«Հրապարակ». 2021 թվականին ժողովուրդն իր գնահատականը տվել է, եւ հետ գնալն այնքան էլ ճիշտ չի

Աննա Հակոբյանի ազգականը` ՔՊ-ական պատգամավոր Էդգար Հակոբյանը, կտրականապես դեմ է Նիկոլ Փաշինյանին իմպիչմենտ հայտնելու գործընթացին, ասում է՝ դրա համար որեւէ հիմք չկա, պատերազմում կրած պարտության, Արցախի կորստի համար էլ մեղադրում է նախկիններին: Ներկայացնում ենք մեր զրույցը պատգամավորի հետ: 

- Պատասխանե՞լ եք քաղաքացիների՝ պատգամավորներիդ հասցեագրված նամակին, որով առաջարկում են իմպիչմենտի գործընթաց սկսել: 

- Չեմ պատասխանել, կպատասխանեմ: 

- Ի՞նչ եք պատասխանելու:

 - Իսկ, Ձեր կարծիքով, ի՞նչ պետք է պատասխանեմ, նորմալ կարծիք չունեմ էդ գործընթացին: 

- Նկատի ունեք՝ դե՞մ եք:

 - Կողմ լինելու հիմքեր չկան: 

- Մարդիկ արձանագրում են, որ ձեր իշխանությունը ձախողել է երկրի կառավարումը, Արցախ ենք կորցրել, Հայաստանից եք տարածքներ հանձնել, մնացածի մասին ավելորդ է խոսելը...

 - Սխալ են ասում: 

- Ո՞ր պահն է սխալ:

 - Ես կարծում եմ՝ ընդհանուր կառավարումը ձախողված չի, եւ հիմքեր չկան իմպիչմենտի:

- Այսինքն՝ պատերազմում չե՞նք պարտվել, Արցախը մե՞րն է, Ջերմուկից, Կիրանցից տարածքներ չե՞նք զիջել, հինգ հազար զոհ էլ չե՞նք ունեցել: 

- Հայաստանի Հանրապետության կառավարությունն ամեն ինչ արել է Հայաստանի Հանրապետության, իր ժողովրդի համար, մնացած ձախողումները, թե ինչ պատճառով է եղել, դա էլ գիտի` 30 տարվա բազմաթիվ խնդիրների հետ կապված, նախկին իշխանությունների վարած քաղաքականության, մանրամասները, որ չմանրանաք, ժողովուրդը լավ գիտի սրա մասին եւ իր գնահատականները տվել է 2021 թվականի ընտրություններին: 

- Դուք էլ, փաստորեն, օրիգինալ չեք եւ պնդում եք, որ նախկիններն են մեղավոր ամեն ինչում:

 - Մեղավորները մեղավոր են, բայց ես կարծում եմ, որ մեր կառավարման ժամանակ այնպիսի սխալներ չենք արել, որ բերել է նրան, ինչին որ բերել է: Ու ժողովուրդն էլ իր գնահատականը տվել է: 

- 2021-ին Արցախ ունեինք դեռ, դուք ուզում եք ասել, որ հիմա ժողովուրդը հա՞շտ է մեր հայրենիքի կորստի հետ, ու, ինչպես Ալեն Սիմոնյանն էր օրեր առաջ ասում, 50+ ձայն ենք ստանալու առաջիկա ընտրություններում:

 - Ես կրկնում եմ՝ 21 թվականին ժողովուրդն իր գնահատականը տվել է, եւ հետ գնալը այնքան էլ ճիշտ չի: Ժողովուրդը լավ գիտի` ով է մեղավոր եղել, ինչքանով է եղել, եւ իր գնահատականը տվել է: 

- Մեկ ամիս առաջ էլ ժողովուրդը Գյումրիում եւ Փարաքարում իր գնահատականը տվեց, կարող ենք ասել, որ դուք այլեւս չեք վայելում ժողովրդի վստահությունը:

- Բոլոր ժողովրդավար երկրներում այդպիսի բան չկա, որ ՏԻՄ ընտրություններում միանշանակ պետք է իշխանությունը կրի, դա նույնպես ժողովրդավարության տեսանելի արժեք է, դա նշանակում է ամեն գնով` վարչական ռեսուրսն օգտագործելով չի գնում հաղթելու:

- Վարչական ռեսուրսի օգտագործման բազում օրինակներ կարող եմ թվարկել՝ վերջին տարիներին տեղի ունեցած, բայց չեմ անում, անգամ այս պարագայում չեք կարողանում հաղթել, սրա մասին է խոսքը:

 - Դա այդպես չէ, եւ ժողովրդավարության արդյունքում է, որ այս պատկերն ունեցանք, ոչ թե՝ ինչպես որոշ ժամանակներում կամ ոչ ժողովրդավար երկրներում, որ կեղծիքներով վերցնենք իշխանությունը: Եվ ես իմ անձնական կարծիքն ունեմ, որ հաջորդ ընտրություններին էլ մենք վերընտրվելու ենք, ժողովուրդը վստահության քվե է տալու:

- Ինչո՞ւ, հանուն ո՞ր արժանիքի:

 - Ժողովուրդը լավ հիշողություն ու տեսողություն ունի, ամեն ինչ լավ է հիշում ու տեսնում, մեր ծրագրերը, այն բարեփոխումները, որ արվել են, առաջընթացը, ճանապարհները, որ կառուցվել են, մանկապարտեզներն ու դպրոցները, որ սարքվել են, մի խոսքով՝ շատ բան կա, որ թվարկեմ, չեմ վերջացնի:

 - Որքան մանկապարտեզներ ու դպրոցներ էլ քանդվել են, ոչնչացվել, հանձնվել թշնամուն, որը նույնպես ձեր քաղաքականության հետեւանքն է:

- Դուք էլի պրովոկացիա եք անում, ես ասում եմ՝ 21 թվին ժողովուրդը լավ գիտակցել է՝ այդ ամենը ոնց եղավ, որը որից հետո եղավ, ու տվել է մեզ քվե:

- Արցախի վերջնական հայաթափումը, կարծում եք, չի՞ ազդելու ընտրության վրա, թե՞ ձեր ընտրողը գոհ ու երջանիկ է ասֆալտով ու մանկապարտեզներով:

 - Ժողովուրդն ամեն ինչ լավ գիտի:

- Ի դեպ, Դուք կլինե՞ք հաջորդ ցուցակում, համարո՞ւմ եք Ձեզ ակտիվ պատգամավոր, ասում են՝ ՔՊ-ում արդեն ցուցակ է կազմվում, եւ ակտիվներն են միայն տեղ ունենալու: 

- Ժամանակը գա՝ պարզ կդառնա: 

- Գուցե Ձեր դեպքում ակտիվությունը կարեւոր չէ, դուք Նիկոլ Փաշինյանի կնոջ ազգականն եք, եւ այս անգամ էլ այդ կապը դեր կխաղա: 

- Ես բազմաթիվ անգամներ նշել եմ, որ իմ գործունեությունը, այն աշխատանքը, որ կատարել եմ մինչեւ ԱԺ պատգամավոր լինելը՝ թե՛ կուսակցական, թե՛ հանրային, այդ ամենով կարող է պայմանավորված լինել, որ ես այստեղ եմ, իսկ ազգակցական կապերի մասին ես միշտ եմ ասել, որ թե՛ վարչապետի մոտեցումները, թե՛ իր ընտանիքի մոտեցումներում նման բան չկա, որ ազգակցական մոտեցումներով առաջնորդվեն:

- Հա, պարզապես Դուք մինչեւ պատգամավոր դառնալը, ըստ լուրերի, եղել եք շարքային տաքսու վարորդ: Ի՞նչ աշխատանքների մասին եք ասում, որ գնահատել են:

 - Իմ կատարած աշխատանքը եկեք չմեկնաբանեմ, ինձ ճանաչող մարդիկ գիտեն, թե էդ ամենն ինչով է պայմանավորված, ինչու եմ ես այստեղ: