Կարելի՞ է, արդյոք, հանգիստ թողնել Գոգյանին
Միանգամայն հասկանալի է, որ Բարձրագույն որակավորման կոմիտեի նախագահ Սմբատ Գոգյանն այնպիսի մարդկային ու կամային հատկանիշներով օժտված անձնավորություն է, որ որեւէ մեկի աջակցության կարիքը չունի՝ իր սկզբունքները պաշտպանելու:
Սմբատ Գոգյանի շուրջ ծավալված անառողջ քննարկումները պատիվ չեն բերում կրթական ու գիտական հանրությանը եւ բացասական ընկալումներ ու տարակուսանք կարող են առաջացնել հատկապես գիտության բնագավառում ինքնադրսեւորվել ցանկացող երիտասարդների շրջանում: Պետք է հաշվի առնել մի բան․ կրթության եւ գիտության բնագավառները «նուրբ», արժեհամակարգեր ձեւավորող բնագավառներ են, որոնց նկատմամբ հարկավոր է չափազանց զգուշավոր լինել:
Պարոն Գոգյանը սկզբունքայնություն է դրսեւորել՝ չհամակերպվելով բնագավառի բարեփոխումների ճանապարհին հանդիպած սոցիալական միջավայրի դիմադրության կամ այլ խոչընդոտների հետ. խոսքը մարդկային հարաբերությունների, իրական արժեքների մասին է: Պետական պաշտոնյան իր քայլով, փաստորեն, փորձ է արել ամրապնդել մարդկանց վստահությունը պետական հաստատության նկատմամբ, այսինքն՝ իր համեստ քայլով նա ցանկացել է ներդրում ունենալ երկրի սոցիալական կապիտալի ուժեղացման գործում:
Կարելի է միայն հարգանքով վերաբերվել պարոն Գոգյանի դրսեւորած վարքագծին, նրա որոշմանը: Տպավորություն է ձեւավորվել, որ նա պաշտոնին կառչած մարդ չէ, քանզի «կոստյումը չէ, որ պետք է զարդարի իրեն»: Պետք է նկատի ունենալ, որ այդ բնագավառում տեւական ժամանակ կուտակվել են խնդիրներ, որոնք կարող է լուծել միայն նրա նման անհատականությունը: Այս առումով, իմաստուն վարվեց ՀՀ վարչապետը՝ պահպանելով այդպիսի արժեքավոր կադրին:
Ինչեւէ, նկատի ունենալով այն, որ մեկընդմերթ լրահոսում հայտնվում են այս թեմայով հրապարակումներ, ու, կարծես, սրա վերջը չի երեւում, կարելի՞ է, արդյոք, հանգիստ թողնել Գոգյանին:
Գագիկ ՎԱՐԴԱՆՅԱՆ
Տնտեսագիտության դոկտոր, պրոֆեսոր
Կարծիքներ