Ֆլեշմոբ՝ «Coronavirus pandemic forever»
Ես իրավունք ունե՞մ չհավատալու ՀՀ ԱՆ հիվանդությունների վերահսկման եւ կանխարգելման ազգային կենտրոնի հայտարարություններին, որոնք ամեն օր գուժում են կորոնավիրուսով վարակման նոր դեպքերն ու մահերը: Կարծում եմ՝ ունեմ: Նաեւ կարծում եմ՝ ես միակ մարդը չեմ, որ չեմ հավատում այս «էշի հարսանիքին»: Ինչ-որ մեկն ինչ-որ տեղ ինչ-որ հարց է լուծում, իսկ ես պետք է հավատամ, որ Հայաստանում կորոնավիրուս կա: Այ քեզ հետաքրքիր բան:
Ես բնույթով անհավատ չեմ, ընդհակառակը, նույնիսկ չափից ավելի դյուրահավատ եմ, բայց կորոնավիրուսին չեմ կարողանում հավատալ: Իսկ գուցե պատճառն այն է, որ ինձ ոչ ոք չի՞ կարողանում հավատացնել, որ կա այդպիսի վարակ: Առողջապահության համաշխարհային կազմակերպություն... բարձր է հնչում, բայց ո՞վ չգիտի, որ դա համաշխարհային բիզնես պրոյեկտ է, որի միջոցները գոյանում են անդամ երկրների վճարած գումարներից: Ինչքան շատ կատակլիզմ, այնքան շատ մուծումներ, այնքան մեծ շահ: Կհարցնեք՝ իսկ առանձին պետությունների շա՞հը որն է, որ այսպես միացել են «Coronavirus pandemic forever» համաշխարհային ֆլեշմոբին ու ամեն առավոտ բայղուշի պես հերթական բոթն են գուժում իրենց քաղաքացիներին: Այս հարցի պատասխանը Փաշինյանն է տվել, ասելով՝ կորոնավիրուսը հնարավորություն է: Այո, հնարավորություն է: Սա շատ լավ հնարավորություն է քաղաքական պայքարը կասեցնելու, բողոքի ցույցերը դադարեցնելու, ազգային տոներն ու հիշատակի օրերը սառեցնելու, սոցիալական խնդիրները հետին պլան մղելու, կյանքի հանդեպ անտարբերություն սերմանելու, պատասխանատվություններից խուսափելու համար: Մասնավորապես, ՀՀ գործող իշխանությունների պարագայում կորոնավիրուսը հրաշալի հնարավորություն է PR-վելու, արտաքին քաղաքականության իր ձախողումները մարսելու, կառավարման ոլորտում իր անճարակությունը թաքցնելու, Ֆեյսբուքում շատախոսելու, ստելու, օրեցօր դժբախտացող ժողովրդի վրա ծիծաղելու, նրան հիմարի տեղ դնելու համար: Ընդամենը մի հասարակ հարց՝ ո՞ր իշխանավորն է կորոնավիրուսի պատճառով սկսել վատ ապրել: Եվ ուրեմն՝ ի՞նչ, կորոնավիրուսը միայն խեղճերի՞ն է հարվածում:
Երեկ ռեկորդային թիվ ասացին՝ 162 նոր դեպք: Հանրությունը սոսկաց, վախեցավ, ներքաշվեց իր պատյանի մեջ, կծկվեց: Բայց ես չեմ հավատում: Վախեցնելով մարդկանց կառավարելն ավելի հեշտ է: Ինչպե՞ս են հայտնաբերել այդ դեպքերը՝ թեստո՞վ: Թե՞ստն է, արդյոք, որոշում կորոնավիրուսի առկայությունը, թե՞ մասնագետը: Չկա, չէ՞, այնպիսի թեստ, որ հատուկ միայն կորոնավիրուս է հայտնաբերում: Հետեւաբար, թեստը կարող է եւ խաբել: Վերջնական ախտորոշումը կարող է տալ միայն մասնագետը, իսկ մենք այդ մասնագետը չունենք: Զավեշտ չէ՞, երբ ասում են՝ մեկ օրում առողջացել է 24 մարդ, ընդհանուր առմամբ, առողջացել է 1135-ը, բուժվում է 1600-ը, մահացել՝ 40-ը: Սա ի՞նչ ինքնանպատակ թվաբանություն է: Ինչի՞ց են առողջացել այդ մարդիկ, ինչի՞ց են բուժվում, ինչի՞ց են մահացել: Կորոնավիրուսի՞ց: Չեմ հավատում: Եթե Հայաստանում դուք կարողացել եք մերկ ձեռքերով առողջացնել կորոնավիրուսով վարակված 1135 մարդու, ապա ԱՄՆ-ում եւ եվրոպական զարգացած երկրներում կորոնավիրուսը վաղուց հաղթահարած կլինեին: Հետեւաբար՝ ՀՀ իշխանությունները, իսկ ավելի կոնկրետ՝ ՀՀ վարչապետը, պարետը եւ առողջապահության նախարարը պարզապես փչում են:
Ըստ իս՝ կորոնավիրուսային իրարանցման հիմքում, ի թիվս բազմաթիվ այլ «շուլլերությունների, նաեւ քաղաքական ենթաշերտ կա: Հայաստանում, օրինակ, իշխանությունը պահելու խնդիր է լուծվում: Ուշադրություն դարձրեք, որ ընդդիմության ակտիվացման հետ մեծանում է նաեւ վարակվածության նոր դեպքերի թիվը: Միքայել Մինասյանի եւս մեկ բացահայտում, եւ չի բացառվում, որ նոր դեպքերը 200-300-ով ավելանան: Հիշում եք երեւի՝ 20 հոգուց ավելի հավաքներն արգելելու մասին պարետի որոշումը: Լավ է, բողոքի ցույցեր այս օրերին չկան: Բայց երբ մարդիկ հասկանան, որ իրենց էշի տեղ են դնում, ու ոտքի կանգնեն, կարանտինը կրկին կխստացնեն, կվերականգնեն տեղաշարժման թերթիկները, կսկսեն բռնել մարդկանց: Եվ այսպես կարող են ձգել 1-2 տարի ու վերջում էլ զեկուցել, որ կորոնավիրուսից մի 20-30 հազար մարդ են բուժել:
Եվ վերջում կուզենայի եւս մեկ անգամ կրկնել անհավատիս հավերժական հարցը՝ ե՞րբ եք հաշվետվություն տալու, թե որքան գումար եք ծախսել կորոնավիրուսի դեմ պայքարում:
Հինգաստղանի հյուրանոցներ, սնունդ, դեղորայք, պարետ, պարետատուն, բժիշկների տասնապատկված աշխատավարձ, շտապօգնության բենզին, դիմակ, ձեռնոց, թեստ: Չեմ ասում՝ ծախսերը լումա առ լումա ցույց տվեք, բայց գոնե մի քանի տասնյակ միլիոն դոլարի սխալով երբեւէ կտա՞ք այդ հաշվետվությունը:
Կարծիքներ