Վերմիշյանի գործով մեղադրյալները գրավի դիմաց ազատ են արձակվել

Քաղաքաշինության կոմիտեի նախագահ Վահագն Վերմիշյանին կաշառք տալու մեջ մեղադրվող «Երեւանշին» ընկերության խորհրդի նախագահ Վազգեն Պողոսյանը ապրիլի 1-ին 3 միլիոն դրամ գրավի դիմաց ազատ է արձակվել։ Այս մասին «Հրապարակ»-ի հետ զրույցում ասաց նրա պաշտպան Գագիկ Խաչիկյանը։

Պաշտպանի խոսքով՝ նախաքննական մարմինը կալանքի ժամկետը երկարացնելու միջնորդություն է ներկայացրել դատարան, սակայն առաջին ատյանի դատարանի դատավոր Վահե Միսակյանի որոշմամբ՝ կիրառել է գրավ։

Նա նաեւ նշեց, որ իր պաշտպանյալը շարունակում է չընդունել իրեն առաջադրված մեղադրանքը․ «Այն պարզ պատճառով, որ մեղադրանքը հիմնավոր չէ։ Վահագն Վերմիշյանի հետ առերեսում չի եղել, ըստ էության՝ քննչական գործողություններ չեն կատարվել»։

Մենք նաեւ տեղեկացանք, որ գրավ է կիրառվել նաեւ գործով անցնող Շինարարների միության նախագահ Գագիկ Գալստյանի նկատմամբ։

Նշենք, որ օրերս Վահագն Վերմիշյանի կալանքի ժամկետը երկարաձգվել է։

Հիշեցնենք, որ Քաղաքաշինության կոմիտեի նախագահ Վահագն Վերմիշյանը ձերբակալվել է փետրվարի 5-ին, ապա կալանավորվել է։

ԱԱԾ-ն տվյալներ էր ստացել, որ նա շինարակական աշխատանքներ ծավալող անձանց կամ կառուցապատող ընկերությունների ներկայացուցիչների հետ ձեռք է բերել պայմանավորվածություններ և ինչպես անձամբ, այնպես էլ մտերիմի միջոցով 5 դեպքով խոշոր և առանձնապես խոշոր՝ 1-2.5 մլն ՀՀ դրամի չափով կաշառք է ստացել։ Դրա դիմաց Վերմիշյանը 2019թ. ընթացքում նրանց օգտին կատարել է գործողություններ կամ նպաստել է ցանկալի որոշումների արագ կայացմանը և տրամադրմանը:

Բացի այդ, ՀՀ քաղաքաշինության կոմիտեի նախագահը 2019թ. հոկտեմբերի 23-ին իր աշխատասենյակում տեղի ունեցած հանդիպման ժամանակ պայմանավորվածություն է ձեռք բերել մի քանի շինարարական ընկերությունների սեփականատիրոջը Հայաստանի վաստակավոր շինարարի կոչման ներկայացնելու համար։ Դրա դիմաց նա որպես կաշառք է ստացել 2.379.950 դրամին համարժեք 5000 ԱՄՆ դոլար գումար և շուրջ 2.300.000 ՀՀ դրամին համարժեք շինանյութ։
Նրան մեղադրանք է առաջադրվել առանձնապես խոշոր չափի կաշառք ստանալու համար։