Սարգսյանին վերջին հրաժեշտ են տվել Մոսկվայի Տրոեկուրովյան գերեզմանատանը

Մոսկվայի Տրոեկուրովյան գերեզմանատանը հրաժեշտ են տվել Դոնեցկի «Արբատ» կամավորական գումարտակի հիմնադիր Արմեն Սարգսյանին, որը մահացել է «Ալ առագաստներ» բնակելի համալիրում տեղի ունեցած պայթյունի հետևանքով, հաղորդում է ՌԻԱ Նովոստին:

Հիշեցնենք` Մոսկվայի հյուսիս-արևմուտքում գտնվող «Ալ առագաստներ» բնակելի համալիրի 29-հարկանի շենքում պայթյուն է տեղի ունեցել։ 

Պայթյունից անմիջապես հետո հայտնի դարձավ, որ 1 մարդ մահացել է, 4-ը` տարբեր աստիճանի վնասվածքներ ստացել, նրանց թվում է ԴԺՀ-ում կամավորական գումարտակի հիմնադիր Արմեն Սարգսյանը: Ավելի ուշ լրատվամիջոցները հայտնեցին, որ նա մահացել է հիվանդանոցում։

Քրեական գործը քննվում է համընդհանուր վտանգավոր եղանակով սպանության, երկու և ավելի անձանց սպանության փորձի և զենքի ապօրինի շրջանառության հոդվածներով:

Շրջանառվող վարկածների մեկի համաձայն՝ հայ գործչին սպանել է մահապարտ-ահաբեկիչը, ով ազգությամբ հայ է:

Միաժամանակ, Վլադիմիր Զելենսկին օրերս խոստովանեց, որ երկրի անվտանգության ուժերը հատուկ գործողություն են իրականացրել և վնասազերծել Ուկրաինայի համար ոչ ցանկալի անձի՝ չմանրամասնելով,  խոսքը Սարգսյանի մասի՞ն է, թե՞ ոչ: