Իսկական խաղաղություն հնարավոր չէ, քանի դեռ բոլոր հայ պատանդներն ու ռազմագերիները ազատ չեն արձակվել

Ամերիկայի հայկական համագումարի (Համագումար) համանախագահներ Օսկար Թաթոսյանն ու Թալին Յակուբյանը նախագահ Դոնալդ Թրամփին նամակ են ուղղել` շարադրելով իրենց մտահոգությունները Հայաստանի և Ադրբեջանի միջև «պատմական խաղաղության պայմանագրի» բանակցությունների ավարտի մասին հայտարարության առնչությամբ։ 
«Իսկական խաղաղության հնարավոր չէ հասնել այնքան ժամանակ, քանի դեռ բոլոր հայ պատանդներն ու ռազմագերիները ազատ չեն արձակվել, և մենք Ձեզ կոչ ենք անում օգտագործել Ձեր տրամադրության տակ եղած բոլոր գործիքները՝ նրանց անհապաղ ազատությունն ապահովելու համար»,– ընդգծեցին Համագումարի համանախագահները։ 

Համանախագահներն ընդգծեցին, որ պետք է լինեն անվտանգության ուժեղ երաշխիքներ, ինչպես նաև «ծանր հետևանքներ, եթե Ադրբեջանը խախտի այս պայմանագիրը»: Իրենց նամակում նրանք նշեցին Ադրբեջանի կողմից «իր միջազգայնորեն ստանձնած պարտավորությունները կատարելու» շարունակական ձախողումը, «ներառյալ 2020թ.-ին Վաշինգտոնում ձեռք բերված պայմանավորվածությունը» նախագահ Թրամփի առաջին պաշտոնավարման ընթացքում։ 
Նամակում նաև լուրջ մտահոգություններ արտահայտվեցին «Հայաստանի սահմանների ներսում ռազմավարական տարածքներում» Ադրբեջանի շարունակական ռազմական ներկայության վերաբերյալ և բացատրվել է, որ չնայած Հայաստանի պատրաստակամությանը հասնելու կայուն խաղաղության համաձայնագրի, Ադրբեջանը «շարունակում է անօրինական ցուցադրական դատավարություններ անցկացնել հայ գերիների նկատմամբ»: 

Բացի այդ, Համանախագահներն ընդգծեցին, որ Արցախի 120,000 հայերի էթնիկ զտումները մնում են «չլուծված հումանիտար ճգնաժամ» և իրենց նամակում շեշտվեց, որ նրանց իրավունքները և կարգավիճակը պետք է լուծում ստանան, և նրանց «վերադարձի հիմնարար իրավունքը պետք է երաշխավորվի»։