Հին հունական առասպելական թեւավոր նժույգը եւ Նիկոլը
«Հրապարակի» նախորդ հոդվածներից մեկում ներկայացրել էի նիկոլական «ուսապարկերի» միջոցով Նիկոլին պաշտոնից հեռացնելու տարբերակը, ինչը, համաձայն եմ, թվում է անհնարին, սակայն ֆանտաստիկայի ոլորտից չէ: Այսօր ուզում եմ խոսել մեկ այլ տարբերակի մասին, որ գրելու ընթացքում դեռեւս թվում է ֆանտաստիկայի ոլորտից, սակայն փողոցային շարժման հզորացմանը զուգընթաց կարող է վերածվել իրականության: Խոսքն իրավապահների միջոցով ՀՀ վարչապետի պաշտոնը զբաղեցնող անձին քրեական պատասխանատվության ենթարկելու հնարավորության մասին է: Այո, հենց քրեական պատասխանատվության, եւ դրա համար հիմք կարող է ծառայել ս. թ. մայիսի 5-ին YouTube-ում հայտնված «Նիկոլ Փաշինյանը հաստատում է Նաիրի Հոխիկյանի բոլոր պատմածները» խորագրով եւ շուրջ 8 րոպեանոց տեսահոլովակը։
Տվյալ հաղորդման մեջ օգտագործվել են համացանցից վերցված՝ լրագրող եւ մեդիա փորձագետ Հոխիկյանի եւ վարչապետ Փաշինյանի մի շարք ասույթներ եւ դրվել կողք-կողքի: Նույնիսկ իրավաբան չլինելով՝ կարող եմ առանց կասկածի նշույլի ենթադրել, որ իրական ժողովրդավարական երկրում դա բավարար կլիներ, որպեսզի դատախազությունը քննչական որեւէ մարմնի հանձնարարեր համապատասխան նյութեր նախապատրաստել եւ քրեական գործ հարուցել: Ի դեպ, դա, առանց սպասելու դատախազության հանձնարարությանը, կարող էր ինքնուրույն իրականացնել տվյալ երկրի Ազգային անվտանգության ծառայությունը, եւ անվտանգության ծառայությանն այդ հարցում մեծապես կնպաստեր Փաշինյանի ինքնախոստովանությունը, որ ինքը կատարել է ընտրություն, պարտվել դրանում եւ, ըստ այդմ, կրում է ողջ պատասխանատվությունը: Եվ ինքը «կկանգնի ժողովրդի դատաստ… դատի առաջ եւ անմռունչ կընդունի ժողովրդի կատարած դատավճիռը»: Սակայն քանի որ մենք ապրում ենք ոչ թե քարի դարում, այլ 21-րդ դարում, ապա դատուդատաստանը պետք է կատարի ոչ թե ժողովուրդը, այլ համապատասխան պետական կառույցները: Որոնք հենց ստեղծված են այդ նպատակի համար:
Բայց քանի որ մենք ապրում ենք ոչ թե իրական ժողովրդավարական, այլ «ժողովրդավարության բաստիոն» կամ էլ «ժողովրդավարության փայլուն աստղ» հորջորջված երկրում, ապա նման բան երեւակայելը խելքից դուրս բան կլիներ: Եվ այսօր, ի հաստատումն ասվածի, հայաստանյան ԱԱԾ-ն դեռեւս շարունակում է ծառայել ոչ թե Հայաստանի Հանրապետությանը, այլ անգրագետ ու հայրենիքի զգացողությունից զուրկ հայաստանյան ընտրողներին մանիպուլացնելու միջոցով եւ ոստիկանության անհարկի միջամտությունների շնորհիվ վարչապետ վերընտրված անձին: Եվ նրա հանձնարարությամբ լրտեսում է ընդդիմադիր հասարակական-քաղաքական գործիչներին՝ նրանց հեռախոսներում «SMS» (կարճ) հաղորդագրությունների միջոցով ներբեռնելով հեռախոսային գաղտնալսումների իսրայելական «Pegasus» («Պեգասուս») ծրագիրը: Դրա միջոցով հեռախոսը վերածվում է տեսագրող, ձայնագրող եւ ինֆորմացիա փոխանցող սարքի: Յուրաքանչյուր ներբեռնման համար իսրայելական ընկերությանը պետբյուջեից վճարվել է 10-12 հազարական դոլար, եւ քանի որ ծրագիրը ներբեռնվել է ավելի քան 80 հեռախոսում, ապա դրա «շնորհիվ» պետությանն արդեն հասցվել է ավելի քան 1 մլն ԱՄՆ դոլարի վնաս: Եվ, որքան հասկանում եմ, վնասը միտում ունի ավելանալու:
Հակաժողովրդավարական նման երեւույթի առկայության պայմաններում ի՞նչ հույսով ես գրում YouTube-յան հաղորդման մասին՝ կհարցնի ընթերցողը: Պատասխանեմ՝ այո, իրավապահ համակարգից եւ հատկապես ԱԱԾ-ից Փաշինյան Նիկոլի նկատմամբ քրեական գործ հարուցել պահանջելն աներեւակայելի, խելքից դուրս բան կլիներ սովորական պայմաններում: Բայց արդեն բավական ժամանակ է, ինչ մեր երկրում տեղի են ունենում զարգացումներ, որոնք կարող են գլխիվայր շրջել ամեն ինչ: Ավելի ճիշտ՝ գլխիվայր շրջված ամեն ինչ վերադարձնել իր բնական դիրքին: Այդ դեպքում անվտանգության ծառայության կողմից սեփական նախաձեռնությամբ քրեական գործ հարուցելն էլ կլինի խիստ բնական: Իսկ տեսահոլովակը բավարար հիմք է, որպեսզի նյութեր նախապատրաստվեն, որոնց կգումարվեն հանցագործության մասին բազմաթիվ այլ հաղորդումներ, որ կուտակվել են, օրինակ, դատախազությունում: Հա, չմոռանամ հուշել, որ տվյալ քրեական գործի շրջանակում Երեւան պետք է կանչվի եւ որպես վկա հարցաքննվի Ուկրաինայում ՀՀ դեսպան Վլադիմիր Կարապետյանը՝ որպես խիստ կարեւոր տեղեկատվությանը տիրապետող անձ:
Կարծիքներ