Հայաստանում կորոնավիրուսից մահացած առաջին հիվանդի մասին․․․

Առողջապահության նախարարության մամլո խոսնակը գրառում է արել Հայաստանում կորանավիրուսով առաջին մահվան դեպքի մասին․

Alina Nikoghosyan

«Նորք» ինֆեկցիոն կլինիկական հիվանդանոցում արձանագրվել է մահվան դեպք։ 72-ամյա պացիենտն ունեցել է կորոնավիրուսային հիվանդություն, ինչպես նաև երկկողմանի թոքաբորբ, պոլիօրգանային անբավարարություն, ռեսպիրատոր դիսթրես համախտանիշ, հիպերտոնիկ հիվանդություն և սրտի ռիթմի խանգարում․․․

Պացիենտը երեկվանից գտնվել է վերակենդանացման բաժանմունքում, և վերջինիս վիճակը գնահատվել է ծայրահեղ ծանր։

Գրառումն եմ կարդում և մտածում՝ թվարկած հիվանդությունները կորոնավիրուսի ախտահարման հետևա՞նք են, թե՞ ,,պացիենտը,, մինչ այդ ունեցել է երկկողմանի թոքաբորբ, պոլիօրգանային անբավարարություն, ռեսպիրատոր դիսթրես համախտանիշ, հիպերտոնիկ հիվանդություն,  սրտի ռիթմի խանգարում հիվանդությունները։

Կորոնավիրուսի մասին մասնագիտական շատ բան չկա, բայց հայտնի է․

Կորոնավիրուսը պատկանում է այն վիրուսների խմբին, որոնք առաջացնում են տարբեր հիվանդություններ՝ սովորական հարբուխից մինչև ծանր հիվանդություն, ինչպես օրինակ Մերձավոր Արևելքի  շնչառական համախտանիշը (MERS-CoV) և Ծանր սուր շնչառական համախտանիշը (SARS-CoV)։ Նոր կորոնովիրուսը (COVID-19) նոր ենթատեսակ է, որը մինչ օրս չի հայտնաբերվել մարդկանց շրջանում։

Այսինքն՝ կորոնավիրուսներով վարակման արդյունքում հիմնականում ախտահարվում են շնչառական օրգանները ու որպես հետևանք  առաջացնում նման հիվանդություններ։ Հենց դա է պատճառը, որ մասնագետներն ասում են՝ կորոնավիրուսի առանձնահատուկ բուժում չկա, սակայն հիվանդության հետևանքով առաջացած առողջական խնդիրները պետք է բուժել։

Հիվանդության հետևանքով առաջացած առողջական խնդիրները։

Մամլո խոսնակի թվարկած հիվանդությունները կորոնավիրուսի ախտահարման, հետևանքների մասին են խոսում։

Սա գրում եմ այն բանի համար, որ Աստված չանի, առաջինը և վերջինը լինի, եթե էլի նման բան լինի, անընդհատ չկրկնվեք՝ հիվանդը ունեցել է երկկողմանի թոքաբորբ, պոլիօրգանային անբավարարություն, ռեսպիրատոր դիսթրես համախտանիշ:

Մի փոքրիկ նկատառում ևս․ առավոտյան վարչապետը հայտարարել էր, որ ծայրահեղ ծանր վիճակում գտնվող երկու քաղաքացի կա, երկուսն էլ 75 տարեկանից բարձր են։ Մահացողը 72 տարեկան է։ Ո՞վ է մահացողը, եթե չի համընկնում ծայրահեղ ծանր վիճակում գտնվող հիվանդների տարիքի հետ։