Հեռանալուց առաջ Բայդենը «պատմական» համաներում է շնորհել

ԱՄՆ նախագահ Ջո Բայդենը հայտարարել է 39 մարդու ներում շնորհելու և երկարաժամկետ ազատազրկում կրող 1500 բանտարկյալների պատիժը մեղմելու մասին։

«Ամերիկան ​​կառուցվել է հնարավորությունների խոստման և երկրորդ հնարավորության վրա: Այդ իսկ պատճառով այսօր ես կներեմ 39 մարդու, ովքեր հաջողությամբ վերականգնվել են և իրենց համայնքներն ավելի ուժեղ և անվտանգ դարձնելու պարտավորություն են ցուցաբերել: Ես նաև մեղմացնում եմ երկարաժամկետ ազատազրկման պատիժ կրող մոտ 1500 մարդկանց պատիժը, որոնցից շատերը կարժանանային ավելի թեթև պատիժների, եթե դատապարտվեին այսօրվա օրենքների, քաղաքականության և պրատկտիկայի համաձայն»,-նշել է նա:

Ամերիկայի առաջնորդը նշել է, որ պատժի մեղմացումները վերաբերում են նրանց, ովքեր համաճարակի ժամանակ տնային կալանքի են ենթարկվել և «հաջողությամբ վերաինտեգրվել են իրենց ընտանիքներին»: 

Ներումը վերաբերում է նրանց, ովքեր կատարել են ոչ բռնի հանցագործություններ։ Ներվածների անունները չեն բացահայտվում։

Associated Press-ը Բայդենի որոշումը համարում է ժամանակակից պատմության մեջ ամենամեծ համաներումը, որը կայացվել է մեկ օրվա մեջ։

Բայդենն ասել է, որ իր վարչակազմը կշարունակի վերանայել ներման խնդրանքները, և ինքը «ավելի շատ քայլեր կձեռնարկի առաջիկա շաբաթներին»: