Մենք երկար ժամանակ Ադրբեջանին հորդորում էինք՝ չփորձել մեզ հետ խոսել ուժի լեզվով․ վարչապետ

Վարչապետ Նիկոլ Փաշինյանն այսօր կառավարության նիստը դարձյալ սկսեց ադրբեջանական զինուժի կողմից հուլիսի 12-ին հայկական սահամանպահ գյուղերի վրա կատարած հարձակման մասին հիշեցնելով։ 

Փաշինյանը հիշեցրեց նաև, որ ՀՀ զինված ուժերը կարողացել ենք հաջողությամբ հետ մղել թշնամու հարձակումները՝ նրան պատճառելով էական վնասներ։Ադրբեջանական կողմը կրել է բազմաթիվ կորուստներ, այդ թվում սպառազինության և ռազմական տեխնիկայի, ինչը հայկական ռազմական ուժի, մտքի և ռազմարդյունաբերական համալիրի ակնհայտ հաղթանակն էր»,-նկատեց Փաշինյանը։

Բայց, ըստ վարչապետի, շատ ավելի ուժեղ էր հակառակորդին հասցրած բարոյահոգեբանական հարվածը, և սահմանին տեղի ունեցած դեպքերի արդյունքում Ադբրբեջանում ներքաղաքական անկայուն վիճակ է ստեղծվել, ինչը այդ երկրի ղեկավարությանը ստիպում է դիմել նորանոր սադրանքների՝ ներքին դժգոհության էներգիան Հայաստանի և Արցախի դեմ ուղղորդելու համար։

Այս ամենին ֆոնին Նիկո Փաշինյանը հարկ համարեց կատարել մի քանի կարևոր արձանագրումներ։

«Նախ Ադրբեջանը հարձակվեց Հայաստանի ինքնիշխան տարածքի, և ևս մեկ անգամ պիտի ընդգծեմ, որ այն դիրքերը, որոնք դարձել են վերջին երկու շաբաթվա իրադարձությունների կիզակետում, գտնվում են ՀՀ ինքնիշխան տարածքում, և Հայաստանին ուղղված Ադբեջանի մեղադրանքները իր դեմ ագրեսիայի վերաբերյալ պարզապես անհեթեթ են։ Ադրբեջանը հարձակում գործեց այն ժամանակ, երբ Հայաստանը ներգրավված էր Լեռնային Ղարաբաղի հարցի կարգավորման խաղաղ գործընթացում, և այն պայմաններում, երբ Ադրբեջանը հրաժարվում էր բանակցել հակամարտության հիմնական կողմի՝ Արցախի հետ։ Ադրբեջանական այն միֆը, թե նրա բանակը կարող է հաղթել հայկական բանակին, և, հետևաբար, Հայաստանը և Արցախը պետք է զիջումների գնան, հօդս ցնդեցին։ Մենք երկար ժամանակ Ադրբեջանին հորդորում էինք՝ չփորձել մեզ հետ խոսել ուժի դիրքերից, ուժի լեզվով և ուժի սպառնալիքներով»,-հայտարարեց Նիկոլ Փաշինյանը։