Կենսական ճանապարհը փակել են ու դրա շուրջ մենք պետք է բանակցենք, սա ահավոր է
Ադրբեջանցիները շարունակում են փակ պահել Ստեփանակերտ-Գորիս մայրուղին: Այս պահին անհնար է Արցախից Հայաստան գալ, կամ ՝ Հայաստանից Արցախ գնալ:
«Փաստինֆո»-ի հետ զրույցում Արցախի ԱԺ պատգամավոր Մետաքսե Հակոբյանը տեղեկացրեց, որ Արցախի ներկայացուցիչները և ռուս խաղաղապահներն այս պահին բանակցում են ճանապարհը փակած ադրբեջանցիների հետ:
«Կենսական ճանապարհը փակել են ու դրա շուրջ մենք պետք է բանակցենք, սա ահավոր է: Քաղաքացիական հագուստով ադրբեջանցիներ են, բայց սա շոու է՝ իբր քաղաքացիական անձինք են: Ինչ-որ անհեթեթ պատճառաբանություններ են բերում՝ իբրև բնապահպանական խնդիրներից ելնելով են փակել ճանապարհը, բայց դե հիմքը խորն է, ադրբեջանցիների պահանջն էլ ավելի հեռուն է գնալու՝ մինչև Սյունիքի միջանցք: Երբ ՀՀ իշխանություններն ինչ-որ բան պահելու համար զիջում էին ինչ-որ բան, հիմա էլ հերթը հասել է արդեն Սյունիքին»,-ասաց Հակոբյանը:
Ավելի վաղ Արցախի տեղեկատվական շտաբը հայտնել էր, որ Շուշի-Քարին տակ խաչմերուկի հատվածում քաղաքացիական հագուստներով մի խումբ ադրբեջանցիներ բնապահպանական պատճառաբանությամբ փակել են Ստեփանակերտ-Գորիս մայրուղին:Այս մասին հայտնում է Արցախի տեղեկատվական շտաբը։
Կարծիքներ