Ռուսաստանով մեկ մարդիկ ուզում են վերադառնալ, բայց մնում են ճանապարհներին
Երեկ առավոտից Մոսկվայի «Դոմոդեդովո» օդանավակայանում մոտ երկու տասնյակ ՀՀ քաղաքացիներ էին հավաքվել, որոնք չէին կարողանում վերադառնալ Հայաստան: Ինչպես արդեն հաղորդել է ԱԳՆ-ն, ՌԴ-ում ՀՀ դեսպան Վարդան Տողանյանը և դեսպանատան աշխատակիցներն անընդհատ կապի մեջ են նրանց հետ, այցելում են «Դոմոդեդովո», խոսում են մարդկանց հետ, սնունդ և առաջին անհրաժեշտության իրեր ու նյութեր են բաժանում օդանավակայանում մնացածներին:
«Իհարկե, մենք շնորհակալ ենք, բայց մենք սպասում ենք, որ ինքնաթիռ լինի, խոստացել են, որ կլինի, իսկ քանի դեռ ինքնաթիռ չկա, մեր վիճակն անորոշ է», - ասաց մեր հայրենակիցը:
Օրվա վերջում ԱԳՆ-ն հայտնեց, որ ՌԴ֊ում ՀՀ Դեսպանության տվյալներով՝ օդանավակայանում գտնվում էին մոտ 25 ՀՀ քաղաքացիներ, որոնցից 18-ին, իրենց ցանկությանն ընդառաջ, ՀՀ դեսպանությունն ապահովել է կեցություն օդանավակայանի մոտակայքում գտնվող հյուրանոցներից մեկում»։ Երբ կլինի ինքնաթիռ և արդյոք կառավարությունը բանակցո՞ւմ է այս ուղղությամբ, չի հաղորդվում:
«Դոմոդեդովոն» իրականում այս օրերին Հայաստան վերադառնալ ցանկացող մեր հայրենակիցների չարչարանքների մի դրվագն է, որի մասին չէր խոսվի, եթե չլիներ չվերթի ուղևորների տարածած տեսանյութը: Շատ ավելի վատ վիճակում են նրանք, ովքեր ցամաքային ճանապարհներին են մնացել: Երեկ ԱԳՆ-ն հայտարարեց, որ Ռուսաստանից Հայաստան վերադառնալու համար մեր քաղաքացիները չեն կարող օգտվել ցամաքային ճանապարհից: Մարտի 18-ից այդ ճանապարհը փակ է: Վերին Լարսով, ինչպես հաղորդում է ԱԳՆ-ն, կարող են անցել միայն բեռնատարները: Փաստորեն, ինքնաթիռներ չեն թռչում, ցամաքային ճանապարհը փակ է։ Ռուսաստանով մեկ մարդիկ չեն կարողանում տուն դառնալ: Հայկական համարներով մեքենաների տերերը կարող են դրանք թողնել ու մեկնել ինքնաթիռներով, որոնք կլինեն կամ չեն լինի, կամ էլ կարող են մեքենաների մեջ սպասել, մինչև որ Լարսը բացվի: Այլ լուծում կառավարությունն իր քաղաքացիներին, փաստորեն, չի առաջարկում:
Կարծիքներ