Փաշինյանին պետք չեն սովորական ոստիկաններ, նրան պետք են ենիչերիներ

Փաշինյանին պետք չեն սովորական ոստիկաններ, նրան պետք են ենիչերիներ

Ադրբեջանական լրատվամիջոցները տեղեկացնում են, որ այդ երկրում ընթանում են օպերատիվ ստորաբաժանումների (կոմանդոսներ) տակտիկական-հատուկ զորավարժություններ։ Զորավարժությունների սցենարով կոմանդոսները շրջապատում են պայմանական հակառակորդի դիվերսիոն խումբը, որը փորձել է սադրանք իրականացնել, այնուհետեւ իրականացնում են վնասազերծման առաջադրանքը։ Հայաստանում վաղուց զորավարժություններ չեն իրականացնում, Հայաստանը չի մասնակցում միջազգային զորավարժություններին, որովհետեւ  արտաքին թշնամի չունի եւ չի շեղվում խաղաղության օրակարգից: Բայց Հայաստանի իշխանությունը բռնազավթած խունտան ունի ներքին թշնամի` հայ ժողովուրդը, որի դեմ պայքարն իրականացվում է ամենօրյա ռեժիմով: Այդ պայքարին միշտ պատրաստ լինելու համար անցկացվում են ոստիկանական ուժերի զորավարժություններ, իրական պայմաններում:

Նախօրեին ոստիկանական ուժերը հարձակվել էին պաշտպանության նախարարության նախկին շենքում ապրող բնակիչների վրա՝ նրանց այդ շենքից վտարելու համար: Իշխանությունների պնդմամբ՝ նրանք այնտեղ բնակվում են ապօրինաբար: Ոստիկանական ուժերը հանձնարարություն էին ստացել՝ տարհանել բնակիչներին, անկախ այն փաստից, որ այնտեղ ապրում են մանկահասակ երեխաներ, հաշմանդամներ, ծերեր եւ կանայք: Այս հատուկ գործողությունն ունի ինչպես պրակտիկ, այնպես էլ վարժական նշանակություն: Պրակտիկ նշանակությունը պարզ է. ազատել պաշտպանության նախարարության նախկին շենքն իր ներկա բնակիչներից, առանց հոգալու նրանց համարժեք կացության պայմաններ ապահովելու մասին: Ընդ որում, այդ շենքը տարիներ շարունակ ոչ մեկին պետք չէր եւ մեր աչքի առաջ քանդվում էր: Դրա մասին հիշեցին, երբ այնտեղ բնակություն հաստատեցին մարդիկ, որոնք բնակության այլ վայր չունեն, սոցիալապես անապահով են եւ վտարվելու դեպքում ձմռան սառնամանիքին մնալու են փողոցում: Նրանցից շատերը կարող են ցրտահարվել եւ մեռնել, բայց իշխանությանը դա չի մտահոգում: Հայաստանի Սահմանադրությամբ ՀՀ-ն սոցիալական պետություն է, որը պարտավորություն ունի՝ ապահովել քաղաքացիների նվազագույն սոցիալական կարիքները: Հայաստանի գործող իշխանությունը վաղուց արդեն ցույց է տվել, որ գործող Սահմանադրությունն իր համար գոյություն չունի, սկսած բռնի եւ հակասահմանադրական իշխանազավթման օրվանից: Փաշինյանը, որ երեսպաշտորեն բողոքում է, թե Ադրբեջանը, դադարեցնելով Արցախի գազամատակարարումը, հումանիտար աղետ է ստեղծում արցախցիների համար, դադարեցնում է առանձին շենքի էներգամատակարարում եւ նրա բնակիչների նկատմամբ բռնի ուժ կիրառելով՝ դուրս շպրտում փողոց: Ինչո՞վ սա հումանիտար աղետ չէ:

Բայց ոստիկանական այս գործողությունը, բացի պրակտիկ նշանակությունից, ունի նաեւ վարժական նպատակ, եւ այն գուցե ամենակարեւորն է: Փաշինյանին պետք են անվերապահ վստահելի ոստիկանական ուժեր, պետք են այնպիսի ոստիկաններ, ովքեր չունեն խղճի խայթ, մարդկային կարեկցանքի, բարոյական որեւէ այլ կարգի արժեքներ: Ոստիկանական շարքերը տատանվողներից, մարդկային թուլություններ ունեցողներից մաքրելու միակ հուսալի միջոցը նման պրակտիկ վարժական միջոցառումների իրականացումն է: Ոստիկաններին հանձնարարվում է ասֆալտի ու բետոնի վրա քարշ տալ զոհվածների ծնողներին եւ հարազատներին, ծեծի ենթարկել կանանց ու տղամարդկանց, հետո նրանց հանձնարարվում է իրենց տներից դուրս հանել հաշմանդամներին ու երեխաներին, հղի կանանց ու ծերերին: Բնական է, որ այդ երեխաները լացելու են, հաշմանդամները ցավից ոռնալու են, անդամալույծները գալարվելու են գետնի վրա, անտուն եւ անօթեւան մնացող մայրերն անիծելու են: Յուրաքանչյուր ոստիկան չէ, որ կարող է օրորոցից երեխային դուրս շպրտել փողոց, յուրաքանչյուր ոստիկան չէ, որ կարող է խոհանոցում հաց ուտող մանկահասակ երեխային հատակի վրա քարշ տալով մատնել ցրտահարության, հաշմանդամին քացու տակ տալ, երեխա կերակրող մորը բռնության ենթարկել: Մարդկային բարոյականության որոշակի ընկալում ունեցող ցանկացած մարդու նյարդեր, ի վերջո, կարող են տեղի տալ, մարդը կարող է մի պահ զարհուրել իր արածից, հետ կանգնել հրաման կատարելուց: Նույնիսկ կամք ասածն այստեղ տեղին չէ, որովհետեւ մարդկային կամքը տրված է սեփական ցավն ու զգացումները հաղթահարելու համար եւ ոչ թե անպաշտպան մարդկանց ցավ պատճառելու եւ ողբերգության մատնելու:

Փաշինյանին պետք է ոստիկանություն, որը կազմված կլինի սադիստներից, այո, մարդկանցից, ովքեր բավարարություն են զգում մարդկանց կտտանքների ենթարկելու, ողբերգության մատնելու եւ այդ ողբերգությանն ականատես լինելու տեսարաններից: Փաշինյանին պետք է այնպիսի ոստիկանություն, որն իր հրամանով տնավեր կանի ոչ թե մի ամբողջ շենք, այլ գյուղեր ու քաղաքներ: Սա չափազանցություն չէ, ամենեւին: Փաշինյանը հասկանում է, որ դարձել է համազգային ատելության եւ համաժողովրդական նզովքի խորհրդանիշ: Նման ատելությանը դիմակայելու համար պետք են առանց խղճի ու առանց հույզերի ոստիկանական ուժեր: Միայն նրանց միջոցով նա հույս ունի կոտրել համաժողովրդական ատելությունը, պահել իր իշխանությունը համաժողովրդական նզովքի պայմաններում: Նման պրակտիկ զորավարժությունները չափազանց կարեւոր են՝ բացահայտելու հոգեպես առողջներին ու բարոյական արժեքներ կրողներին եւ մաքրել ոստիկանության շարքերը նմաններից:

Ես սա չեմ ներկայացնում որպես տեսական մտավարժանք, այլ միանգամայն իրական պրոցես, որ տեղի է ունենում ոստիկանությունում՝ իշխանազավթումից հետո: Ոստիկանության շարքերում աշխատող բազմաթիվ մարդիկ են պատմում, որ յուրաքանչյուր նման հակամարդկային օպերացիայից հետո լինում են հեռացողներ եւ հեռացվողներ, մարդիկ, որոնց նյարդերը տեղի են տալիս, մարդիկ, ովքեր այլեւս ի վիճակի չեն լինում դիմանալ նման բարոյական կտտանքների: Լինում են նաեւ այնպիսիները, ովքեր համամարդկային արժեքների բացարձակ բացակայության ռեկորդներ են դրսեւորում եւ առաջ քաշվում՝ որպես առավել հուսալիներ եւ ծառայության առաջամարտիկներ: Փաշինյանին պետք չեն սովորական ոստիկաններ, նրան պետք են ենիչերիներ:

Ավետիս Բաբաջանյան