Արսեն Թորոսյանը պայքարում է ՀՀ անկախության ու ինքնիշխանության համար

Քաղաքացիական պայմանագիր խմբակցության քարտուղար Արթուր Հովհաննիսյանը, պատասխանելով լրագրողների հարցերին, անդրադարձավ իր թիմակից Արսեն Թորոսյանի այն հայտարարությանը, թե «քաղաքական վենդետա լինելու է»։ Հովհաննիսյանը պարզաբանեց, որ Թորոսյանի ասածը պետք է ընկալել որպես քաղաքական հանձնառությունների ավարտին հասցնելու մտադրություն։

Նրա խոսքով՝ այդ գործընթացների արդյունքում ընդդիմադիրները կկորցնեն քաղաքական կշիռը՝ փաստացի դուրս մղվելով քաղաքական դաշտից։ Հովհաննիսյանը նշեց, որ լիովին կիսում է իր գործընկերոջ տեսակետը։ Լրագրողի հարցին՝ արդյոք Արսեն Թորոսյանի դեմ նույնպես վենդետա չի կարող իրականացվել, ՔՊ պատգամավորը պատասխանեց, որ այդ հարցադրումն անհիմն է և մեկնաբանության արժանի չէ։

Նրա կարծիքով՝ վենդետան կարող է ուղղվել միայն այն անձանց դեմ, որոնք ունեն մեղավորություն, իսկ Թորոսյանը, ըստ նրա, պայքարում է հանուն Հայաստանի Հանրապետության անկախության և ինքնիշխանության՝ ընդդեմ այն շրջանակների, որոնց մասին արդեն խոսվել է։