Մարզպետի թիմակիցը՝ հիվանդանոցի տնօրեն, մինչդեռ 15 տարվա դաշնակցական տնօրենի միավորներն առավել բարձր էին

Շիրակի մարզպետ Տիգրան Պետրոսյանն այսօր «Գյումրու մոր եւ մանկան ավստրիական հիվանդանոցի» տնօրենի պաշտոնին է նշանակել Ժորժիկ Սերոբյանին, որը 2005 թվականից աշխատում է տվյալ բուժհաստատությունում: Բանն այն է, որ երեք օր առաջ հիվանդանոցի տնօրենի թափուր պաշտոնի համար հայտարարված մրցույթին մասնակցում էին 3 թեկնածու:Նրանք էին՝ 15 տարի «Գյումրու մոր և մանկան ավստրիական հիվանդանոցը» ղեկավարած Աշոտ Կուրղինյանը, նույն հիվանդանոցի  տրավմատոլոգ Ժորժիկ Սերոբյանը և «Գյումրի» բժշկական կենտրոնի վիրաբույժ Հրաչ Մարտիրոսյանը:

Վերջինը մրցույթին չի մասնակցել՝ փաստաթղթերը թերի լինելու պատճառով: Հիմնական մրցակցույթյունն ընթացել է Աշոտ Կուրղինյանի և Ժորժիկ Սերոբյանի միջև: Առաջին թեստային փուլը երկու հավակնորդներն էլ հաղթահարել են: 50 հարցից 48-ին է ճիշտ պատասխանել Ժորժիկ Սերոբյանը, իսկ Աշոտ Կուրղինյանը բոլոր 50 հարցին էլ ճիշտ է պատասխանել: Մրցույթի հանձնաժողովը ակնհայտորեն առավելությունը տվել է գործող տնօրենին, քանի որ գաղտնի քվեարկությամբ հանձնաժողովի 7 անդամն էլ  կողմ են քվեարկել  Աշոտ Կուրղինյանի ներկայացրած զարգացման ծրագրին:Երրորդ փուլի քվեարկությամբ մեկ ձայնով Սերոբյանը զիջել է  նրան: Որոշում է կայացվել, որ երկու թեկնածուներն էլ հաղթահարել են մրցույթի փուլերը, եւ եռօրյա ժամկետում մարզպետը կորոշի, թե ում կնշանակի տնօրենի պաշտոնում: Անդրադառնալով մարզպետի որոշմանը՝  նշենք, որ Ժորժիկ Սերոբյանի նշանակումը անակնկալ չէր, քանի որ դեռ ամիսներ առաջ քաղաքում լուրեր էին  պտտվում, թե   նշված  հիվանդանոցի տնօրենի պաշտոնը մարզպետը պահել է թիմակից ընկերոջ համար:

Հիշեցնենք, որ Ժորժիկ Սերոբյանը քաղակտիվիստ, մարզպետի մտերիմ ընկեր Կարեն Պետրոսյանի քեռորդին է, որի հայրը՝ Երվանդ Սերոբյանն էլ ՇՊՀ ռեկտորի ժամանակավոր պաշտոնակատարն է: ԱԺ արտահերթ  ընտրություններում Ժորժիկ Սերոբյանը սատարում էր  Տիգրան Պետրոսյանին եւ անգամ  «Իմ քայլը» դաշինքով վարկանիշային թեկնածու էր: Հիվանդանոցի արդեն նախկին տնօրեն Աշոտ Կուրղինյանը նույնպես  քաղաքականությամբ էր զբաղվում :Նա ՀՅԴ անդամ է եւ ՏԻՄ ընտրություններին Գյումրու քաղաքապետի թեկնածու էր:  Ուշագրավ է, որ օրերս հիվանդանոց այցելած առողջապահության նախարար Արսեն Թորոսյանը նրա տարիների աշխատանքը բավականին  դրական որակավորեց:Ի դեպ, Աշոտ Կուղինյանը մարզպետի որոշման հետ կապված հասցրել է ֆեյսբուքում գրառում անել. «Մարզպետի ոչ օբյեկտիվ որոշման եւ ակնհայտ հովանավորչության փաստի առիթով հրավիրում եմ բոլոր ԶԼՄ-ներին,  մամլո ասուլիսը այսօր՝ ժամը 16:00-ին»։