«Հրապարակ». Նշանակում է՝ այդ հարաբերություններն այդքան խոր արմատներ չեն ունեցել

«Հրապարակ». Նշանակում է՝ այդ հարաբերություններն այդքան խոր արմատներ չեն ունեցել

ՀՀ ԱԱԾ նախկին տնօրեն Միքայել Համբարձումյանը, որն «ԱԱԾ պահեստազորային սպաների միություն» ՀԿ հիմնադիրներից է, մեկնաբանեց Արթուր Վանեցյանի քայլը։ Վանեցյանն իր պայքարի ու ծառայակից ընկերն է եղել, արդյոք ճի՞շտ էր հիմա նման որոշում կայացնելը, Համբարձումյանը շտկեց՝ ծառայակից եղել է, բայց պայքարի մասով՝ իրենք քաղաքական պայքարին չեն մասնակցել։ «Ֆրանսիայի հրապարակում գալիս մասնակցում էինք որպես սովորական ցուցարար, ո՛չ որպես կազմակերպիչ։ Բայց Արթուր Վանեցյանի որոշումը մեկնաբանելու մասով կարող եմ ասել, որ Վանեցյանը փորձառու մարդ է, երկար ճանապարհ է անցել, վերջին շրջանում էլ ակտիվ քաղաքականության մեջ է գտնվում, եթե էդպես է գտնում, եթե էդպես է տեսնում անհրաժեշտությունը, ուրեմն հիմքեր ունի դրա համար։ Ժամանակը ցույց կտա՝ դա լա՞վ է, թե՞ վատ է»,- ասաց նա։

- Իսկ ի՞նչ եք կարծում՝ մյուս պատգամավորները պե՞տք է հետեւեն Արթուր Վանեցյանի օրինակին ու դնեն մանդատները։

- Չեմ կարող ասել, էնտեղ տարբեր մարդիկ են՝ տարբեր թիմերից, իրենք պիտի որոշեն։

- Մի մասը դրվատանքի խոսքեր է հղում Վանեցյանի հասցեին, որ խոստացել էր մանդատը դնել ու դրեց, մյուսներն ասում են, որ պայքարից դուրս եկավ, ընկերներին լքեց։

- Ի՞նչ է նշանակում՝ ընկերներին լքեց։ Հո ռազմի դա՞շտ չի, որ ընկերներին լքել է։ Ես ինչքանով հասկանում եմ՝ դաշինքով են Ազգային ժողովում ներկայացված եղել, ինքը որոշել է, որ պիտի մանդատը վայր դնի, մյուսները կհետեւեն իրեն՝ կհետեւեն, չեն հետեւի՝ կշարունակեն քաղաքականությամբ զբաղվել էդ ռակուրսով եւ էդ ձեւաչափում։ Դա իրենց ընտրությունն է։ Գիտե՞ք, ընդհանրապես, «դավաճանել» հասկացությունն անընդհատ պետք չէ, էլի, էսպես շահարկել։ Գուցե էդպես են նպատակահարմար գտել։ Այդ քաղաքական դաշինքը, բոլորս հիշում ենք, ձեւավորվեց ընտրությունների հետ կապված, ընտրությունների արդյունքներով։ Ուրեմն նշանակում է՝ այդքան խոր արմատներ չեն ունեցել այդ հարաբերությունները։

- Դուք հանրահավաքներին ներկա էիք լինում Ֆրանսիայի հրապարակում ու տեսաք, որ վրանները հավաքեցին եւ պայքարի նոր փուլ մտան։ Ի՞նչ եք կարծում՝ սա արդյոք նշանակո՞ւմ է, որ պայքարը ձախողվել է, եւ Փաշինյանը դեռ մնալու է։

- Դուք կհիշեք, որ մենք՝ ինքներս, երեւի առաջիններից էինք, որ ասացինք՝ խնդիրներ կան, ընդ որում, եթե չեմ սխալվում, մայիսի 27-ին տարածեցինք էդ հայտարարությունը։ Ես՝ ինքս, գալով հրապարակ, տեսնում էի էդ խնդիրները, ու հենց հրապարակավ էլ դիմեցինք կազմակերպիչներին՝ հորդորով, որ պետք է անպայման վերաիմաստավորեն շարժումը, նոր լիցք տան, հակառակ դեպքում՝ գնալու էին փակուղի։ Ճիշտ է, մի քիչ ուշացումով, բայց, ամեն դեպքում, ճիշտ որոշում կայացրին՝ Ֆրանսիայի հրապարակը «գրաված» պահելը հարցի լուծում չէր։ Հարցի լուծումը հետագան է, թե ինչ են անելու, որ շարժումն իսկապես փակուղի չմտնի, շարժումն իսկապես չմարի, շարունակություն ունենա։ Եթե շարժումը չի զարգանում, դրա վերջն էս շարժման մարումն է։

- Հիմա Դուք տեսնում եք, որ շարժումը մարմա՞ն է գնում։

- Ես հիմա ոչինչ չեմ կարող ասել, ես հիմա տեսնում եմ մի բան, որ իրենք էլ են էդ ամեն ինչը հասկացել, գնահատել ու փորձում են էնպես անել, որ շարժումը նոր թափ հավաքի։ Որքանով կհաջողվի՝ ժամանակը ցույց կտա։

- Ի դեպ, Ձեր ներկայացրած ԱԱԾ պահեստազորային սպաների միությունը հայտարարություն էր տարածել, թե Իշխան Սաղաթելյանը ճիշտ է գնահատում իրավիճակը, եւ շարժումը մտնում է նոր փուլ։ Ի՞նչ նկատի ունեիք դրանով։

- Ճիշտ գնահատել ասելով՝ մենք նկատի ունեինք Ֆրանսիայի հրապարակից դուրս գալը, մենք նկատի ունեինք՝ հիմա ինչ միջոցառումներ որ ձեռնարկվում են՝ դա։ Նկատի ունեինք նաեւ այն, որ թույլ չտվեցին, որ շարժումը գնա փակուղի։ Այսինքն՝ տալիս են շարունակություն, եւ դա ինքնին ենթադրում է նոր փուլ։

- Ի դեպ, Արթուր Վանեցյանը շարունակո՞ւմ է համարվել ձեր միության անդամ, քանզի ձեր տարածած հաղորդագրությանը կից լուսանկարում նա էլ կա։

- Չէ, մենք այն ժամանակ հայտարարությամբ հանդես ենք եկել, հենց Ազգային ժողովի պատգամավոր ընտրվելուց հետո պարոն Վանեցյանը դուրս է եկել մեր ՀԿ-ից, բայց մինչեւ էսօր էլ մենք բարիդրացիական, ընկերական, գործընկերական շատ լավ հարաբերություններ ունենք, ունեցել ենք, ու կարծում եմ՝ կունենանք։