Ավինյանի դեմքը որ տեսնում եմ, կյանքից հիասթափվում եմ
Առաջիկայում Երեւանի քաղաքապետի ընտրություններ են սպասվում: Հայաստանի եվրոպական կուսակցությունը դեռ ամիսներ առաջ հայտարարել էր, որ քաղաքապետի իր թեկնածուն երգիչ, երգահան Ռուբեն Հախվերդյանն է: Եվրոպական կուսակցության նախագահ Տիգրան Խզմալյանը «Հրապարակի» հետ զրույցում նշել էր, որ այդ որոշման հիմքում Նատալյա Ռոտենբերգին հակադրվելն է եղել, ինչ վերաբերում է վերջնական որոշմանը, ապա այն դեռեւս չի կայացվել։ «Գուցե Ռուբեն Հախվերդյանին առաջադրենք, գուցե՝ ոչ, դեռ հստակ որոշում չունենք: Ոչինչ չեմ բացառում»,- ասում է Խզմալյանը: Երգիչ Ռուբեն Հախվերդյանն էլ մեզ հետ զրույցում ասաց, որ ինքը մի մարդ է, որին երեւանցիները սիրում են, եւ որը երբե՛ք չի լափի:
- Պարոն Հախվերդյան, օրեր առաջ Ձեր թեկնածության մասին խոսվեց, արդեն որոշե՞լ եք մասնակցել ընտրություններին, առաջադրվել որպես քաղաքապետի թեկնածու, թե՞ ոչ:
- Դեռ մտմտում եմ, չեմ որոշել:
- Ի՞նչն է պատճառը:
- Դե, Ավինյանի դեմքը որ տեսնում եմ, կյանքից հիասթափվում եմ:
- Ինչո՞ւ:
- Ես որ մարդու դեմքին նայում եմ, հասկանում եմ, թե իրենից ինչ ա ներկայացնում:
- Ձեր կարծիքով` ի՞նչ է ներկայացնում:
- Այ, էդ չգիտեմ: Մարդը որ տեսակ չի ունենում, շատ վատ է: Մարդիկ կան, որ գոնե տեսակ ունեն` վատ կամ լավ… Տեսակ չունեցող մարդ է նա, իսկ տեսակ չունեցող մարդուն երեւանցին չի սիրում:
- Իսկ եթե Դուք մասնակցեք ընտրություններին, վստա՞հ եք, որ կընտրվեք: Գուցե Դուք սիրված եք, բայց երեւանցին Ձեզ կընտրի՞:
- Ի՞նձ: Չգիտեմ, դա ինձ չի հետաքրքրում, եթե անկեղծ: Մարդիկ եթե ընտրեն, ես իրենց համար եմ աշխատելու:
- Շատերն ասում են` սողացող պատերազմի օրերին, երբ ամեն րոպե թշնամին կրակում է արդեն Հայաստանի վրա, Երեւանի քաղաքապետի ընտրություններն ուղղակի անիմաստ են:
- Երեւանն ունի բազմաթիվ խնդիրներ. կանաչապատման խնդիր, ջրամատակարարման խնդիր, տրանսպորտի խնդիր: Դրանք մեծ պրոբլեմներ են:
- Երեւանի սրտում ծառեր կտրեցին, նոր ծառեր տնկեցին: Ի՞նչ կասեք այդ մասին:
- Դա էլ է կանաչապատման խնդիր: Չեմ ուզում առանձնացնել ոչ մի հարց: Ընդհանուր խնդիրներ են, վատ է:
- Հաճախ Ձեզ տեսնում ենք Սայաթ-Նովա փողոցի «Հին Արենի» համալիրում: Ի՞նչը ստիպեց երգել այնտեղ:
- Արդեն երկար տարիներ է՝ այնտեղ եմ աշխատում:
Կարծիքներ