ուղղակի սա լրացուցիչ հնարավորություն է՝ մեկ անգամ եւս այցելելու, այն էլ՝ մեր պատգամավոր գործընկերների հետ։

- Ձեր խոսքի սկզբում ասացիք՝ ուղերձների խնդիր կա։ Ինչպիսի՞ ուղերձներ պետք է, ըստ Ձեզ, տեղ հասցնեք, որպեսզի հանրաքվեն հաջողության հասնի։

- Դրամահավաքի ժամանակ վարչապետի, պարոն Պապիկյանի, ԱԺ նախագահի ելույթներում այդ ուղերձները հնչեցին, եւ ամեն ինչ կարծես թե պարզ է։ Բայց այնպես չէ, որ բոլորը դա լսել են, բոլորի համար դա լիարժեք պարզ է։ Այնուամենայնիվ, դա որոշակի պարզաբանում է պահանջում։ Երբ մենք խոսում ենք օրինականության ապահովման եւ օրենքի, օրինապաշտության գերազանցության մասին, երբեմն դա ձեւական բնույթ է կրում, եթե մենք մեր գործողություններում այդպիսին չենք։ Շատ դեպքերում մենք մեր գործողություններում չենք էլ զգում, որ այդպիսին չենք։ Հանրային տեսանկյունից եմ ասում։ Երբեմն լինում են իրադարձություններ, պահանջներ մարդկանց կողմից, որ առաջին հայացքից չեն մտածում, որ այդ պահանջն այդքան էլ օրինական չէ, ու ճիշտ չէ այդ պահանջը դնել։ Օրինակ՝ ամռանը անտառի հետ կապված խնդիր կար մեզ մոտ։ Մենք շատ ենք, չէ՞, խոսում, որ Հայաստանը պետք է լինի օրենքի գերակայության երկիր, բայց արդյոք մենք մեր վարքագծով պահո՞ւմ ենք այդ պահանջը՝ սկսած կենցաղային հարցերից, օրինակ՝ ինչպես ենք մենք մեր շրջապատը մաքուր պահում, վերջացրած՝ ամեն մեկս մեր վարքագծում ինչպես ենք նպաստում օրինականության գոյությանը։ Կարծում եմ՝ նմանատիպ թեմաներով հերթական զրույցները մեր բնակիչների հետ շատ կարեւոր մշակութային նշանակություն կարող են ունենալ։

- Բայց կարծես թե շատերը ձեզ՝ իշխանությանն են մեղադրում, ի դեմս հանրաքվեի, անօրինական գործընթաց իրականացնելու հարցում։ Մասնագետներից ձեւավորված «ոչ»-ի ճակատից  մանրամասն ներկայացնում են, թե ինչպես եւ որտեղ են օրենքն ու Սահմանադրությունը խախտվում։

- Չմտնելով իրավական մեկնաբանությունների մեջ` կարեւոր պնդում կա այս թեմայում, ամենահիմնարար կամարտահայտությունը դա ժողովրդինն է, եթե մենք այստեղ չխոսեինք հանրաքվեի մասին, այլ որեւէ պետական մարմնում կայացրած որոշման մասին, այո, գուցե Ձեր պնդումը թեմա լիներ քննարկման համար։ Մինչդեռ Ձեր դիտարկումը դառնում է առոչինչ, քանի որ ժողովուրդը թող որոշի։

- Օրինակ, հանրաքվե չարեցիք, երբ կառավարության անդամները՝ նախարարներ, վարչապետ եւ այլք, անխնա օգտվում են բյուջեից՝ հազարավոր դոլարների պարգեւավճարներ են ստանում, առանց օրենքը փոխելու՝ աշխատավարձերն են եռապատկել։ 

- Օրենքով սահմանված կարգով կառավարությանը տրված է հնարավորություն՝ որոշելու որեւէ ինստիտուտի աշխատավարձ, սա չի նշանակում, որ ամեն ինչ մեր երկրում պետք է հանրաքվեով որոշեն։ Եվ, այո, եթե կա բանավեճ, մենք հանրաքվեով լուծում ենք այդ բանավեճը։

- Խնդիրն այն է, որ այս «բանավեճն» իշխանությունն է ստեղծել, իսկ աշխատավարձերն էլ կառավարությունը չի որոշում կոնկրետ այս դեպքում, բայց ինչեւէ, ասացեք խնդրեմ՝ ի՞նչ է փոխելու ապրիլի 5-ի հանրաքվեն ժողովրդի կյանքում։

- Ժողովուրդը պետք է որոշում կայացնի առ այն, որ մեր երկրում ցանկացած գործընթաց եւ այդ գործընթացն ապահովող ինստիտուտները պետք է համապատասխանեն ՀՀ Սահմանադրությանը, օրենսդրությանը եւ դրանցով հռչակված սկզբունքներին, եւ որեւէ մեկի անձնական գերակայությունը չպիտի լինի։ Քանի որ ՍԴ անդամների գործունեությունը շարունակելու հետ կապված կա բանավեճ, դրա լուծման լավագույն ճանապարհը հանրաքվեն է։ Խնդիրն այստեղ նախկինները չեն, ՍԴ-ն ուղղակիորեն առնչվում է հենց ժողովրդին, դատական ոլորտին, բոլոր իրավակարգավորման մեխանիզմները հասնում են ՍԴ։ Մեր կյանքում բազմաթիվ փոփոխություններ կան կատարվելու, որը չի կարող լինել առանց ժողովրդական ակտիվ մասնակցության, այսօր եւս ժողովուրդը պրոակտիվ է, եւ հանրաքվեի օրը կունենանք դրա գնահատականը։

- Տավուշը վարչապետի հայրենի մարզն է, կարծում եք՝  հանրաքվեի արդյունքներն այստեղ էականորեն կտարբերվե՞ն մյուս մարզերի արդյունքներից։

- Համոզված եմ, որ Տավուշի ժողովուրդը շատ ակտիվ է մասնակցելու, իսկ տարբերվող թվերի մասին չեմ կարող խոսել։

- Իջեւանում «անտառային պատերազմը» կարծես թե իր հետքը թողել է իշխանության վարկանիշի վրա, ասում են՝ այդ պատճառով են այդքան հետաձգում Իջեւանի քաղաքապետի ընտրությունները։

 - Անտառային պատերազմը, ինչպես Դուք եք նշում, ՀՀ-ում օրինականության ապահովման եւս մեկ քայլ էր՝ հաստատակամ, վճռական քայլ էր, որից իշխանության վարկանիշը միայն բարձրացավ։